ရခိုင်အဆိုတော် ဦးခိုင်ပြည်ကျော်ရုတ်တရက်ကွယ်လွန်

နိရဉ္စရာ၊ နိုဝင်ဘာ ၅/ ၂၀၂၂

ရခိုင်အဆိုတော် ဦးခိုင်ပြည်ကျော် (၅၀) နှစ်သည် အစာအိမ်သွေးကြောပေါက်၍ ယမန်နေ့ နိုဝင်ဘာလ ၄ရက်၊ ည ၉ နာရီ ၁၅မိနစ်ခန့်တွင် မင်းပြားဆေးရုံ၌ ကွယ်လွန်သွားသည်ဟု သိရသည်။

ဦးခိုင်ပြည်ကျော်သည် အောက်တိုဘာလကုန်ပိုင်းတွင် ရမ်းဗြဲကို အလုပ်ကိစ္စ တစ်ခုဖြင့်သွားရာ လမ်းခုလတ်မြောက်ဦးအရောက်တွင် အစာအိမ်ပေါက်၍ နိုဝင်ဘာလ ၃ရက်နေ့က မင်းပြားဆေးရုံသို့ ပို့ဆောင်ခဲ့ရပြီး ဆေးရုံတက်ရောက်ကုသနေချိန်တွင် ကွယ်လွန်သွားခြင်းဖြစ်ကြောင်း မိသားစုဝင်တစ်ဦးက သိရသည်။  

"အစာအိမ်သွေးကြောပေါက်ပြီး မနေ့ ညက ၉ နာရီကျော်ကျော်လောက်မှာ ကွယ်လွန်သွားပါတယ်။

သူကရမ်းဗြဲကိုကိစ္စတစ်ခုနဲ့သွားတာမှာ မြောက်ဦးကနေ  အစာအိမ်ပေါက်လို့ မင်းပြားဆေးရုံကို ချက်ချင်းတင်လိုက်ရတယ်။ ဆေးရုံမှာပဲ အသက်ဆုံးပါးသွားတာပါ" ဟု ၎င်းက ပြောသည်။

သူ့ဇနီးနှင့်မိသားစုဝင်များ ရန်ကုန်မှစစ်တွေသို့ လေယာဉ်ဖြင့်လိုက်လာခဲ့ပြီး စစ်တွေမှ မင်းပြားကို ချက်ချင်းလိုက်လာခဲ့ကြသဖြင့်ကိုခိုင်ပြည်ကျော်၏ အသက်မသေမီ တွေ့ဆုံခွင့်ရခဲ့ကြသည်ဟု သူက ပြောဆိုသည်။

ရခိုင်အဆိုတော် ကိုခိုင်ပြည်ကျော်သည် ရန်ကုန်တိုင်းဒေသကြီး၊ လှိုင်မြို့နယ်၊ (၇)ရပ်ကွက်၊ ကျောင်းကုန်း(၁)လမ်းတွင် မိသားစုနှင့်အတူနေထိုင်ပြီး ဇနီးဖြစ်သူနှင့် သား ၂ယောက် ကျန်ရစ်ခဲ့သည်ဟု သိရသည်။

သူ၏ နာရေးအား နိုဝင်ဘာလ ၆ ရက်နေ့၊ နေ့လယ် ၁ နာရီတွင် မင်းပြားမြို့မသုသာန်၌ ပြုလုပ် သင်္ဂြိုလ်သွားမည်ဟုလည်း သိရသည်။

ရခိုင်အဆိုတော် ဦးခိုင်ပြည်ကျော်သည် ရခိုင်မိုနိုတေးသံရှင်တစ်ဦးဖြစ်ပြီး သူဆိုထားခဲ့သည့် သီချင်းများအထဲတွင် ‘ရခိုင့်သဇင်ပန်းဘုရင်’၊ ‘ချစ်ခရီး’၊ ‘အမိသာခြင်းသံ’ သီချင်းများမှာ နာမည်ကြီးသည်။

ရခိုင်အဆိုတော်ကိုခိုင်ပြည်ကျော်သည် မင်းပြားမြို့နယ်၊ ကင်းဆိပ်ကျေးရွာဇာတိဖြစ်ပြီး မွေးချင်းခြောက်ယောက်အနက် ငါးယောက်မြောက်သားဖြစ်ကာ အမည်ရင်းမှာ ပြည်ကျော်အောင် ဖြစ်သည်ဟု သိရသည်။

 ( ဦးခိုင်ပြည်ကျော် ကွယ်လွန်သွားမှုအပေါ် မိသားစုနှင့် ထပ်တူဝမ်းနည်းကြောင်း နိရဉ္စရာသတင်းဌာနမှ ဖော်ပြအပ်ပါသည်။) (NN-12)