စစ်တွေတွင် တက္ကသိုလ်ကျောင်းသားများအပါအဝင် လူငယ် ၉ ဦးကို စစ်တပ်နှင့်ရဲက ဖမ်းဆီးသွား

နိရဥ္စရာ၊ နိုဝင်ဘာ ၁၂ /၂၀၂၂
ရခိုင်ပြည်နယ်၊ စစ်တွေမြို့ရှိ ဘုန်းကြီးကျောင်းအချို့တွင်နေထိုင်သည့် တက္ကသိုလ်ကျောင်းသားများ အပါအဝင် လူငယ် ၉ ဦးကို ပြီးခဲ့သည့်ညဥ့်က စစ်တပ်နှင့်ရဲ ပူးပေါင်းတပ်ဖွဲ့က ဖမ်းဆီးသွားကြောင်း သိရသည်။ ဖမ်းဆီးခံရသူများမှာ စစ်တွေမြို့ ဓညဝတီ(က)ရပ်ကွက်ရှိ ဂန္ဓာရုံဘုန်းတော်ကြီးကျောင်းတွင် နေထိုင်သူ လူငယ် ၆ ဦးနှင့် အဆိုပါဘုန်းကြီးကျောင်းအနီးရှိ အသောကရာမ ဘုန်းတော်ကြီးကျောင်းမှ လူငယ် ၃ ဦးတို့ ဖြစ်ကြသည်။

သူတို့ကို ယမန်နေ့ နိုဝင်ဘာလ ၁၁ ရက် ညဥ့် ၁၂ နာရီခန့်တွင် စစ်ကောင်စီတပ်ဖွဲ့ဝင်များနှင့် ရဲတပ်ဖွဲ့ဝင်များက ဝင်ရောက်ဖမ်းဆီးသွားခြင်းဖြစ်သည်ဟု ဂန္ဓာရုံဘုန်းတော်ကြီးကျောင်းနှင့် နီးစပ်သူတစ်ဦးက ပြောသည်။ "ဘာကြောင့်ဖမ်းသွားမှန်းမသိရဘူး။ ကျောင်းပေါ်မှာအိပ်နေကြတာကို ဝင်ဖမ်းသွားတာ"ဟု ပြောသည်။ ဂန္ဓာရုံဘုန်းတော်ကြီးကျောင်းမှ ဖမ်းဆီးခံရသူ ၆ ဦးမှာ ပုဏ္ဏားကျွန်းမြို့နယ် မြက်သောက်ကျေးရွာမှ မောင်ဘိုအောင်ခင် (၂၃ နှစ်)၊ မောင်အောင်လင်းစိုး (၂၀ နှစ်)၊ မောင်စိုးမင်း (၂၁ နှစ်)၊ ပုဏ္ဏားကျွန်းမြို့နယ် ပဲစိနန်းကျေးရွာမှ မောင်အောင်ငြိမ်း (၂၁ နှစ်)၊ မောင်ဇော်လှိုင်ဦး (၂၀ နှစ်)နှင့် ကျောက်တော်မြို့နယ် ခွဆုံကျေးရွာမှ မောင်ကံစိုး (၂၅ နှစ်)တို့ဖြစ်သည်။
သူတို့အနက် မြသောက်နှင့် ပဲစိနန်းကျေးရွာတို့မှလူငယ် ၅ ဦးသည် တက္ကသိုလ်စာမေးပွဲ ဖြေပြီး၍ ကွန်ပျူတာသင်တန်းနှင့် ဂျပန်၊ အင်္ဂလိပ်နှင့် ကိုရီးယားစကားပြောသင်တန်း တက်ရောက်နေသူများဖြစ်ပြီး ကျောက်တော်မြို့နယ် ခွဆုံကျေးရွာမှ မောင်ကံစိုးမှာ ဆိုင်ကယ်ဝပ်ရှော့တစ်ခုတွင် ဝင်ရောက်လုပ်ကိုင်နေသူဖြစ်သည်ဟု ဖမ်းဆီးခံရသူတစ်ဦး၏ မိသားစုဝင်တစ်ဦးက ပြောသည်။

"သူတို့က ပုဏ္ဏားကျွန်းဘက်ကများတော့ လက်ရှိမှာ မိသားစုဝင်တွေလည်း စစ်တွေလိုက်လာဖို့ လမ်းပိတ်ထားလို့ မလာရဘဲ အခက်အခဲဖြစ်နေကြပါတယ်"ဟု ပြောသည်။

အလားတူ အသောကရာမဘုန်းတော်ကြီးကျောင်းမှဖမ်းဆီးခံလိုက်ရသည့်လူငယ် ၃ ဦးသည် ဘေးတွဲဆိုင်ကယ်မောင်းသူများဖြစ်ကြပြီး သူတို့၏ အမည်နှင့် နေရပ်ဇာတိကို ဆက်လက်စုံစမ်းနေဆဲ ဖြစ်သည်။
လက်ရှိတွင် သူတို့ ၉ ဦးကို စစ်တွေမြို့မရဲစခန်းတွင် ဖမ်းဆီးထိန်းသိမ်းထားသည်ဟု ဂန္ဓာရုံဘုန်းတော်ကြီးကျောင်းနှင့်နီးစပ်သူက ပြောသည်။