ပုဏ္ဏားကျွန်း၊ ဆင်းအင်းကြီးရွာမှ မထွက်ပြေးနိုင်ဘဲကျန်ခဲ့သည့် (၈၈) နှစ်အရွယ်သက်ကြီးရွယ်အိုတစ်ဦး အစာရေစာပြတ်လပ်သေဆုံး

နိရဥ္စရာ၊ နိုဝင်ဘာ ၁၃/၂၀၂၂

ရခိုင်ပြည်နယ်၊ ပုဏ္ဏားကျွန်းမြို့နယ်၊ ဆင်းအင်းကြီးရွာမှ မထွက်ပြေးနိုင်ဘဲကျန်ခဲ့သည့် (၈၈) နှစ်အရွယ် သက်ကြီးရွယ်အိုတစ်ဦးသည် အစာရေစာပြန်လပ်ပြီးနောက် အင်အားချို့တဲ့ကာ ယနေ့ တွင်သေဆုံးသွားကြောင်း သတင်းရရှိသည်။

သေဆုံးသွားသူမှာ ဆင်အင်းကြီး ကျေးရွာမှ အသက် (၈၈ နှစ်)အရွယ် ဦးမောင်သိန်းထွန်း ဖြစ်သည်။

ရွာသားတစ်ဦးက "အဖိုးက အစကနေ ကျန်းမာရေးလည်း သိပ်မကောင်းတော့ဘူး။ ကိုယ်ခံအားလည်းနည်းနေပြီ။ ဒီနှစ်ရက်၊ သုံးရက်ကြားမှာ အစာရေစာကလည်း ပြတ်လပ်သွားတယ်ဆိုတော့ ပိုဆိုးသွားတဲ့ သဘောပါ။ ဒီနေ့ မနက်က ပုဏ္ဏားကျွန်းမြို့မကျောင်းကို အဖိုးကိုခေါ်ယူလာပါတယ်။ ကျောင်းကိုရောက်ပြီး နာရီဝက်ကျော်လောက်မှာ ဆုံးသွားပါတယ်"ဟု ပြောသည်။

၎င်းသက်ကြီးရွယ်အိုသည် နိုဝင်ဘာ ၁၀ ရက်နေ့ကတည်းက အစာရေစာပြတ်လပ်နေပြီး ယနေ့ နိုဝင်ဘာ ၁၃ ရက် နံနက် ၁၀ နာရီ ခန့်တွင် ရွာသားများက သွားရောက်ခေါ်ယူခဲ့ပြီးနောက် တစ်နာရီအကြာတွင် သေဆုံးသွားကြောင်း မိသားစုဝင်တစ်ဦးက ပြောသည်။

သမီးဖြစ်သူ ဒေါ် ဦးမြရီက "မိဘသေဆုံးသွားရင်တော့ သားသမီးမှာ မခံစားနိုင်ပါဘူး။ စားသာစားရ၊ နေသာနေနေရတာ ထားခဲ့ရလို့ မခံစားနိုင်ဘူး။ အဖေတစ်ယောက်ကို ပြုစုလာတာ။ မပြုစုရတော့ ဘယ်လိုနေထိုင်နေလဲ၊ ရေရောသောက်ရလား။ ငတ်များငတ်နေပြီလားလို့ ရင်ထဲမခံစားနိုင်ဘူး။ ယူလာဖို့ကလည်း ချောင်းကူးမြစ်ကူးလာရတာ ကုန်းလည်းမပိုးယူနိုင်။ အရမ်းခံစားရပါတယ်"ဟု ပြောသည်။

အဖိုးကို ယနေ့ နေ့လယ် ၁ နာရီခွဲခန့်က ပုဏ္ဏားကျွန်းသုဿန်တွင် သင်္ဂြိုလ်ခဲ့သည်ဟု သိရသည်။

 နိုဝင်ဘာ (၁၀) ရက် ညနေပိုင်းက စစ်ကောင်စီတပ်သားများသည် ဆင်အင်းကြီးရွာထဲကို ဝင်ရောက်ကာ နေအိမ်များကို မီးရှို့ခဲ့ပြီး ရွာသား ၉ ဦးကိုလည်း ရက်စက်ယုတ်မာစွာ သတ်ဖြတ်ခဲ့သည်။(NN-7)