နိရဉ္စရာ၊
နိုဝင်ဘာ ၆/၂၀၂၂
ရခိုင်ပြည်နယ်၊
မြောက်ဦးမြို့၊
ညောင်ပင်စျေးရပ်ကွက်ရှိ စစ်ဘေးရှောင်
၁၀၀၀ ကျော်ရှိသည့် မြတန်းဆောင်စစ်ဘေးရှောင်စခန်းတွင် စားနပ်ရိက္ခာကူညီထောက်ပံ့မှုမရ၍ ဆန်အပါအဝင်ရိက္ခာများပြတ်လပ်နေကာ၊ ထမင်းငတ်နေသူများလည်းရှိနေပြီဟု
သတင်းရရှိသည်။
"အခြေအနေကတော့
တစ်ချို့ငတ်ကြတယ်။ အားလုံးကအဆင်မပြေဘူး။ သုံးလေးငါးထပ် ငတ်တဲ့သူတွေလည်းရှိတယ်။
တစ်နပ်စာကို တစ်ရက်စာလုပ်ပြီး
စားသောက်နေကြတဲ့ သူတွေလည်း
ရှိတယ်။
သားသမီးတွေကိုကျွေးပြီး မိဘတွေက အငတ်ခံနေကြတာတွေလည်းရှိတယ်" ဟု မြတန်းဆောင်စစ်ဘေးရှောင်စခန်းတာဝန်ခံတစ်ဦးက
ပြောသည်။
စစ်ဘေးရှောင်များမှာ
နိုင်ငံတကာလူမှုအဖွဲ့အစည်းများ၊ လူမှုကူညီရေးအဖွဲ့အစည်းများနှင့် အလှူရှင်များ၏ ကူညီထောက်ပံ့ကြသည့် စားနပ်ရိက္ခာများကို
မှီခိုရပ်တည်နေကြသူများဖြစ်ကြပြီး စစ်ကောင်စီက စားနပ်ရိက္ခာကူညီထောက်ပံ့ပေးမှုကိုတားမြစ်ထား၍ ယခုလို အငတ်ဘေး
ကျရောက်နေကြရသည်ဟု သိရသည်။
ယင်းအပြင်း မြောက်ဦးမြို့ပေါ်တွင် မထင်ရင်မထင်သလို ဖမ်းဆီးမှုများလည်းရှိသည့်အတွက်
စစ်ဘေးရှောင်များမှာ အပြင်ထွက်ပြီးအလုပ်လုပ်ရန်အဆင်မပြေခြင်း၊ အလုပ်အကိုင်ရှားပါးခြင်းနှင့် အတူ ကုန်စျေးနူန်းလည်း အဆမတန်မြင့်တက်လာခြင်းတို့ကြောင့် ဝင်ငွေမရှိ၊
စားနပ်ရိက္ခာများပြတ်ကာ ခက်ခဲငတ်ပြတ်နေကြခြင်းဖြစ်သည်ဟုလည်း စခန်းတွင် ခိုလှုံနေသူ တစ်ဦးက ပြောသည်။
"ငတ်နေကြတာတော့
မကြာသေးဘူး။ တစ်ရက် နှစ်ရက်လောက်ရှိနေပြီ။ လက်ရှိမှာ မရှိတဲ့သူက
ရှိတဲ့သူဆီကချေးယူပုံစံမျိုးလုပ်နေကြတယ်။ မေတ္တာရပ်ခံချင်တာကတော့ အန်ဂျီအိုတွေ၊ နိုင်ငံတကာ INGO တွေကို မတားဆီးဖို့။
လူသားချင်းဆိုင်ရာကူညီထောက်ပံ့မှုတွေပေးဖို့ တောင်းဆိုချင်တယ်။ အန်ဂျီအိုတွေ၊ လူမှုအဖွဲ့အစည်းတွေကို ရပ်ဆိုင်းထားတဲ့အတွက် တကယ်တန်းခံရတာက စစ်ဘေးရှောင်တွေပါ။
ဒါကြောင့်မလို့ စစ်ဘေးရှောင်တွေကိုကူညီထောက်ပံ့တာတွေကို ရပ်ဆိုင်းထားတာတွေ
မလုပ်ဖို့ တောင်းဆိုချင်တယ်" ဟု စခန်းတာ ဝန်ခံကပြောသည်။
မြောက်ဦးမြို့တွင်လုံခြုံရေးတင်းကျပ်ကာ ကား၊ သုံးဘီး၊
ဘေးတွဲဆိုင်ကယ်များကို
တင်းတင်းကျပ်ကျပ် စစ်ဆေးနေသဖြင့် လူအသွားအလာနည်းကာ လူတိုင်းလိုလို
စီးပွားရေးကျပ်တည်းနေပြီး ယင်းအထဲတွင် အများပြည်သူများ၏ ထောက်ပံ့မှုဖြင့် အသက်ရှင်ရပ်နေကြရသည့်
စစ်ဘေးရှောင်များ၏ ဘ၀အခြေအနေမှာ ပိုမိုဆိုးရွားနေသည်ဟု သိရသည်။
မြောက်ဦးမြတန်းဆောင် စစ်ဘေးရှောင်စခန်းတွင်
အိမ်ထောင်စု ၂၈၂စု၊ ကျား ၅၂၀ ယောက်နှင့် မ ၆၃၇ ယောက်ရှိကာ
စုစုပေါင်းလူဦးရေ ၁၁၅၇ ယောက်ရှိပြီး စခန်းကို
ထူထောင်ထားသည့် မြတန်ဆောင်းဆရာတော်ကိုလည်း စစ်ကောင်စီတပ်က ဖမ်းဆီးရန်လာရှာသဖြင့် တိမ်းရှောင်နေရသည်ဟုလည်း သိရသည်။
စစ်ကောင်စီသည် ရခိုင်ပြည်တွင် လူသားချင်း စာနာမှုအကူအညီပေးမှုများ
ထောက်ပံ့ကူညီမူကို တားမြစ်ပိတ်ပင်ထားသဖြင့် ရခိုင်ရှိ စစ်ဘေးရှောင်စခန်း အားလုံးနီးပါးတွင်
စားနပ်ရိက္ခာများ
ပြတ်လပ်နေကာ
အခက်အခဲဖြစ်လျှက်ရှိနေကြောင်း သိရသည်။(NN-12)