စစ်တွေတွင် ဓားဒဏ်ရာဖြင့်သေဆုံးနေသည့် လူသေလောင်းထပ်တွေ့ရှိ

နိရဉ္စရာ၊ နိုဝင်ဘာ ၇/၂၀၂၂

ရခိုင်ပြည်နယ်မြို့တော် စစ်တွေမြို့တွင် ပစ်ခတ်မှုဖြစ်ပွားပြီးနောက် ဓားဒဏ်ရာ (၅) ချက်ဖြင့် သေဆုံးနေသည့် လူသေလောင်း တစ်လောင်းကို တွေ့ရှိခဲ့ကြောင်း သတင်းရရှိသည်။

ယနေ့ နိုဝင်ဘာ (၇) ရက် နံနက်အာရုဏ် ၁ နာရီခွဲခန့်တွင် စစ်တွေမြို့ ကျောင်းတက်လမ်းရပ်ကွက်မှ ပြည်တော်ပြန်ကျောင်းအတွင်းတွင် ဓားဒဏ်ရာများဖြင့် သေဆုံးနေသည့် အလောင်း တစ်လောင်းကို တွေ့ရှိခဲ့ရကြောင်း ရွှေရောင်မေတ္တာနာရေးကူညီမှုအသင်းဥက္ကဋ္ဌ ဦးမင်းထည်ဝါက ပြောသည်

"သူက အပြင်ကဖြစ်လာပြီး ပြည်တော်ပြန်ကျောင်းခြံကိုဝင်လာပြီး သေတာပါ။ သူကဘယ်ကလဲ။ ဘယ်သူလဲလည်း မသိရသေးဘူး။ ဓားဒဏ်ရာငါးချက်နဲ့ သေနေတာပါ။ အကိုတို့အဖွဲ့ကကားနဲ့ ရင်ခွဲရုံကို ပို့ပေးခဲ့ပါတယ်"ဟု ပြောသည်။

လက်ရှိမှာ သေဆုံးသူမှာ အသက် ၂၀ ကျော် ၃၀ ဝန်းကျင်အရွယ်ဖြစ်ပြီး အမည် နှင့် နေရပ်စသည့် အချက်အလက်တို့ကိုလည်း မသိရှိရသေးကြောင်း သူကပြောသည်။

ယမန်နေ့ည ၇ နာရီခွဲတွင် စစ်တွေမြို့  RV စားသောက်ဆိုင်ထဲတွင် ပြည်နယ် ငါးလုပ်ငန်းဦးစီးမှူး ဦးသက်ဦးကို အမည်မသိသူနှစ်ဦးမှ ဆိုင်ကယ်ဖြင့်လာပြီး သေနတ်ဖြင့် ပစ်ခတ်မှုဖြစ်ပွားခဲ့ပြီး စစ်တွေမြို့တွင် အခြေအနေရှုပ်ထွေးမှုနှင့် အတူ ယခုလို သေဆုံးမှု၊ ဖမ်းဆီးမှုများလည်း ဖြစ်ပေါ်နေကြောင်း သိရသည်။

လက်ရှိလူသေဆုံးမှုမှာ အဆိုပါ ပစ်ခတ်မှုနှင့် သက်ဆိုင်မှု ရှိ /မရှိ မသိရသေးကြောင်း  ဒေသခံများက ပြောသည်။

နိုဝင်ဘာ (၃) ရက်နေ့က မင်းပြားမြို့တွင်လည်း ဒဏ်ရာဒဏ်ချက်များဖြင့် သေဆုံးနေသည့် ရုပ်အလောင်းတစ်ခုတွေ့ရှိခဲ့ရပြီး နိုဝင်ဘာ (၆) ရက်နေ့ကလည်း ပုဏ္ဏားကျွန်းမြို့နယ်၊ အောင်မြေကုန်း ကျေးရွာအနီးရှိ ချောင်းအတွင်းမှ တက္ကသိုလ်ကျောင်းသားတစ်ဦး၏ ရုပ်အလောင်းကို ဓားဒဏ်ရာများဖြင့် သေဆုံးကာ တွေ့ရှိခဲ့သည်။(NN-7)