စစ်ဇက်ရေယာဥ်ကပစ်ခတ်၍ စစ်တွေ အမြင့်ကျွန်းရွာသား ၁ ဦး ဒဏ်ရာရ

နိရဥ္စရာ၊ နိုဝင်ဘာ ၁၂ /၂၀၂၂

ယမန်နေ့ ညနေက စစ်တွေမြို့အဝင် အမြင့်ကျွန်းကျေးရွာအနီး မြစ်ကြောင်းရှိ စစ်ဇက်ရေယာဥ် တစ်စီးက ပစ်ခတ်လိုက်သည့်အတွက် အမြင့်ကျွန်းကျေးရွာသား ၁ ဦး ထိခိုက်ဒဏ်ရာရသွားသည်ဟု ဒေသခံများက ပြောသည်။

ဒဏ်ရာရသွားသူမှာ အမြင့်ကျွန်းကျေးရွာမှ ဦးကျော်သူဝင်း (၄၀ နှစ်ခန့်)ဖြစ်သည်။

သူသည် ယမန်နေ့ ညနေပိုင်းက အမြင့်ကျေးရွာအပြင်ရှိ သူ၏ ပုစွန်ကန်အနီးအလုပ်လုပ်နေစဥ် မင်းချောင်းတံတားအနီး မြစ်ကြောင်းရှိ စစ်ဇက်ရေယာဥ်တစ်စီးက ပစ်ခတ်လိုက်သည့် သေနတ်ကျည်ထိမှန်မှုကြောင့် ထိခိုက်ဒဏ်ရာ ရသွားခြင်းဖြစ်သည်ဟု ရွာသားများက ပြောသည်။

ယင်းသို့ထိမှန်မှုကြောင့် ဦးကျော်သူဝင်း၏ လက်မောင်းနှင့် ဝမ်းဗိုက်တို့တွင် ကျည်ထိမှန်ဒဏ်ရာ ၂ ချက် ရရှိခဲ့သည်ဟု ဒေသခံတစ်ဦးက ပြောသည်။

"ဒဏ်ရာတွေကတော့ အသေးစားပါပဲ။ မပြင်းဘူး။ ဆေးကုသမှုခံနေလို့ ဒဏ်ရာအခြေအနေက သက်သောင့်သက်သာပါပဲ"ဟု ပြောသည်။

အမြင့်ကျွန်းကျေးရွာရှိ မင်းချောင်းတံတားအနီးတွင် ယမန်နေ့ နိုဝင်ဘာလ ၁၁ ရက် နေ့လယ် ၂ နာရီခွဲခန့်က စစ်တွေဘက်မှ ပုဏ္ဏားကျွန်းဘက်သို့ လမ်းလျှောက်၍ဆင်းလာသည့် အင်အား ၂၀ ခန့်ပါ စစ်ကောင်စီစစ်ကြောင်းတစ်ခုကို ရက္ခိုင့်တပ်တော်(AA)က မိုင်း ၃ လုံးဖြင့် မိုင်းဆွဲတိုက်ခိုက်ခဲ့သည်ဟု ဒေသခံများက ပြောသည်။

စစ်ကောင်စီတပ်ဖွဲ့ဝင် ၁၀ ကျော်ခန့်ထိခိုက်သေဆုံးမှုရှိခဲ့သည်ဟုလည်း ဒေသခံများက ဆိုသည်။

ယင်းသို့မိုင်းဆွဲတိုက်ခိုက်ခံရပြီးနောက် အပြန်အလှန်ပစ်ခတ်မှုများမရှိခဲ့ဘဲ ထိုစစ်ကြောင်းနှင့် စစ်ဇက်ရေယာဥ်အချို့တို့က အနီးဝန်းကျင်များကို လက်နက်ငယ်များဖြင့် ပစ်ခတ်မှုများပြုလုပ်ခဲ့သည်ဟု ဒေသခံများက ပြောသည်။

(Photo by SPN)