တောင်ကုတ်မြို့နယ် မအီမြို့ ရဲစခန်းမှူးကို မျက်နှာဖုံးစွပ်ထားသည့် သေနတ်သမားများကဖမ်းဆီးခေါ်ဆောင်သွား

နိရဉ္စရာ၊ နိုဝင်ဘာ ၄/၂၀၂၂

ရခိုင်ပြည်နယ်၊ တောင်ကုတ်မြို့နယ်၊ မအီမြို့၊ နယ်မြေရဲစခန်းမှူးကို သေနတ်များ ကိုင်ဆောင်ထားသည့်  အရပ်ဝတ်နှင့် မျက်နှာဖုံးစွပ်ထားသော လူ ၆ ဦးက ယနေ့ နံနက်က ဖမ်းဆီးခေါ်ဆောင်သွားသည်ဟု သတင်းရရှိသည်။

ဖမ်းဆီးခံရသူမှာ မအီမြို့၊ နယ်မြေရဲစခန်းမှူး ရဲအုပ်မင်းထွန်းဖြစ်ကြောင်း သိရသည်။

 သူသည် ယနေ့နိုဝင်ဘာ ၄ရက်၊ နံနက်  ၁၁နာရီကျော်အချိန်တွင် မအီ-အမ်းကားလမ်းမအနီးရှိ စံတွေးကျေးရွာ၌ အထွေထွေအုပ်ချုပ်ရေးဦးစီးဌာနမှ ပြုလုပ်သည့် ဌာနဆိုင်ရာ စုပေါင်း ဘုံကထိန် အလှူပွဲတွင် ထမင်းစားနေစဥ် ဖမ်းဆီးခံလိုက်ရခြင်းဖြစ်သည်ဟု သိရသည်။

"ဌာနဆိုင်ရာစုပေါင်းဘုံကထိန်မှာ သူက ထမင်း စားနေတာ။အေအေ တပ်ဖွဲ့ဝင်တွေက လာပြီး ဖမ်းသွားတယ်။ ဘာကြောင့်ဖမ်းလဲတော့မသိဘူး။ အရပ်ဝတ်နဲ့ မျက်နှာစွပ်နဲ့ လူ ၆ ယောက်ကဖမ်းတာ။ စခန်းမှူးက မလိုက်ဘူးငြင်းဆန်တယ်။ သေနတ်နဲ့ ဓားတွေလည်းပါတယ်။ နောက်တော့ ဖမ်းခေါ်သွားတယ်" ဟု ဒေသခံတစ်ဦးက ပြောသည်။

ဒေသခံများက ရဲစခန်းမှူးကို ဖမ်းဆီးခေါ်ဆောင်သွားသူများမှာ အေအေတပ်ဖွဲ့များဖြစ်သည်ဟု ပြောဆိုသော်လည်း အေအေ ပြောခွင့်ရသူ ဦးခိုင်သုခကို ဆက်သွယ်မေးမြန်းနေဆဲဖြစ်၍ နိရဉ္စရာသတင်းဌာန အနေဖြင့် အတည်ပြုနိုင်ခြင်းတော့ မရှိသေးပါ။

ရခိုင်တွင် စစ်ကောင်စီနှင့် ရက္ခိုင့်တပ်တော်(AA)တို့ အကြား တကျော့ပြန်တိုက်ပွဲများ ပြင်းထန်လာချိန်တွင် စစ်ကောင်စီ လက်အောက်ခံတချို့နှင့် ရဲတပ် ဖွဲ့ဝင် တချို့ကို ရက္ခိုင့်တပ်တော်(AA)က ဖမ်းဆီးမှုများရှိခဲ့သလို စစ်ကောင်စီတပ်ဖွဲ့ဝင်များကလည်း ရခိုင်ပြည်သူများကို AAနှင့် ဆက်စပ်သည်ဟုဆိုကာ သံသယဖြင့် အရပ်သားပြည်သူများ ဖမ်းဆီး တရားစွဲမှုများ ရှိနေသည်။ (NN-12)