ALP ဗဟိုကော်မတီဝင် “ခိုင်မြသာ”ကို ဖမ်းဆီးထားခြင်းမရှိကြောင်းနှင့် ၎င်းဖမ်းဆီးမှုမှာ ALP၏ ပါတီတွင်းပြဿနာသာဖြစ်ကြောင်း ဦးခိုင်သုခပြော

နိရဉ္စရာ၊ နိုဝင်ဘာ ၁၀/၂၀၂၂

ရခိုင်ပြည်လွတ်မြောက်ရေး(ALP) ဗဟိုကော်မတီဝင် “ခိုင်မြသာ”ကို ရက္ခိုင့်အမျိုးသားအဖွဲ့ချုပ်/ ရက္ခိုင့်တပ်တော် (ULA/AA) ကဖမ်းဆီးထားခြင်းမရှိကြောင်းနှင့်  ၎င်းဖြစ်ရပ်မှာ  ALP၏  ပါတီတွင်း ပြဿနာသာ ဖြစ်ကြောင်း ရက္ခိုင့်တပ်တော်(AA) ပြောခွင့်ရသူ ဦးခိုင်သုခက နိရဉ္စရာသတင်းဌာနကို ပြောဆိုသည်။

"ကျနော်တို့ဘက်က ဖမ်းဆီးထားတယ်ဆိုတာက လုံးဝမဟုတ်ပါဘူး။ ဒီကိစ္စနဲ့ပတ်သက်ပြီး ကျနော်တို့ အဖွဲ့အစည်းနဲ့သော်လည်းကောင်း၊ ကျနော်တို့အဖွဲ့ဝင်နဲ့သော်လည်းကောင်း တစ်စုံတစ်ရာ ပတ်သက်မှုမရှိပါဘူး။ ဒါကတော့ အခြေအမြစ်မရှိတဲ့ စွပ်စွဲချက်တစ်ခုလို့ပဲ ပြောလိုပါတယ်။ ဒါဟာ ALP ပါတီတွင်း အချင်းချင်းကြားက မပြေလည်တဲ့ပြဿနာတွေကြောင့် သူတို့အချင်းချင်းကြားမှာ ဖမ်းဆီးထိန်းသိမ်းထားတဲ့ပြဿနာလို့ပဲ သုံးသပ်ပါတယ်"ဟု ပြောသည်။

ယခုရေးသားပြောဆိုမှုများမှာ  စွပ်စွဲပြောဆိုချက်သာဖြစ်ကြောင်း၊ လက်ရှိ ဦးခိုင်မြသာ ပျောက်ဆုံးနေမှုနှင့် ပတ်သက်ပြီး အိန္ဒိယအာဏာပိုင်များက အိန္ဒိယနယ်စပ်ရှိ ရခိုင်ရွာများမှ ဒေသခံတချို့  ဖမ်းဆီး ထိန်းသိမ်းနှိပ်စက်ခံရမှုများရှိနေကြောင်း ဦးခိုင်သုခက ဆက်ပြောသည်။

" ဒီခိုင်မြသာ ပျောက်ဆုံးနေတဲ့ကိစ္စမျာ ကျနော်တို့နဲ့ လုံး၀ပတ်သက်မှု မရှိဘူး။ ဒီကိစ္စနဲ့ပတ်သက်ပြီး အိန္ဒိယနယ်စပ်မှာရှိတဲ့ ရခိုင်ရွာတွေက ဒေသခံရခိုင်ပြည်သူတွေကို အိန္ဒိယအာဏာပိုင်တွေကနေပြီး ဖမ်းဆီးထိန်းသိမ်းနှိပ်စက်ညှင်းပန်းမှုတချို့ရှိတယ်လို့လည်း သိရပါတယ်"ဟု ပြောသည်။

ယခုကဲ့သို့ ALP ပါတီတွင်းမှ အချင်းချင်းမပြေလည်မှုပြဿနာသည် ဒေသခံပြည်သူများကိုပါ ဆိုးကျိုးသက်ရောက်မှုရှိလာနေ၍ ALP ပါတီမှ သက်ဆိုင်သူများအနေနှင့် ပါတီတွင်းပြဿနာများ ပြည်သူလူထုထံ ဆိုးကျိုးမသက်ရောက်စေရန် ထိမ်းသိန်းပေးသင့်ကြောင်း ဦးခိုင်သုခက ဆက်ပြောသည်။

(ALP)၏ ဗဟိုကော်မတီဝင်တစ်ဦးဖြစ်သော ဦးခိုင်မြသာအား သူ၏ အမျိုးသမီးနေထိုင်ရာ အိန္ဒိယနိုင်ငံမီဇိုရမ်မြန်မာနယ်စပ် ရွာသစ်ကျေးရွာတွင် နိုဝင်ဘာလ(၇)ရက် မင်္ဂလာဆောင်သည့်နေ့ ညနေဖက်တွင် ပျောက်ဆုံးသွားခဲ့သည်။

