စစ်တွေအဝင်အထွက် ကျောက်တန်းစစ်ဆေးရေးဂိတ်တွင် အချိန်ကြာကြီးစစ်ဆေးပြုလုပ်ရာမှ ကားများပိတ်မိနေ

နိရဉ္စရာ၊ နိုဝင်ဘာ ၉/၂၀၂၂

ရခိုင်ပြည်နယ်၊ စစ်တွေမြို့ အဝင်အထွက် ကျောက်တန်းစစ်ဆေးရေး ဂိတ်တွင် စစ်ဆေးမှုကို အချိန်ကြာကြီးပြုလုပ်နေသဖြင့် ကုန်ကားများနှင့် ခရီးသည်တင်ကားများမှာ တန်းစီပိတ်မိနေသည်ဟု သတင်းရရှိသည်။

ကျောက်တန်းဂိတ်၏ တစ်ဖက်တစ်ချက်တွင် ရန်ကုန်အပါအဝင် ရခိုင်နယ်မြို့များမှ စစ်တွေမြို့သို့ လာသောကားများနှင့်  စစ်တွေမှ ရန်ကုန်အပါအဝင် နယ်မြို့များသို့ သွားလာသည့် ခရီးသည်တင်ကားများ၊ ကုန်တင်ကားများအားလုံး ပိတ်မိနေခြင်းဖြစ်ကြောင်း ကားသမားတစ်ဦးက ပြောသည်။

"ကျွန်တော်တို့က မနေ့က နိုဝင်ဘာ ၈ ရက်  ညနေ ၄ နာရီလောက်ကနေ ဒီကျောက်တန်းကို ရောက်နေတာ။ အဲ့တာ သူတို့ကဖြတ်သွားခွင့်မပြုပဲ စစ်ဆေးနေလို့ ကားတွေလည်း ရပ်ပြီး ဒီအတိုင်းနေနေရတယ်။ ပိတ်မိလို့ရပ်ထားရတဲ့ကားတွေကလည်း ကားယာဥ်တန်း တစ်ခုလိုဖြစ်နေတယ်" ဟု ၎င်းပြောသည်။

ထိုသို့စစ်ဆေးနေသဖြင့် ဂိတ်တစ်ဖက် တစ်ချက်တွင် ပိတ်မိနေသော အိမ်စီးကားများ၊ ခရီးသည်တင်ကားများနှင့် ကုန်ကားများမှာ ယာဥ်တန်းတစ်ခုလိုဖြစ်နေသည်ဟုလည်း သူက ပြောဆိုသည်။

ကုန်ကားများနှင့် ခရီးသည်တင်ကားများကို ယာဥ်လိုင်စင်၊ မောင်းနှင်သူလိုင်စင်နှင့် ကားပေါ်တွင်တင်ယူလာသည့် ကုန်များ၊ ခရီးသည်များကိုလည်းစာရင်းယူကာ စစ်ဆေးသည့် နေရာသို့သွားရောက် စာရင်းပေးထားရကာ ခွင့်ပြုချက်ရမှ သွားခွင့်ပြုမည်ဟုသိရသည်။

"ကားလိုင်စင်၊ မောင်းသူလိုင်စင်နဲ့ နာမည်တွေ။ကုန်တွေကိုပါ သူတို့ဆီကို စာရင်းတင်ထားရတယ်။ သူတို့ဆီကခွင့်ပြုချက်ရမှပဲ သွားရမယ်။ သူတို့ကသွားလို့ရပြီဆိုမှ သွားရမှာ။ ဒါပေမဲ့ ပိတ်မိနေတဲ့ ကားတွေက အရမ်းများတော့ ဘယ်အချိန်မှ သွားခွင့်ရမယ်မသိဘူး။ မနေ့ကဆို သူတို့က ကားပေါ်တက်ပြီး တင်ယူလာတဲ့ ကုန်တွေကိုပါ စစ်ဆေးတဲ့အဆင့်ထိရှိတယ်" ဟု ကားမောင်းသူ

တစ်ဦးက ပြောသည်။

အဆိုပါစစ်ဆေးရေးဂိတ်တွင် ဆိုင်ကယ်များ၊တစ်မြို့နယ်မှ တစ်မြို့နယ်သို့ ဒေသအတွင်းသွားလာ

နေသည်ကားများကို သွားလာခွင့်ပြုပြီး ကုန်ကားများနှင့် ခရီးသည်တင်ကားများကိုသာ စစ်ဆေးနေခြင်းဖြစ်သော်လည်း စစ်ဆေးချိန်ကြာမြင့်၍ ပိတ်မိနေခြင်းဖြစ်ကြောင်း သိရသည်။

ထိုသို့စစ်ဆေးနေ၍ ကားပေါ်တွင်တင်ယူလာသည့် ကုန်များမှာ ကုန်စိမ်းများဖြစ်လျှင် အချိန်မီ မရောက်ရှိ၍ ပျက်စီးနိုင်သည့်အခြေအနေရှိသည်ဟုလည်း သိရသည်။

ယင်းအပြင် ပိတ်မိနေသည့်ကုန်ကားများနှင့် ခရီးသည်တင်ကား တစ်ချို့မှာ ကျောက်တော်တပ်မ

စစ်ဆေးရေးဂိတ်၌လည်းတစ်ကြိမ် စစ်ဆေးခံခဲ့ရသည်ဟုလည်းသိရသည်။

"ကုန်တွေကတော့ စားသုံးကုန် ကုန်ခြောက်တွေဆိုရင်တော့အချိန်ကြန့်ကြာနေလည်း ပျက်စီးတာတော့ မရှိဘူး။ ကုန်းစိမ်းတွေဖြစ်တဲ့ ငါးတို့ ကြက်သွန်နီတို့၊ ငရုတ်သီးစိမ်းတို့ တင်ယူလာတဲ့ကားတွေဆို ကုန်တွေပျက်စီးနိုင်တယ်။  ကားသမားတွေလည်း စားရေးသောက်ရေး။ နေရေးထိုင်ရေးက အစ အခက်အခဲဖြစ်နေတယ်။ ပြီးတော့ ကျောက်တော်တပ်မဂိတ်မှာလည်း ကျွန်တော်တို့တစ် ကြိမ်စစ်ဆေးခံခဲ့ရပြီ။ အချိန်တွေကြန့်ကြာနေတော့ ကုန်တွေပျက်စီးမှာ စိုးရိမ်နေရတယ်" ဟု ကားသမားတစ်ဦးပြောသည်။

စစ်တွေတွင် ပြီးခဲ့သည့်နိုဝင်ဘာလ ၆ရက်၊ ညနေ ၇နာရီကျော်အချိန်က စစ်တွေမြို့၊ ပြည်တော်သာရပ်ကွက်တွင်နေထိုင်သူ ပြည်နယ်ငါးလုပ်ငန်းဦးစီးမှူး ဦးသက်ဦး သေနတ်ဖြင့် ပစ်ခတ်ခံရမှုဖြစ်ပွားပြီးနောက် ယခုလို ကုန်ကားများနှင့် ခရီးသည်တင်ကားများကို စစ်တပ်မှတင်းတင်းကျပ်ကျပ် စစ်ဆေးနေခြင်းဖြစ်သည်ဟု ကားသမားများမှတစ်ဆင့် သိရသည်။(NN-12)