နိရဉ္စရာ၊ နိုဝင်ဘာ ၆/ ၂၀၂၂

၇ခိုင်ပြည် ကျောက်တော်မြို့နယ်နဂရာ ကျေးရွာတွင် နိုဝင်ဘာလ ၄ ရက်နေ့ညနေပိုင်းက စစ်ကောင်စီတပ်မှပစ်လိုက်သည့် လက်နက်ကြီးကျည် ကျရောက်ပေါက်ကွဲမှုကြောင့် လူနေအိမ် နှစ်လုံး မီးလောင်ပြာကျခဲ့ ကြောင်း သိရှိ၇သည်။

“ ရွာမီးလောင်တာတော့မဟုတ်ပါ။ သောကြာနေ့ည ၄ နာရီခန့်ကလက်နက်ကြီးကျည်ကျလို့ မီးလောင်သွားတာပါ။ အဲဒီနှစ်ဆောင်ဘဲမီးလောင်သွားတာပါ ဟိုနေ့က။ တခြားအိမ်တွေတော့မရှိဘူး။အရင်လောင်ထားတာ တွေတော့ ရှိတယ်” ဟု နဂရာကျေးရွာသားတစ်ယောက်ကပြောသည်။

မီးလောင်သွားသည့်နေအိမ်နှစ်ဆောင်မှာ နဂရာကျေးရွာမှ ဒေါ်မသိန်းနေအိမ်နှင့် ဒေါ်အေးခိုင်နေအိမ်တို့ဖြစ်ကြောင်း အဆိုပါကျေးရွာသားကပြောသည်။

နဂရာကျေးရွာကိုကျရောက်ပေါက်ကွဲခဲ့သည့် လက်နက်ကြီးကျည်မှာ ကျောက်တော်အခြေစိုက်စကခ (၉)မှ ပစ်လိုက်သည့် လက်နက်ကြီးကျည်ဖြစ်ကြောင်းလည်းအဆိုပါကျေးရွာသားက ပြောသည်။

လက်ရှိအချိန် နဂရာကျေးရွာတွင်ရွာစောင့်အနေဖြင့် လူအနည်းငယ်သာ ကျန်ရှိပြီး ရွာသား အားလုံးနီးပါးမှာ ကျောက်တော်အပါအဝင်တခြားကျေးရွာများသို့ ရွှေ့ပြောင်းသွားကြပြီ ဖြစ်ကြောင်းလည်း အဆိုပါ ၎င်းကပြောသည်။

“ ရွာမှာကလူတွေမရှိတော့ဘူး။ အရင်ကတည်းက ပြောင်းသွားကြပြီး။ အခုရွာမှာကကျွဲ၊နွားတွေကိုစောင့် ကြည့်ဖို့နဲ့ စပါးတွေကို ကျွဲတွေ နွားတွေမစား၇အောင် စောင့်နေကြတဲ့ လူ ၆ယောက်ခန့်သာရှိတယ်။ ရွာ စောင့်သဘော ကျန်နေကြတာ” ဟုဆိုသည်။

နိုဝင်ဘာလ ၄ရက်နေ့ နံနက် ၁၀ နာရီခန့်တွင် စစ်တွေဘက်မှတက်လာသည့် စစ်ကောင်စီဇက်ရေယာဉ် ၂စီးကို ရက္ခိုင့်တပ်တော်မှ တိုက်ခိုက်ခဲ့သည့်အတွက် ဇက်ရေယာဉ် ၂ စီးအပါအဝင်ကျောက်တော် အခြေစိုက်စစ်ကောင်စီတပ်များက လက်နက်ကြီးများဖြင့် တနေကုန်လူနေကျေးရွာများကို ပစ်ခတ်ခဲ့ကြောင်း ဒေသခံ များက ပြောသည်။

ယင်းပစ်ခတ်မှုကြောင်း ရွှေပြည်သစ်မှ၈ နှစ်အရွယ်ကလေးတစ်ဦးအပါအဝင် သက်ကြီးပိုင်းတစ်ဦးနှင့် ဝက်မှိုင်း ကျေးရွာကအမျိုးသမီးတစ်ဦးတို့ သေဆုံးခဲ့ပြီး ရွာပေါင်း ရ ရွာမှ  လူပေါင်း၂၀ နီးပါးလည်းထိခိုက်ဒဏ်ရာ ရရှိခဲ့သည်။

စက်တင်ဘာ၂၅ ရက် ည ၁၁ နာရီကျော်အချိန်တွင် စစ်ကောင်စီစကခ (၉)က ပစ်ခတ်သော လက်နက်ကြီးကျည်သည် နာဂရာရွာထဲရှိ ဦးရွှေသန်းမောင်၏နေအိမ်ကို ကျရောက်ပေါက်ကွဲပြီးဦကျော်မောင်၏ သားဖြစ်သူမောင်ကိုနိုင်(ခ) မောင်ကြီး(၇ နှစ်)သည် သေဆုံးသွားခဲ့သည်။

စက်တင်ဘာလ ၂၀ရက်နေ့ညနေ့ပိုင်းအချိန်တွင်လည်း ကျောက်တော် အ ခြေစိုက် စကခ (၉)မှ ပစ်လိုက်သည့် လက်နက်ကြီးကျည် နဂရာကျေးရွာထဲ ကျရောက်ပေါက်ကွဲခဲ့သည့်အတွက်ရွာသား ၄ ဦးဒဏ်ရာ ရရှိခဲ့ပြီး နေအိမ်တချို့လည်း ပျက်စီးခဲ့သည်။

လက်နက်ကြီးကျည်များအကြာခဏ ကျရောက်ပေါက်ကွဲမှုများရှိနေသည့်အတွက် နဂရာကျေးရွာသားများမှာကျောက်တော်အပါအဝင် တခြားအနီးအနားမှကျေးရွာများသို့ ပြောင်းရွှေ့သွားကြပြီးတချို့မှာလည်း စစ်ဘေးရှောင်စခန်းများကို ပြောင်းရွှေ့သွားကြကြောင်းသိရှိ၇သည်။