အဆိုပါ ဦးခိုင်မြသာပျောက်ဆုံးမှုမှာ  ရက္ခိုင့်အမျိုးသားအဖွဲ့ချုပ်၊ရက္ခိုင့်တပ်တော်(ULA/AA)မှ လူ့ကျင့်ဝတ်ကင်း မဲ့စွာ ဖမ်းဆီးခေါ်ဆောင်သွားခဲ့သည့်အတွက် ဖြစ်ကြောင်း  ယနေ့ နိုဝင်ဘာ ၁၀ရက် ALP ၏ ထုတ်ပြန်ချက်တွင် ဖော်ပြထားသည်။

ရခိုင်ပြည်လွတ်မြောက်ရေးပါတီ (ALP) ၏  ဒုဥက္ကဌ ဒေါ်စောမြရာဇာလင်းက "ကျမအနေနဲ့ ပြောချင်တာက ရခိုင်ပြည်နဲ့ ရခိုင်လူမျိုးအတွက် အလုပ်လုပ်နေကြတဲ့ အမျိုးသား အချင်းချင်းကြားမှာ မဖြစ်သင့်မဖြစ်အပ်တဲ့ ကိစ္စတွေမဖြစ်ချင်ပါဘူး။ အန္တရာယ်ရှိပါတယ်။ အဓိကအားဖြင့် အမျိုးသား စည်းလုံးညီညွတ်ရေး၊ အမျိုးသားရင်ကြားစေ့ရေးအတွက် အင်မတန်အဟန့်အတားဖြစ်စေပါတယ်"ဟု ပြောသည်။

 ဦးခိုင်မြသာသည် အိန္ဒိယနိုင်ငံတရိပူရတွင် မွေးဖွားကြီးပြင်းသော ရခိုင်လူမျိုးတစ်ဦးဖြစ်ပြီး ရခိုင်ပြည်အတွက် ငယ်စဉ်ကတည်းက သူတတ်နိုင်သည့်ဖက်မှ အားတက်သရော လုပ်ဆောင်လာသူဖြစ်သည်ဟု ဆိုသည်။

 ULA/AA ယခုကဲ့သို့ ပြုမူလုပ်ဆောင်ချက်များသည် ရခိုင်ပြည်ရှိ နိုင်ငံရေးအင်အားစုများအကြား ညီညွတ်ရေးကို ပျက်ပြားစေသည် သာမက အိန္ဒိယနိုင်ငံနေ ရခိုင်လူမျိုးများနှင့် ရခိုင်ပြည်ရှိ ရခိုင်လူ့အသိုင်းအဝိုင်းနှစ်ခုအကြား ချစ်ခင်မှု၊ စည်းလုံး ညီညွတ်မှုတို့ကိုပါ ထိပါးပျက်စီးစေကြောင်း ထိုထုတ်ပြန်ချင်တွင် ရေးသားထားသည်။

၎င်းပြင် ULA/AA သည် ၂၀၂၂ ခုနှစ် တစ်နှစ်တည်းတွင်ပင် ALP မှ ခေါင်းဆောင်များအဖွဲ့ဝင်များ၊ ပါတီနှင့်ဆက်စပ်သည့် သံဃာတော်များ၊ ကလေးငယ်များပါမကျန် ရည်ရွယ်ချက်ရှိရှိ နေရာတကာ၌ ဖမ်းဆီးခဲ့ပြီး ULA/AA မှ (ဩဂုတ်လအတွင်း) ဖမ်းဆီးထားသည်မှာ ၁၆ ဦးခန့်ရှိပြီး ယခု  ဦးခိုင်မြသာ အပါအဝင်ဆိုလျှင်  (၁၇) ဦးအထိ ရှိပြီဖြစ်ကာ ယနေ့အချိန်အထိ လွှတ်ပေးခြင်း မရှိသေးကြောင်း ALP ၏ ထုတ်ပြန်ချက်တွင်ရေးသားထားသည်။

ယခုကဲ့သို့ ULA/AA ၏ လုပ် ဆောင်ချက်ကို ပြင်းထန်စွာကန့်ကွက်ကြောင်းနှင့် ရခိုင်တစ်မျိုးသားလုံး စည်းလုံး ညီညွတ်မှုကို ဖော်ဆောင်နိုင်မည့် လုပ်ဆောင်ချက်များကို လုပ်ဆောင်ရန်တ ိုက်တွန်းကြောင်းလည်း ရေးသားထားသည်ကို တွေ့ရသည်။ (NN-7)