မိုင်းဆွဲတိုက်ခိုက်ခံရပြီးနောက် အထိနာသွားသော စစ်ကောင်စီတပ်က လက်နက်ကြီး၊ လက်နက်ငယ်များဖြင့်ပစ်ခတ်နေ၍ ပုဏ္ဏားကျွန်းမြို့တွင်ဈေးနှင့်စာသင်ကျောင်းများ ယာယီပိတ်ထားလိုက်ရ

နိရဉ္စရာ၊ နိုဝင်ဘာ ၁၀/၂၀၂၂

ယနေ့ နံနက် စစ်ကောင်စီရိက္ခာကားတစ်စီးကို ရက္ခိုင့်တပ်တော် (AA) က မိုင်းဆွဲတိုက်ခိုက်ခဲ့သဖြင့်  အကျအဆုံးများဖြင့် အထိနာသွားခဲ့သော စစ်ကောင်စီတပ်သည် လက်နက်ကြီး လက်နက်ငယ်များဖြင့် ပစ်ခတ်မှုများပြုလုပ်နေသဖြင့် ပုဏ္ဏားကျွန်းမြို့ပေါ်ရှိ စာသင်ကျောင်းများ၊ ဈေးနှင့် စျေးဆိုင်များ၊ ကားလမ်းတစ်လျှောက်ရှိ စာသင်ကျောင်းများ အားလုံးကို ယာယီပိတ်ထားလိုက်ရကြောင်း သိရသည်။

နိုဝင်ဘာလ ၁၀ ရက်၊ နံနက် ၇ နာရီကျော်ခန့်က ရိက္ခာလာပို့သည့် စစ်ကားတစ်စီး မိုင်းဆွဲခံရပြီးနောက် စစ်သား ၁၀ ဦးခန့်ထိ ကျဆုံးသွားပြီးနောက်တွင် ပုဏ္ဏားကျွန်းအခြေစိုက် ၅၅၀ တပ်မှ  လက်နက်ကြီး၊ လက်နက်ငယ်များဖြင့် အဆက်မပြတ် ပစ်ခတ်မှုများရှိခဲ့သလို ရဟတ်ယာဉ်တစ်စီးမှလည်း မိုင်းဆွဲခံရသည့် နေရာအနီးဝန်းကျင်တွင် ဝဲပျံနေသည်ဟု ဒေသခံများက ပြောသည်။  

ပုဏ္ဏားကျွန်းမြို့ခံအမျိုးသမီးတစ်ဦးက " လမ်းပေါ်က လူတွေအားလုံးထွက်ပြေးကြရတယ်။ ဒီအချိန်က ဈေးသွားတဲ့အချိန်ဆိုတော့ ဈေးတွေကနေ လူတွေ ထွက်ပြေးလာတယ်။ အခုဆိုရင် မြို့ကတော့ ငြိမ်သွားပြီ။ မနက်ကျူရှင်တက်တဲ့ ကလေးတွေကိုဆိုရင်လည်း ကျူရှင်တွေအားလုံးက လွှတ်လိုက်ကြပြီ။ ဒီနေ့တော့ မိဘတွေက ကျောင်းကိုလည်းပို့ရဲကြတော့မယ် မထင်ဘူး။ အခုမနက်ကပစ်ခတ်မှုဖြစ်တဲ့နေရာနားမှာ ရဟတ်ယာဉ်ဝဲနေတာကို တွေ့နေရတယ်။ အခုတော့ လက်နက်ကြီးတွေပစ်တာ ငြိမ်သွားပြီ" ဟုပြောသည်။

ပုဏ္ဏားကျွန်းအခြေစိုက်က် ခမရ ( ၅၅၀) တပ်ရင်းမှ လက်နက်ကြီးများအပါအဝင်  စက်သေနတ်များဖြင့် အခင်းဖြစ်ပွားရာ ဆင်အိုးကြီးနှင့်ပဒေသာကျေးရွာကြားရှိ ရန်ကုန်-စစ်တွေ ကားလမ်းမပေါ်သို့  ဦးတည်ကာပစ်ခတ်ခဲ့ခြင်းဖြစ်ကြောင်း ဒေသခံများကပြောသည်။

နောက်ထပ်ပုဏ္ဏားကျွန်းမြို့ခံတစ်ဦးက "ကျောင်းနဲ့ဈေးတော့ ပိတ်ထားလိုက်ကြတယ်။ ကျူရှင်တက်နေတဲ့ ကျောင်းသားတွေလည်း အိမ်ပြန်ရောက်လာကြတယ်။ မြို့ထဲမှာလည်း အသွားအလာ ရုတ်ချည်းရပ်သွားတယ်။ အရင်ကထက်တော့ ပိုငြိမ်ကျသွားတယ်။ လူတွေလည်း အပြင်ကိုသိမ်မထွက်ကြတော့ဘူး။ လက်နက်ကြီးပစ်သံတွေမကြားရတာလည်း ကြာပြီ။ အခုမှပြန်ကြားရတာဆိုတော့ လူတွေလည်း လန့်ကြတယ်" ဟုပြောသည်။

လက်ရှိတွင် ပုဏ္ဏားကျွန်းအခြေစိုက် ၅၅၀ တပ်ရင်းမှ လက်နက်ကြီးပစ်ခတ်သံများ ငြိမ်သက်သွားပြီဖြစ်သော်လည်း ပြည်သူများအနေဖြင့်  စိုးရိမ်နေရကြောင်း ဒေသခံများကပြောသည်။

ယနေ့နံနက်က စစ်ကားတစ်စီး မိုင်းဆွဲတိုက်ခိုက်ခံရသည့် ပုဏ္ဏားကျွန်းမြို့နယ် ဆင်အိုးကြီးကျေးရွာနှင့် ပဒေသာကျေးရွာအနီးတွင်လည်း စစ်ရဟတ်ယာဉ်တစ်စီး ဝဲပျံနေပြီး  အဆိုပါ လက်နက်ကြီး၊ လက်နက်ငယ်များဖြင့် ပစ်ခတ်မှုတို့ကြောင့် အနီးအနားရှိဒေသခံများ အထိအခိုက်ရှိ၊ မရှိကို နိရဉ္စရာအနေဖြင့် ဆက်လက်စုံစမ်းနေဆဲဖြစ်သည်။

(N-8/12)