ကျောက်တော် စကခ(၉) စစ်ဆေးရေးဂိတ်တွင် အပျော်တမ်းဓာတ်ပုံဆရာတစ်ဦးပျောက်ဆုံးနေ

နိရဉ္စရာ၊ နိုဝင်ဘာ ၉/၂၀၂၂

ရခိုင်ပြည်နယ်၊ ကျောက်တော် စကခ(၉) ဌာနချုပ် စစ်ဆေးရေးဂိတ်တွင် ယမန်နေ့ နိုဝင်ဘာလ ၈ ရက်က မင်းပြားမြို့မှ အပျော်တမ်းဓာတ်ပုံဆရာတစ်ဦး ပျောက်ဆုံးသွားကြောင်း သိရသည်။

ပျောက်ဆုံးနေသည့် အပျော်တမ်းဓာတ်ပုံဆရာမှာ မင်းပြားမြို့ဇာတိဖြစ်ပြီး လက်ရှိ စစ်တွေမြို့တွင်နေထိုင်သူ ဦးစောမိုးကျော် (၅၃)နှစ် ဖြစ်ပြီး ၎င်းသည် ခရီးသည်များအား မှတ်ပုံတင် စစ်ဆေးနေစဉ်အတွင်း ပျောက်ဆုံးသွားသည်ဟု သိရသည်။

ယာဉ်လိုင်းပြေးဆွဲနေသည့် ကားသမားတစ်ဦးက "တပ်မဂိတ်မှာက ကားတွေအားလုံးကို တန့်ခိုင်းထားတယ်။ ခရီးသည်တွေက လမ်းဆင်းလျှောက်ရတယ်။ အဲဒီအချိန် သူစီးတဲ့ကားက ထွက်ရတာ နောက်ကျတယ်၊ ခရီးသည်တွေက အရင်ဂိတ်ကိုကျော်ပြီးရောက်နေပြီ။ အဲဒီကိုရောက်တော့ လူတွေတက်တက်၊ ခရီးသည်တွေစုံပြီလားဆိုပြီတော့ အဲအချိန်သူနဲ့ အတူပါလာတဲ့မိန်းကလေးတစ်ယောက်က ခရီးသည်တစ်ယောက်မရောက်သေးဘူးပြောတယ်။ အဲတော့ဖုန်းဆက်ကြည့်ကြတယ်၊ ဖုန်းလည်းဆက်မရဘူး။ အဲဒီတော့ ဆက်ပြီး စစ်နေသေးလားမသိဘူးဆိုပြီး ထပ်စောင့်နေသေးတယ်။ ဂိတ်ကိုကြည့်လိုက်တော့လည်း လူတစ်ယောက်မှမရှိတော့ဘူး။ အဲတော့ ဂိတ်ကိုသွားပြီးမေးကြည့်တယ်။ ခရီးသည် တစ်ယောက်ပျောက်နေတယ်ဆိုပြီး သူတို့ကတော့ ဒီမှာတစ်ယောက်မှမရှိတော့ဘူး ကားမှားပြီးတက်သွားတာနေမှာပေါ့လို့ပြောတယ်" ဟုပြောသည်။

၎င်းဦးစောမိုးကျော်သည် ယမန်နေ့နိုဝင်ဘာလ ၈ ရက်၊ နံနက် ၉ နာရီခန့်က မင်းပြားမြို့မှ စစ်တွေမြို့သို့ အငှါးယာဉ်လိုင်းဖြင့် သွားရာတွင် ကျောက်တော်မြို့ရှိ တပ်မစစ်ဆေးရေး ဂိတ်တွင် ခရီးသည်များ၏မှတ်ပုံတင်များနှင့် ဖုန်းများကို စစ်ကောင်စီတပ်သားများက စစ်ဆေးနေသည့်အချိန်တွင် ပျောက်ဆုံးသွားခြင်းဖြစ်သဖြင့် စိုးရိမ်စရာဖြစ်နေသည်ဟုဆိုသည်။

ထို့နောက်တွင် ၎င်းဦးစောမိုးကျော်နှင့်အတူ ကားပေါ်တွင်လိုက်ပါလာသည့် ခရီးသည်များနှင့် ယာဉ်မောင်းတို့ကလည်း လမ်းတစ်လျှောက်ရှိ ယာဉ်များရပ်နားရာနေရာများတွင်လည်း လိုက်လံရှာဖွေမှုများပြုလုပ်ခဲ့သော်လည်း မတွေ့ရှိကြောင်း သိရသည်။

