ပုဏ္ဏားကျွန်းတွင်ရိက္ခာလာပို့သည့် စစ်ကားမိုင်းဆွဲခံရ၍ ကားတစ်စီးလုံးပျက်စီးသွားကာ စစ်သားအများအပြားသေဆုံးသွားဟုဆို

နိရဉ္စရာ၊ နိုဝင်ဘာ ၁၀/၂၀၂၂ 

ရခိုင်ပြည်နယ် ပုဏ္ဏားကျွန်းမြို့နယ်တွင် ရိက္ခာလာပို့သည့် စစ်ကားတစ်စီး မိုင်းဆွဲခံရ၍ ကားတစ်စီးလုံးပျက်စီးသွားကာ စစ်သားအများအပြားသေဆုံးသွားခဲ့သည် ဒေသခံများက ပြောသည်။ 

ယနေ့ နိုဝင်ဘာ ၁၀ ရက် နံနက် ၇ နာရီကျော်တွင် ပုဏ္ဏားကျွန်းမြို့နယ် ဆင်အင်းကြီးနှင့် ပဒေသာရွာကြားရှိ ရန်ကုန်-စစ်တွေကားလမ်းမပေါ်တွင် ရက္ခိုင့်တပ်တော် အေအေ စစ်တပ်ရိက္ခာကားကို မိုင်းဆွဲတိုက်ခိုက်ခဲ့ခြင်းဖြစ်သည်ဟု အမည်မဖော်လိုသည့် ဒေသခံတစ်ဦးက ပြောသည်။ 

"ရိက္ခာကားတော့ လုံးဝပြိုသွားတယ်။ စစ်သားကတော့ ၁၀ ယောက်လောက် သေသွားပါတယ်"ဟု ပြောသည်။ 

ယခုကဲ့သို့ မိုင်းဆွဲခံရပြီးနောက် စစ်တွေအခြေစိုက် ၃၄၄ တပ်နှင့် ပုဏ္ဏားကျွန်းအခြေစိုက် ၅၅၀ တို့ကလည်း ရိက္ခာကားမိုင်းဆွဲခံရသည့်နေရာအနီးဝန်းကျင်ကို လက်နက်ကြီးများဖြင့် ၁၀ မိနစ်ခန့်ကြာ ဆက်တိုက်ပတ်ခတ်ခဲ့သည်ဟု ဒေသခံများက ပြောသည်။ 

စစ်တွေ ဒေသခံတစ်ဦးက "စစ်တွေ ၃၄၄ တပ်က ပစ်သံက တအားကျယ်တာ။ စစ်တွေမြို့ထဲကတောင် ကြားရတယ်။ ၃၄၄ က လက်နက်ကြီး ၁၀ ချက်လောက်တောင်ပစ်ခဲ့တယ်။ အရင်ဆို ၃၄၄ က ပစ်သံတွေကို မြို့ထဲက သိပ်မကြားရဘူး။ အခုက အသံကျယ်တော့ ကြားရတယ်"ဟု ပြောသည်။ 

အဆိုပါ တိုက်ခိုက်မှုနှင့် ပတ်သက်ပြီး ပြည်နယ်စစ်ကောင်စီ ပြောခွင့်ရသူများသို့ ဖုန်းဆက်သော်လည်း ဖုန်းလက်ခံဖြေဆိုခြင်းမရှိပါ။ ရက္ခိုင့်တပ်တော်ဘက်သို့ ဆက်သွယ်နေဆဲဖြစ်သဖြင့် ၎င်းတိုက်ခိုက်မှုနှင့် ပတ်သက်ပြီး အတည်ပြုချက်တော့ မရနိုင်သေးပါ။

လက်ရှိတွင် စစ်တွေမြို့အဝင်၊ အထွက် ကျောက်တန်းစစ်ဆေးရေးဂိတ်ကို ဖြတ်သန်းသွားလာခွင့် ပိတ်ထားပြီဟု ခရီးသည်များက ပြောသည်။