စစ်တွေအဝင် မင်းချောင်းတံတားအဆင်းတွင် စစ်ကြောင်းတစ်ခုကို AA က မိုင်းဆွဲတိုက်ခိုက်

နိရဥ္စရာ၊ နိုဝင်ဘာ ၁၁ /၂၀၂၂

ရခိုင်ပြည်နယ် စစ်တွေမြို့အဝင် အမြင့်ကျွန်းကျေးရွာရှိ မင်းချောင်းတံတားအဆင်းတွင် စစ်ကောင်စီစစ်ကြောင်းတစ်ခုကို ရက္ခိုင့်တပ်တော်(AA)က မိုင်းဆွဲတိုက်ခိုက်ခဲ့သည်ဟု သိရသည်။

ယနေ့ နိုဝင်ဘာလ ၁၁ ရက် နေ့လယ် ၂ နာရီခွဲခန့်တွင် စစ်တွေဘက်မှ ပုဏ္ဏားကျွန်းဘက်သို့ လမ်းလျှောက်၍ဆင်းလာသည့် အင်အား ၂၀ ခန့်ပါ စစ်ကောင်စီစစ်ကြောင်းတစ်ခုကို AA က အမြင့်ကျွန်းကျေးရွာရှိ မင်းချောင်းတံတားအဆင်း၌ မိုင်း ၃ လုံးဖြင့် မိုင်းဆွဲတိုက်ခဲ့ခြင်းဖြစ်သည်ဟု ဒေသခံတစ်ဦးက ပြောသည်။

"မနေ့က ပုဏ္ဏားကျွန်းဘက်မှာ မိုင်းဆွဲခံရတော့ မိုင်းရှင်းလင်းရေးပုံစံမျိုး သွားကြတာ ထင်ပါတယ်။ ဒါကို AA က မိုင်း ၃ လုံးဆွဲလိုက်တာ ၁၀ ကျော်လောက်တော့ ထိသွားတယ်လို့ သိရတယ်"ဟု ပြောသည်။

မိုင်းဆွဲခံရသည့်စစ်ကောင်စီတပ်ဖွဲ့ဝင်များတွင် မင်းချောင်းတံတားအနီးတပ်စွဲထားသည့်တပ်စခန်းနှင့် စစ်တွေရဲတပ်ရင်း ပူးပေါင်းအဖွဲ့မှလည်း ပါဝင်သည်ဟု သိရကြောင်း သူက ဆက်ပြောသည်။

နောက်ထပ်အမြင့်ကျွန်းရွာသားတစ်ဦးကိုဆက်သွယ်ကြည့်ရာတွင်လည်း တံတားအနီး မိုင်းပေါက်ကွဲသံများကြားလိုက်ရပြီးနောက် ပစ်ခတ်သံများ ကြားခဲ့ရပြီး အသေးစိတ်ကို သွားမကြည့်ရဲဖြစ်နေသည်ဟု ပြောသည်။

ယင်းသို့မိုင်းဆွဲတိုက်ခိုက်ခံရပြီးနောက် အပြန်အလှန်ပစ်ခတ်မှုများမရှိခဲ့ဘဲ ထိုစစ်ကြောင်းနှင့် စစ်ဇက်ရေယာဥ်အချို့တို့က အနီးဝန်းကျင်များကို လက်နက်ငယ်များဖြင့် ယနေ့ညနေ ၄ နာရီခန့်အထိ ပစ်ခတ်မှုများပြုလုပ်နေသည်ဟု ဒေသခံများက ပြောသည်။

ယမန်နေ့ နိုဝင်ဘာလ ၁၀ ရက်နံနက်က ပုဏ္ဏားကျွန်းမြို့နယ် ပဒေသာရွာနှင့် ဆင်အင်းကြီးရွာကြား ရန်ကုန်-စစ်တွေကားလမ်းမပေါ်တွင် စစ်ကောင်စီတပ်၏ ရိက္ခာကားတစ်စီးသည် ရက္ခိုင့်တပ်တော်(AA)၏ မိုင်းဆွဲတိုက်ခိုက်ခြင်းကို ခံခဲ့ရပြီးနောက် အခင်းဖြစ်ပွားရာ အနီးတဝိုက်ကျေးရွာများကို ပုဏ္ဏားကျွန်းအခြေစိုက် ၅၅၀ တပ်အပါအဝင် စစ်တွေရှိ ၃၄၄ တပ်တို့က လက်နက်ကြီးများ၊ ဒရုန်းများဖြင့် ဆက်တိုက်ပစ်ခတ်နေခဲ့သည်ဟု ဒေသခံများက ပြောသည်။

ယင်းသို့ပစ်ခတ်ခဲ့မှုကြောင့် အိုင်ဒင်၊ ငှက်ကြီးကျွန်းနှင့် ကျွဲထိုးရွာတို့မှ ဒေသခံ ၄ ဦးထိခိုက်ဒဏ်ရာရရှိခဲ့သည်။

ယမန်နေ့ ညနေပိုင်းတွင် ဆင်အင်းကြီးရွာသို့ စစ်ကောင်စီတပ်ဖွဲ့ဝင်များ ဝင်ရောက် သွားပြီးနောက် ရွာထဲရှိ နေအိမ် ၄ လုံး မီးလောင်ပျက်စီးသွားခဲ့သလို ယနေ့နံနက်ပိုင်းကလည်း ရွာထဲတွင် ပစ်သတ်ခံထားရသည့် အဖွားတစ်ဦးပါ ၉ ဦး၏အလောင်းကိုလည်း တွေ့ရှိခဲ့သည်ဟု သိရသည်။

ယနေ့နံနက်နှင့် မွန်းလွဲပိုင်းတို့တွင်လည်း ပုဏ္ဏားကျွန်းအခြေစိုက် ၅၅၀ တပ်အပါအဝင် စစ်တွေရှိ ၃၄၄ တပ်တို့က လက်နက်ကြီးများဖြင့် အဆိုပါကျေးရွာအနီးတဝိုက်ကို ပစ်ခတ်နေခဲ့သည်ဟု သိရသည်။

ယနေ့နံနက်က ပုဏ္ဏားကျွန်း အခြေစိုက် ၅၅၀ တပ်ရင်းက ပစ်လိုက်သည့် လက်နက်ကြီး ကျည်ကြောင့် ပုဏ္ဏားကျွန်းမြို့နယ် ဒီပါရုံရွာမှ ရွာပြင်တွင် နွားလွှတ်၍ပြန်လာကြသည့် ဦးအေးစိုးသိန်း (၃၈ နှစ်)နှင့် ဦးကျားချေ (၆၃ နှစ်)တို့ သေဆုံးသွားခဲ့သည်ဟု သိရသည်။