၎င်းဓါတ်ပုံဆရာ ကျောက်တော်တပ်မစစ်ဆေးရေးဂိတ်တွင် စစ်ဆေးရေးခံနေစဉ်အတွင်း ယခုလိုပျောက်ဆုံးမှုမှာ စစ်တပ်မှ ဖမ်းဆီးထားခြင်းဖြစ်နိုင်သည်ဟုလည်း ထင်မှတ်မိကြောင်း ၎င်းနှင့်နီးစပ်သူတစ်ဦးကပြောသည်။

"ကျနော်တို့ မနေ့က အဲဒီကိုလိုက်သွားပြီး မေးကြည့်ခဲ့ပါတယ်။ သူတို့ကတော့ ဖမ်းဆီး ထားတာမရှိဘူးလို့ ပြန်ပြောတယ်။ သူတို့(တပ်မဂိတ်မှစစ်ကောင်စီတပ်သားများ) ကတော့ ဓာတ်ပုံတွေဘာတွေတောင်းတယ်၊ တွေ့ရင်ဆက်သွယ်ပေးမယ်ပြောတယ်။ ဒါပေမယ့် အဲဒီနားတဝိုက်လေးမှာပဲ ပျောက်သွားတာလေ။ သတင်းကြားကြားချင်း သူ့ကိုဖုန်းဆက်တော့ ဖုန်းဝင်သေးတယ်၊ မကိုင်ဘူး။ နောက်ထပ်ဆက်ကြည့်တော့ ဖုန်းဝင်တာကို ပြန်ချပစ်တယ်။ ညနေ ပြန်ဆက်ကြည့်တော့ ဖုန်းကစက်ပိတ်ထားလိုက်ပါပြီ။ အဲဒီမှာပဲ အဖမ်းခံလိုက်ရတာလို့ ထင်ပါတယ်။ အဲဒါပဲ ဖြစ်ဖို့ပိုများပါတယ်။ သူနဲ့တူတူပါသွားတဲ့ မိန်းကလေးကတော့ မှတ်ပုံ တင်စစ်နေတဲ့အချိန်အထိ မြင်ခဲ့တယ်လို့ပြောတယ်။ အဲဒီမိန်းကလေးက အရင်စစ်လို့ ပြီးသွားတော့ ပြန်မလှည့်ဖြစ်ခဲ့ဘူးလို့ပြောတယ်။ အဲဒီအချိန်မှာပျောက်သွားတာပါ" ဟုပြောသည်။

၎င်းပျောက်ဆုံးနေမှုနှင့်ပတ်သက်၍လည်း မိသားစုမှာ စိုးရိမ်ပူပန်နေရပြီး အမြန်ဆုံး ပြန်တွေ့စေလိုကြောင်း ပြောသည်။

၎င်းဦးစောမိုးကျော်သည် အပျော်တမ်းအဖြစ် ဓာတ်ပုံများရိုက်၍ ၎င်း၏ လူမှုကွန်ရက် စာမျက်နှာတွင် တင်လေ့ရှိသူဖြစ်ကြောင်းသိရသည်။

လက်ရှိအချိန်အထိ ၎င်းပျောက်ဆုံးနေမှုနှင့်ပတ်သက်၍ သတင်းအစအန တစ်စုံတစ်ရာ မကြားရသေးကြောင်း သိရသည်။

အဆိုပါကျောက်တော်တပ်မစစ်ဆေးရေးဂိတ်တွင် ပြီးခဲ့သည့်လပိုင်းမှစတင်ကာ ခရီးသည်တင်ကားများနှင့် ကုန်ကားများကို အစစ်အဆေးတင်းကျပ်စွာ စစ်ဆေးလေ့ရှိပြီး ခရီးသည်များ၏မှတ်ပုံတင်များနှင့်ဖုန်းများကိုလည်း စစ်လေ့ရှိကာ အချိန်ကြာမြင့်စွာ စစ်ဆေးမှုများပြုလုပ်လေ့ရှိသဖြင့် ခရီးသည်များနှင့်ကားသမားများတွင် အချိန်ကြန့်ကြာမှုများ ဖြစ်ရကြောင်း ခရီးသွားများကပြောသည်။

(NN-8)