ပုဏ္ဏားကျွန်း ဒီပါရုံရွာတွင် လက်နက်ကြီးကျည်ကျ၍ ပြင်းထန်ဒဏ်ရာရသူ ဆေးရုံသို့ပို့ဆောင်စဥ် လမ်းခုလတ်တွင်သေဆုံး

နိရဥ္စရာ၊ နိုဝင်ဘာ ၁၁/၂၀၂၂

ရခိုင်ပြည်နယ် ပုဏ္ဏားကျွန်းမြို့နယ် ဒီပါရုံရွာတွင် ယနေ့နံနက်က လက်နက်ကြီးကျည်ကျ၍ တစ်ဦးသေဆုံးပြီး နောက်ထက် ပြင်းထန်ဒဏ်ရာရရှိသွားသူကို ဆေးရုံသို့ပို့ဆောင်စဥ် လမ်းခုလတ်တွင်သေဆုံးသွားပြီဟု ဒေသခံများက ပြောသည်။

လမ်းခုလတ်တွင်သေဆုံးသွားသူမှာ ဦးကျားချေ (၆၃ နှစ်)ဖြစ်သည်။

သူသည် ယနေ့ နိုဝင်ဘာလ ၁၁ ရက် နံနက်က လက်နက်ကြီးကျည်စထိမှန်မှုကြောင့် ညှပ်ရိုးကျိုးသွားကာ ဘယ်ဘက်ပေါင် ပြတ်ထွက်သွားခဲ့သည့် ပြင်းထန်သော ဒဏ်ရာရရှိခဲ့ပြီးနောက် ရွာသားများက ဆေးရုံသို့ပို့ဆောင်စဥ် လမ်းတွင်သေဆုံးသွားခြင်းဖြစ်သည်ဟု ဒီပါရုံရွာသားတစ်ဦးက ပြောသည်။

"သွေးထွက်လွန်ပြီး မေ့မျောသွားရာကနေ သေသွားတာပါ။ အခုတော့ အလောင်းကို ရွာကိုပြန်သယ်လာပါပြီ"ဟု ပြောသည်။

သေဆုံးသွားသူနှင့်အတူ ဒီပါရုံရွာမှ ဦးအေးစိုးသိန်း (၃၈ နှစ်)သည် ယနေ့ နံနက် ၉ နာရီခန့်တွင် ရွာပြင်တွင် နွားလွှတ်ပြီးပြန်လာစဥ် ပုဏ္ဏားကျွန်းအခြေစိုက် ၅၅၀ တပ်ရင်းက ပစ်လိုက်သည့်လက်နက်ကြီးကျည်တစ်လုံး သူတို့အနီးကျရောက်ပေါက်ကွဲ၍ ဦးအေးစိုးသိန်းမှာ လက်မောင်းအောက်ဒဏ်ရာနှင့် ငယ်ထိပ်ပွင့်ထွက်ကာ ပွဲချင်းပြီးသေဆုံးသွားခဲ့သည်ဟု ရွာသားများကပြောသည်။

ယမန်နေ့ နိုဝင်ဘာလ ၁၀ ရက်နံနက်က ပုဏ္ဏားကျွန်းမြို့နယ် ပဒေသာရွာနှင့် ဆင်အင်းကြီးရွာကြား ရန်ကုန်-စစ်တွေကားလမ်းမပေါ်တွင် စစ်ကောင်စီတပ်၏ ရိက္ခာကားတစ်စီးသည် ရက္ခိုင့်တပ်တော်(AA)၏ မိုင်းဆွဲတိုက်ခိုက်ခြင်းကို ခံခဲ့ရပြီးနောက် အခင်းဖြစ်ပွားရာ အနီးတဝိုက်ကျေးရွာများကို ပုဏ္ဏားကျွန်းအခြေစိုက် ၅၅၀ တပ်အပါအဝင် စစ်တွေရှိ ၃၄၄ တပ်တို့က လက်နက်ကြီးများ၊ ဒရုန်းများဖြင့် ဆက်တိုက်ပစ်ခတ်နေခဲ့သည်ဟု ဒေသခံများက ပြောသည်။

ယင်းသို့ပစ်ခတ်ခဲ့မှုကြောင့် အိုင်ဒင်၊ ငှက်ကြီးကျွန်းနှင့် ကျွဲထိုးရွာတို့မှ ဒေသခံ ၄ ဦးထိခိုက်ဒဏ်ရာရရှိခဲ့သည်။

ယမန်နေ့ ညနေပိုင်းတွင် ဆင်အင်းကြီးရွာသို့ စစ်ကောင်စီတပ်ဖွဲ့ဝင်များ ဝင်ရောက် သွားပြီးနောက် ရွာထဲရှိ နေအိမ် ၄ လုံး မီးလောင်ပျက်စီးသွားခဲ့သလို ယနေ့နံနက်ပိုင်းကလည်း ရွာထဲတွင် ပစ်သတ်ခံထားရသည့် အဖွားတစ်ဦးပါ ၉ ဦး၏အလောင်းကိုလည်း တွေ့ရှိခဲ့သည်ဟု သိရသည်။

ယနေ့နံနက်နှင့် မွန်းလွဲပိုင်းတို့တွင်လည်း ပုဏ္ဏားကျွန်းအခြေစိုက် ၅၅၀ တပ်အပါအဝင် စစ်တွေရှိ ၃၄၄ တပ်တို့က လက်နက်ကြီးများဖြင့် အဆိုပါကျေးရွာအနီးတဝိုက်ကို ပစ်ခတ်နေသည်ဟု သိရသည်။