ပုဏ္ဏားကျွန်း ဒီပါရုံရွာတွင် လက်နက်ကြီးကျည်ကျ၍ ၁ ဦးပွဲချင်းပြီးသေဆုံး၊ ၁ ဦး ပြင်းထန်ဒဏ်ရာရ

နိရဥ္စရာ၊ နိုဝင်ဘာ ၁၁/၂၀၂၂

ရခိုင်ပြည်နယ် ပုဏ္ဏားကျွန်းမြို့နယ် ဒီပါရုံရွာတွင် ယနေ့နံနက်က လက်နက်ကြီးကျည်ကျ၍ ၁ ဦးပွဲချင်းပြီးသေဆုံးပြီး ၁ ဦး ပြင်းထန်ဒဏ်ရာရရှိသွားသည်ဟု ဒေသခံများက ပြောသည်။

ပွဲချင်းပြီးသေဆုံးသွားသူမှာ ဒီပါရုံရွာမှ ဦးအေးစိုးသိန်း (၃၈ နှစ်)ဖြစ်ပြီး ပြင်းထန်ဒဏ်ရာ ရရှိသွားသူမှာ ဦးကျားချေ (၆၃ နှစ်)ဖြစ်သည်။

သူတို့သည် ယနေ့ နိုဝင်ဘာလ ၁၁ ရက် နံနက် ၉ နာရီခန့်တွင် ရွာပြင်၌ နွားလွှတ်ပြီးပြန်လာစဥ် ပုဏ္ဏားကျွန်းအခြေစိုက် ၅၅၀ တပ်ရင်းကပစ်လိုက်သည့်လက်နက်ကြီးကျည်တစ်လုံး သူတို့အနီးကျရောက်ပေါက်ကွဲ၍ သေဆုံးထိခိုက်မှုရှိခဲ့ခြင်းဖြစ်သည်ဟု ရွာသားတစ်ဦးက ပြောသည်။

"ဦးအေးစိုးသန်းကတော့ ငယ်ထိပ်ပွင့်ပြီး ပွဲချင်းပြီးဆုံးသွားတယ်။ ဦးကျားချေမှာတော့ ဘယ်ဘက်ပေါင် ပြတ်ထွက်သွားပြီး စိုးရိမ်ရတဲ့အခြေအနေပါ"ဟု ပြောသည်။

လက်ရှိတွင် ဒဏ်ရာပြင်းထန်သူကို ဆေးရုံသို့ ပို့ဆောင်နေကြသည်ဟု သိရသည်။

ယမန်နေ့ နိုဝင်ဘာလ ၁၀ ရက်နံနက်က ပုဏ္ဏားကျွန်းမြို့နယ် ပဒေသာရွာနှင့် ဆင်အင်းကြီးရွာကြား ရန်ကုန်-စစ်တွေကားလမ်းမပေါ်တွင် စစ်ကောင်စီတပ်၏ ရိက္ခာကားတစ်စီးသည် ရက္ခိုင့်တပ်တော်(AA)၏ မိုင်းဆွဲတိုက်ခိုက်ခြင်းကို ခံခဲ့ရပြီးနောက် အခင်းဖြစ်ပွားရာ အနီးတဝိုက်ကျေးရွာများကို ပုဏ္ဏားကျွန်းအခြေစိုက် ၅၅၀ တပ်အပါအဝင် စစ်တွေရှိ ၃၄၄ တပ်တို့က လက်နက်ကြီးများ၊ ဒရုန်းများဖြင့် ဆက်တိုက်ပစ်ခတ်နေခဲ့သည်ဟု ဒေသခံများက ပြောသည်။

ယင်းသို့ပစ်ခတ်ခဲ့မှုကြောင့် အိုင်ဒင်၊ ငှက်ကြီးကျွန်းနှင့် ကျွဲထိုးရွာတို့မှ ဒေသခံ ၄ ဦးထိခိုက်ဒဏ်ရာရရှိခဲ့သည်။

ယမန်နေ့ ညနေပိုင်းတွင်လည်း ဆင်အင်းကြီးရွာသို့ စစ်ကောင်စီတပ်ဖွဲ့ဝင်များ ဝင်ရောက်သွားပြီိးနောက် ရွာထဲရှိ နေအိမ် ၄ လုံး မီးလောင်ပျက်စီးသွားခဲ့သလို ယနေ့နံနက်ပိုင်းကလည်း ရွာထဲတွင် ပစ်သတ်ခံထားရသည့် အဖွားတစ်ဦးပါ ၉ ဦး၏အလောင်းကိုလည်း တွေ့ရှိခဲ့သည်ဟု သိရသည်။