ကျောက်တော်မြို့နယ်တွင် လက်နက်ကြီးကျည်ထိမှန်ပြီး တစ်ရက်အတွင်းဒဏ်ရာရသူ ၂၆ ဦးရှိပြီး ယင်းအထဲက ၃ ဦးသေဆုံး

နိရဉ္စရာ၊ နိုဝင်ဘာ ၄/၂၀၂၂

ရခိုင်ပြည်နယ် ကျောက်တော်မြို့နယ်တွင် အကြမ်းဖက် စစ်ကောင်စီတပ်က လက်နက်ကြီးကျည်များကို လူနေကျေးရွာများထဲသို့ ပစ်ခတ်၍ ယနေ့တစ်ရက်တည်းအတွင်း လူပေါင်း ၂၆ ဦး ဒဏ်ရာရရှိခဲ့ပြီး ယင်းအထဲက သေဆုံး ၃ ဦးသေဆုံးသွားပြီဖြစ်ကြောင်း သိရသည်။

သေဆုံး ဒဏ်ရာရသူများမှာ ရွှေပြည်သစ်ကျေးရွာက ၂ ဦး သေ ၆ ဦးဒဏ်ရာရ၊ ပိန္နဲချောင်းရွာက ၅ ဦးဒဏ်ရာရ၊ မြို့မရွာလက်ဆောင်ကောက်မူဆလင်ရွာက ၁ဦးဒဏ်ရာရ၊ မြင်းကပ်ကျေးရွာမှ ၂ ဦး ဒဏ်ရာရ၊   အလယ်ရွာက ၄ ဦး ဒဏ်ရာရ၊ ဝက်မှိုင်းရွာမှ ၁ ဦးသေ ၁ ဦး ဒဏ်ရာရ၊ အုန်းပတီးရွာက ဒဏ်ရာရ ၄ ဦးတို့ ဖြစ်ကြသည်။

ယနေ့ နိုဝင်ဘာ ၄ ရက် နံနက်ပိုင်းတွင် ကုလားတန်မြစ်အတွင်းမှ စစ်ဇက်ရေယာဉ် ၂ စီးကို ရက္ခိုင့်တပ်တော်အေအေက ပစ်ခတ်တိုက်ခိုက်ခဲ့သည့်အတွက် ၎င်းတိုက်ခိုက်မှုကို လက်တုံ့ပြန်ရာတွင် စစ်ကောင်စီတပ်သည် တိုက်ပွဲဖြစ်ပွားခြင်း မရှိသည့် လူနေကျေးရွာများကို လက်နက်ကြီးကျည်များဖြင့် အဆက်မပြတ်ပစ်ခတ်ခဲ့သည်။

ရွှေပြည်သစ်ကျေးရွာထဲတွင် လက်နက်ကြီး ကျရောက်ပေါက်ကွဲ၍ ဦးမောင်တူ (၈၀) နှစ်နှင့် မောင်အောင်မင်းနိုင်(၈) နှစ်အရွယ်ကလေးငယ်တစ်ဦး သေဆုံးခဲ့ကြောင်း ရခိုင်မှအမည်မဖော်လိုသူ လူမှုရေး လှုပ်ရှားသူတစ်ဦးက ပြောသည်။

" လောလောဆယ် အသက် ၈၀ အရွယ်အဖိုးတစ်ယောက်နဲ့ (၈) နှစ်သားလေးတစ်ယောက် ဆုံးပါပြီ။ ကလေးက သူ့အမေနဲ့  ဗုံးတွင်းထဲဝင်ပုန်းရာမှာ လက်နက်ကြီးကျည်ထိလို့ အခုလိုဖြစ်သွားတာ။ ကလေးက ဦးခေါင်းပွင့်ထွက်သွားပြီး ပွဲချင်းသေသွားတယ်။ အမေဖြစ်သူမှာတော့ နောက်ကျောမှာ ဒဏ်ရာတွေရတယ်"ဟု ပြောသည်။ 

ရွှေပြည်သစ်ကျေးရွာမှ ဒဏ်ရာရသူများမှာ တစ်အိမ်တည်းနေထိုင်ကြသည့် ကိုနိုင်နိုင်ဦး (၃၁ နှစ်)၊ ဇနီး ဖြစ်သူဒေါ်ခိုင်ခိုင်မိုး (၃၂ နှစ်)နှင့် ဘေးနားအိမ်မှ မမိုးမိုးရီ (၂၂ နှစ်)တို့ အပါအဝင် ၆ ဦးဖြစ်ကြသည်။

