စစ်တွေတွင်ပစ်ခတ်မှုဖြစ်ပွားပြီးနောက် စစ်ရှောင်တစ်ဦး ဖမ်းဆီးခံရ

နိရဉ္စရာ၊ နိုဝင်ဘာ ၇/၂၀၂၂

ရခိုင်ပြည်နယ်မြို့တော် စစ်တွေမြို့တွင် ယမန်နေ့ညက ပြည်နယ်ငါးလုပ်ငန်း ဦးစီးမှူး သေနတ်ပစ်ခတ်မှုဖြစ်ပွားပြီးနောက် စစ်ရှောင်တစ်ဦး ဖမ်းဆီးခံရကြောင်း သတင်းရရှိသည်။

ယနေ့ နိုဝင်ဘာ ၇ ရက် နံနက်အာရုဏ် ၃ နာရီအချိန်တွင် စစ်တွေမြို့ ဗုဒ္ဓေါမော်ဘုန်းတော်ကြီးကျောင်း စစ်ဘေးရှောင်စခန်းမှ စစ်ဘေးရှောင်တစ်ဦးကို စစ်ကောင်စီတပ်သားများက ဝင်ရောက်ဖမ်းဆီးသွားကြောင်း မိသားစုဝင်များက ပြောသည်။

"ညက ကျောင်းထဲဝင်ပြီး သူတို့ရှိနေတာမသိဘဲ ပုံမှန်ပဲ အပေါ့အပါးသွားဖို့ ဆင်းသွားတာကို ဖမ်းသွားတာပါ"ဟု ပြောသည်။

ဖမ်းဆီးခံရသူမှာ ကျောက်တော်မြို့နယ်၊ ပြိုင်းတိုင်းရွာမှ စစ်ရှောင်နေသည့် ဦးဌေးနိုင်(၃၈ နှစ်) ဖြစ်သည်။

စစ်ကောင်စီတပ်သားများသည် ညဉ့်အချိန် ဘုန်းကြီးကျောင်းအုတ်တံတိုင်းကို ကျော်ဝင်ကာ ယခုကဲ့သို့ အပြစ်မဲ့စစ်ဘေးရှောင်ဒုက္ခသည်အား ဖမ်းဆီးခြင်းမှာ မဖြစ်သင့်ဘဲ အမြန်ဆုံးပြန်လွှတ်ပေးရန် ဗုဒ္ဓေါမော်ဆရာတော် မပါအဝင် မိသားစုဝင်များနှင့် စစ်ဘေးရှောင်များက တောင်းဆိုသည်။

"ဘာမှဘုမသိ ဘမသိ အဖမ်းခံလိုက်ရတာပါ။ အခုဘယ်မှာ ဖမ်းထားလဲလည်းမသိဘူး။ မြို့နယ်အုပ်ချုပ်ရေးမှူးကိုဖုန်းဆက်ထားတော့ တပည့်တော်စုံစမ်းပေးမယ်လို့ ပြောတယ်။ လောလောဆယ် အခြေအနေတော့ မသိရသေးဘူး။ ပြန်တော့လွှတ်ပေးစေချင်တယ်။ ဘာမှအပြစ်အနာအဆာလည်းရှိတာလည်းမဟုတ် တွေ့တဲ့လူ၊ မြင်တဲ့လူကို ဖမ်းသွားလို့တော့ ဘယ်အဆင်ပြေမလဲ"ဟု ဗုဒ္ဓေါမော်ဆရာတော်က မိန့်သည်။

ဗုဒ္ဓေါမော်ဘုန်းတော်ကြီးကျောင်းတွင် စစ်ဘေးရှောင်အိမ်ထောင်စု (၁၀၇)စု၊ လူဦးရေ (၄၀၀) ကျော်ရှိကြောင်း သိရသည်။

ယနေ့ နိုဝင်ဘာ ၆ ရက်၊ ညနေ ၇ နာရီ ၃၀မိနစ်တွင် စစ်တွေမြို့ ရှုခင်းသာလမ်း၊ RV စားသောက်ဆိုင်ထဲတွင် ပြည်နယ် ငါးလုပ်ငန်းဦးစီးမှူး ဦးသက်ဦး(၆၀) (ဘ) ဦးတင်ရွှေ ကို အမည်မသိသူ နှစ်ဦးမှ ဆိုင်ကယ်ဖြင့်လာပြီး သေနတ်ဖြင့် ပစ်ခတ်သွားသဖြင့် ဒဏ်ရာ လေးချက်ရရှိကာ ဆေးရုံတင်ခဲ့ရသည်။

၎င်းအခင်းဖြစ်ပွားပြီးနောက် စစ်ဘေးရှောင်တစ်ဦးကို ဖမ်းဆီးသွားခြင်းဖြစ်သည်။ (NN-7)