ပုဏ္ဏားကျွန်းတွင် ပန်းတိမ်နှင့် ပန်းရန်လုပ်ကိုင်သူ အမျိုးသား ၆ ဦးကို စစ်ကောင်စီတပ်ကဖမ်းဆီး

နိရဉ္စရာ၊ နိုဝင်ဘာ ၉/၂၀၂၂

ရခိုင်ပြည်နယ် ပုဏ္ဏားကျွန်းမြို့တွင် ပန်းတိမ်နှင့် ပန်းရန်လုပ်ကိုင်သူ အမျိုးသား ၆ ဦးကို စစ်ကောင်စီတပ်ဖွဲ့ဝင်များက ဖမ်းဆီးသွားသည်ဟု မြို့ခံများက ပြောသည်။

ဖမ်းဆီးခံရသူများမှာ ပုဏ္ဏားကျွန်းမြို့နယ် နတ်ဆိပ်ကျေးရွာမှ ပုဏ္ဏားကျွန်းမြို့သို့ ပန်းတိမ်လာလုပ်သူ အသက် ၃၀ အရွယ် ကိုမျိုးလင်းနှင့် ပုဏ္ဏားကျွန်းမြို့နယ်မှ မြို့ပေါ်တွင် ပန်းရန်လာလုပ်သူ နောက်ထပ် ၅ ဦးတို့ဖြစ်သည်ဟု သိရသည်။

သူတို့ ၆ ဦးသည် ယမန်နေ့ နိုဝင်ဘာလ ၈ ရက် ည ၉ နာရီခွဲခန့်တွင် အလုပ်မှအပြန် ပုဏ္ဏားကျွန်းမြို့ စံပြရပ်ကွက်ရှိ ဦးရာဇ်မင်္ဂလာကြိုးတံတားအနီးရှိဆိုင်တစ်ဆိုင်၌ အရက်ဝိုင်းဖွဲ့သောက်နေကြစဥ် ပုဏ္ဏားကျွန်းမြို့အခြေစိုက် ခမရ (၅၅၀)တပ်ရင်းမှ စစ်ကောင်စီတပ်ဖွဲ့ဝင်များက ကားဖြင့်လာရောက်ဖမ်းဆီးသွားခြင်းဖြစ်သည်ဟု မြို့ခံတစ်ဦးက ပြောသည်။

"သူတို့က အလုပ်ကနေ အိမ်အပြန်မှာ သောက်ကြစားကြတာ။ အဲဒီမှာ ဝင်ဖမ်းသွားတာ။ ဘာကြောင့်ဖမ်းလဲမသိရသေးဘူး"ဟု ပြောသည်။

ဖမ်းဆီးခံရသူများမှာ အသက် ၃၀ မှ ၄၀ အရွယ်များဖြစ်ကြပြီး ကိုမျိုးလင်းမှအပ ကျန် ၅ ဦး၏ အမည်နှင့် နေရပ်လိပ်စာအတိအကျကို စုံစမ်းမရဖြစ်နေသေးသည်ဟု ဆိုသည်။

လက်ရှိ ရခိုင်တွင် စစ်ကောင်စီတပ်ဖွဲ့ဝင်များက အပြစ်မဲ့ရခိုင်ပြည်သူများကို အကြောင်းအမျိုးမျိုးပြကာ ဖမ်းဆီးမှုများရှိနေသည်ဟု ဒေသခံများက ပြောဆိုကြသည်။