မြင်းကပ်ကျေးရွာမှ ဦးကျော်လှိုင်(၅၀ နှစ်)နှင့် အမျိုးသမီးတစ်ဦးတို့ ဖြစ်ကြပြီး  လက်ဆောင်ကောက် မူဆလင်ကျေးရွာမှလည်း အမျိုးသား ၁ ဦးတို့ ဒဏ်ရာရရှိခဲ့သည်ဟု သိရသည်။

ဝက်မှိုင်းကျေးရွာက ၂ ဦးဒဏ်ရာရပြီး ယင်းအထဲက သေသွားသူမှာ အသက် ၅၁နှစ် အရွယ် ဒေါ်အေးသန်းနုဖြစ်ကြောင်း ဒေသခံတစ်ဦးက ပြောသည်။

" အိမ်မှာနိန်ရင်း နေ့လယ် ၂ နာရီလောက်မှာ  ထမင်းချက်ဖို့ပြင်နေတုန်း ကျောက်တော် တောင်ထက်မှာရှိတဲ့ စစ်တပ်က  ပစ်လိုက်တဲ့ လက်နက်ကြီးကျဥ်ထိမှန်ပြီးတော့ ၁၅မိနစ်လောက်အကြာမှာ သေသွားတာပါ " ဟုပြောသည်။

အုန်းပတီးကျေးရွာတွင်လည်း ၄  ဦးဒဏ်ရာရကာ ယင်းအထဲက အမျိုးသမီးတစ်ဦးကို ကျောက်တော်မြို့ သို့ ဆေးကုသရန် ယူဆောင်လာခဲ့သည်ဟု သိရသည်။

လက်ရှိတွင် လက်နက်ကြီးပစ်ခတ်မှုများရှိနေဆဲဖြစ်ပြီး ဒဏ်ရာရသူကိုလည်း နာရေးကားများက ဆေးရုံသို့ ပို့ဆောင်ရန် အရဲစွန့်၍ သွားရောက်ယူဆောင်နေသည်ဟု သိရသည်။ 

စစ်တွေဘက်မှ ကုလားတန်မြစ်အတိုင်းတက်လာသည့်  စစ်ဇက်ရေယာဉ် ၂ စီးကို AA တပ်ဖွဲ့ဝင်များက ကျောက်တော်မြို့အရှေ့ဘက်ကမ်းရှိ သကြားစက် မော်ထောက်အနီးတွင် ယနေ့ နံနက် ၉ နာရီ ၁၀ မိနစ်ခန့်တွင်စတင်တိုက်ခိုက်ခဲ့ရာမှ အထိအခိုက်များခဲ့သည်ဟု ဒေသခံများက ဆိုသည်။ 

ယင်းသို့တိုက်ခိုက်ခံရ၍ စစ်ဇက်ရေယာဉ်များဘက်ကလည်း လက်နက်ကြီး၊ လက်နက်ငယ်များဖြင့် အနီးအနားဝန်းကျင်သို့ ရမ်းသမ်းပစ်ခတ်နေသဖြင့်  လူနေကျေးရွာများထဲ ကျရောက်၍  အပြစ်မဲ့ဒေသခံရွာသားများ ထိခိုက်သေဆုံးမှုရှိခဲ့ခြင်းဖြစ်သည်ဟု ဒေသခံများက ပြောသည်။ 

 ပြီးခဲ့သည့် စက်တင်ဘာလ ၁၉ ရက် ညနေပိုင်းကလည်း စကခ(၉)တပ်မအနီး ကုလားတန်မြစ်တွင် ရပ်နားထားသည့် စစ်ဇက်ရေယာဉ် ၂ စီးသည် AA ၏ တိုက်ခိုက်ခြင်းကို ခံခဲ့ရသည့်အတွက် စခက(၉)က လူနေကျေးရွာများသို့ လက်နက်ကြီးများဖြင့် ပစ်ခတ်ခဲ့သည်ဟု ဒေသခံများက ပြောသည်။ 

ယင်းသို့ပစ်ခတ်ခဲ့မှုကြောင့် နဂရာကျေးရွာမှ ရွာသားအချို့ လက်နက်ကြီးကျည်ထိမှန် သေဆုံးခဲ့ရပြီး အနီးအနားကျေးရွာအချို့မှ ရွာသားအချို့လည်း ထိခိုက်ဒဏ်ရာများရရှိခဲ့ကြသည်။(NN-7)