နိရဥ္စရာ၊နိုဝင်ဘာ ၈/၂၀၂၂

၇ခိုင်ပြည်နယ်မင်းပြားမြို့နယ်တွင် ယနေ့နံနက်က စစ်ဇက်ရေယာဥ်၂ စီးကို ရက္ခိုင့်တပ်တော်(AA)ကကြားဖြတ်တိုက်ခိုက်ခဲ့ပြီးနောက် မိနစ် ၄၀ ခန့်ကြာ အပြန်အလှန် ပစ်ခတ်မှုဖြစ်ပွားခဲ့သည်ဟုဒေသခံများက ပြောသည်။

မင်းပြားမြို့နယ်ခေါင်းလောင်းချောင်းကျေးရွာ ရဲစခန်းအနီး မြစ်ကွေ့တွင်တက်လာသည့် စစ်ဇက်ရေယာဥ် ၂ စီးကိုရက္ခိုင့်တပ်တော်(AA)တပ်ဖွဲ့ဝင်များကယနေ့ နိုဝင်ဘာလ ၈ ရက် နံနက် ၉ နာရီခန့်တွင် ကြားဖြတ်တိုက်ခိုက်ခဲ့ခြင်းဖြစ်သည်ဟုဒေသခံများက ပြောသည်။

ယင်းတိုက်တိုက်ခိုက်ခဲ့ပြီးနောက်စစ်ဇက်ရေယာဥ်များနှင့် AA တို့အပြန်အလှန်ပစ်ခတ်မှုများ ဖြစ်ပွားခဲ့ပြီးခဏအကြာတွင် စစ်ရဟတ်ယာဥ်တစ်စီးကပါလာရောက်၍ စစ်ကူပစ်ခဲ့ကြောင်း ဒေသခံများက ပြောသည်။

ဒေသခံတစ်ဦးက"အပြန်အလှန် မိနစ် ၄၀ လောက်ဖြစ်ခဲ့ကြပါတယ်။ စစ်ရဟတ်ယာဥ်လည်း ခဏလေးအတွင်းမှာရောက်လာပြီး ပစ်တယ်"ဟု ပြောသည်။

အပြန်အလှန်ပစ်ခတ်ပြီးနောက်၁၀ နာရီခွဲခန့်တွင် ယခုဖြစ်ပွားခဲ့သည့်နေရာအနီးတဝိုက်ကိုမင်းပြားရှိတပ်ရင်းဘက်က လက်နက်ကြီးများဖြင့် လှမ်း၍ပစ်ခတ်နေသည်ဟုလည်း ဒေသခံများကဆိုသည်။

အဆိုပါ တိုက်ပွဲနှင့် ပတ်သက်ပြီး အထိအခိုက်များလောလောဆယ်မရှိသေးဟုလည်း ဆိုသည်။

မင်းပြားမြို့နယ်ခေါင်းလောင်းချောင်းရွာအနီးတွင် ပြီးခဲ့သည့် စက်တင်ဘာလ ၂၆ ရက် နံနက်ကလည်းစစ်တွေဘက်မှလာသည့် စစ်တပ်ဇက်ရေယာဉ်၂ စီးကို ရက္ခိုင့်တပ်တော်(AA)က လက်နက်ကြီးနှင့်ပစ်ခတ်ပြီးနောက်ဇက်ရေယာဉ်နှင့် စစ်၇ဟတ်ယာဉ်တို့ကပါအနီးအနားကျေးရွာများကို လက်နက်ကြီး၊ လက်နက်ငယ်များဖြင့် ဦးတည်ပစ်ခတ်မှုများပြုလုပ်ခဲ့သည်ဟုသိ၇သည်။

ယင်းသို့ပစ်ခတ်ခဲ့၍ ကိုယ်ဝန်ဆောင်အမျိုးသမီး ၁ ဦး၊ ကလေးငယ် ၁ ဦးနှင့် လူငယ်တစ်ဦးတို့ထိခိုက်ဒဏ်ရာရရှိသွားခဲ့ပြီး လူနေအိမ်အချို့လည်းထိခိုက်ပျက်စီးမှုရှိခဲ့သည်ဟု သိ၇သည်။