မင်းပြားတွင် ရဟန်းတော်တစ်ပါးနှင့်ရွှေဆိုင်ပိုင်ရှင်နှစ်ဦးအပါအဝင် ၇ ဦးကို စစ်ကောင်စီတပ်က ဖမ်းဆီး

နိရဉ္စရာ၊ နိုဝင်ဘာ ၁၂/ ၂၀၂၂

ရခိုင်ပြည်နယ်၊ မင်းပြားမြို့တွင် အောင်မြေကုန်းရတနာဝရမေသုကျောင်းတိုက်ဆရာတော်နှင့် ရွှေဆိုင်ပိုင်ရှင် ၂ ဦးအပါအဝင် စုစုပေါင်း ၇ ဦးကို စစ်ကောင်စီတပ်က ယမန်နေ့ညက ဖမ်းဆီးသွားခဲ့ပြီး နောက်ထပ် ဘုန်းတော်ကြီးကျောင်းတိုက်တစ်ခုကိုလည်း ဝင်ရောက်စီးနင်း ရှာဖွေမှုများ ပြုလုပ်ခဲ့သည်ဟု သတင်းရရှိသည်။

လက်ရှိ ဖမ်းဆီးခံရသူများမှာ အောင်မြေကုန်းရတနာဝရမေသုကျောင်းတိုက်မှ ဆရာတော် ဦးဝရမဉ္ဇူ သက်တော်(၅၀)နှစ်၊ တော်ဝင်ရွှေဆိုင်ပိုင်ရှင် ဦးမောင်ထွန်းသိန်း(၅၁)နှစ်၊ ဝင်းတိုး ရွှေဆိုင်ပိုင်ရှင် ဦးကျော်နုမောင်(၄၉)နှစ်နှင့် ညအချိန်အရက်ဆိုင်မှ ထွက်လာသည့် မြို့ခံလူငယ် ၄ယောက်တို့ဖြစ်

ကြောင်းသိရသည်။

အောင်မြေကုန်း ဝရမေသုကျောင်းတိုက်မှ ဆရာတော်နှင့် ရွှေဆိုင်ပိုင်ရှင် ၂ဦးကို ယမန်နေ့ နိုဝင်

ဘာလ ၁၁ရက်၊ ညဥ့်အချိန် ၁၁ နာရီနှင့် ၁၂နာရီအချိန်တွင် မင်းပြားအခြေစိုက် ခမရ(၃၇၉)တပ်မှ စစ်သားအင်အား၁၀၀ ကျော်က  ၂သုတ်ခွဲ ဝင်ရောက်ပြီး နေအိမ်၌ ရှိနေစဥ် အိမ်ပေါ်မှခေါ်ချကာ ဖမ်းဆီးခေါ်ဆောင်သွားခြင်း ဖြစ်သည်ဟုသိရသည်။

"မနေ့က ည ၁၀ နာရီခွဲလောက်ကနေ ထွက်လာတဲ့ စစ်သားတွေက ဥက္ကာပျံ၊ လေးထောင့်ပိုင်း၊ မင်းပြားကမ်းနားလမ်းပိုင်းက ဝင်းတိုးရွှေဆိုင်ပိုင်ရှင် ကိုကျော်နုမောင်ကိုဖမ်းတယ်။ ၁၁နာရီလောက်မှာ တော်ဝင်ရွှေဆိုင်ပိုင်ရှင် ဦးမောင်ထွန်းသိန်းကိုဖမ်းတယ်။ ည၁၂နာရီလောက်မှာ အောင်မြေကုန်းရတနာ ဝါရမေသုဆရာတော်ကို ကျောင်းတိုက်ကနေ ဖမ်းတယ်လို့သိရတယ်။ ဘာကြောင့်ဖမ်းလည်းတော့ မသိရဘူး။ အိမ်ပေါ်ကနေ ခေါ်ချတာ စစ်တပ်အင်အား ၁၀၀ ကျော်လောက်ပါမယ်။ နှစ်သုတ်ခွဲဝင်လာပြီး ဖမ်းတာ။ မင်းပြားလမ်းတိုင်းကြောင်းတိုင်းမှာလည်း ကင်းပုန်းဝပ်လို့ရှိတယ်" ဟု အမည်မဖော်လိုသူ မင်းပြားမြို့ခံ တစ်ဦး  ကပြောသည်။

အောင်မြေကုန်းရတနာ ဝရမေသုကျောင်းတိုက်ဆရာတော်နှင့် ရွှေဆိုင်ပိုင်ရှင် ၂ဦးဖြစ်သူ ဦးမောင်ထွန်းသိန်း၊ ဦးကျော်နုမောင်တို့ကို ဖမ်းဆီး၍ အပြန်တွင် ညအချိန် အရက်ဆိုင်မှ ထွက်လာကြသည့် မြို့ခံလူငယ် ၄ ဦးကိုပါ စစ်တပ်က ထပ်မံဖမ်းဆီးကာ မြို့မရဲစခန်း၌ ဖမ်းဆီး ထိန်းသိမ်းထားလိုက်သည်ဟု သိရသည်။

" ဆရာတော်နဲ့ ရွှေဆိုင် ပိုင်ရှင် နှစ်ဦးကိုတော့ စစ်တပ်က ခေါ်သွားတယ်။ ဘယ်ကို ခေါ်သွားမှန်း မသိဘူး။  အရက်ဆိုင်က ထွက်လာတဲ့ လူငယ် ၄ယောက်ကိုတော့  မြို့မရဲစခန်းမှာအပ်ထားခဲ့တယ်လို့ သိရတယ်။ အခုထိတော့ မလွတ်သေးဘူး" ဟု မင်းပြားမြို့ခံတစ်ဦးက ပြောသည်။

ယင်းအပြင် မင်းပြားမြို့၊ ဥက္ကာပျံရပ်ကွက်ရှိ ဓမ္မပီယကျောင်းတိုက်ကိုလည်း ယမန်နေ့ နိုဝင်ဘာလ ၁၁ရက်၊ ညအချိန်ပိုင်းကလည်း စစ်တပ်မှ ဝင်ရောက်စီးနင်းကာ ရှာဖွေမှုများပြုလုပ်ခဲ့သော်လည်း  ကျောင်းထိုင်ဆရာတော်မှာ ခရီးလွန်လျှက်ရှိနေ၍ ရှာဖွေမှုများပြုလုပ်ပြီး ထွက်ခွာသွားခဲ့ကြသည်ဟု သိရသည်။

မြန်မာစစ်ကောင်စီတပ်သည် ရခိုင်မှ မြို့နယ်အများအပြားတွင် အရပ်သားပြည်သူများကို အေအေနှင့် ဆက်စပ်သည်ဟု စွပ်စွဲကာ ဖမ်းဆီးမှုများရှိနေပြီး လက်ရှိ လူပေါင်း ၂၀၀ ခန့်ရှိသွားပြီဟု သိရသည်။ ( NN-12)