ပုဏ္ဏားကျွန်းမြို့နယ်မှ စစ်ဘေးရှောင် ၄၀၀၀ကျော်အတွက် အရေးပေါ် စားနပ်ရိက္ခာအကူအညီများလိုအပ်နေ

Preview

ပုဏ္ဏားကျွန်းမြို့နယ်မှ စစ်ဘေးရှောင် ၄၀၀၀ကျော်အတွက် အရေးပေါ် စားနပ်ရိက္ခာအကူအညီများလိုအပ်နေ

နိုဝင်ဘာ ၁၄/ ၂၀၂၂ | ကြည့်ရှုသူ :3680

နိရဉ္စရာ၊ နိုဝင်ဘာ ၁၄/၂၀၂၂

နိုဝင်ဘာလ ၁၀ ရက်နေ့ကတည်းက ပုဏ္ဏားကျွန်းမြို့နယ်မှ ကျေးရွာအချို့ကို စစ်ကောင်စီ စစ်ကြောင်းများမှ ဝင်ရောက် ပစ်ခတ်သတ်ဖြတ်မှု၊ ၇ဟတ်ယာဉ်အပါအဝင် ဒရုန်းများဖြင့် ပစ်ခတ်မှု၊ စစ်ကောင်စီ စခန်းများမှာ လက်နက်ကြီးများဖြင့် တမင်ရည်ရွယ်ချက်ရှိရှိ ပစ်ခတ်မှုများကြောင့် ရွာသား ၄၀၀၀ ကျော်ခန့်မှာ ခိုကိုးရာမဲ့ဘ၀ဖြင့် ဘေးလွတ်ရာသို့ ထွက်ပြေးခဲ့ကြ၇ပြီး လက်ရှိတွင် သူတို့အတွက် အရေးပေါ် စားနပ်ရိက္ခာအကူအညီများ လိုအပ်နေကြောင်း သတင်းရရှိသည်။

ထွက်ပြေးနေကြ၇သည့် ကျေးရွာသားအများစုသည် ပုဏ္ဏားကျွန်းမြို့နယ်မှ ဆင်အင်းကြီး၊ ပဒေသာ၊ ကျော်ဇံ၊ ကျွဲထိုး၊ တန်းခိုး၊ တန်းစွယ်၊ သင်ပုန်းတန်း၊ ယာချောင်း၊ ငှက်ကြီးကျွန်း၊ အလယ်ကျွန်း၊ ရေပေါက်ချောင်း၊ နတ်ဆိပ်၊ အိုင်ဒင်ကျေးရွာနှင့် အခြားစသည့်ကျေးရွာအများအပြားတို့မှ ဖြစ်ကြသည်။

၎င်းရွာများမှ ဒေသခံ ၄၀၀၀ ကျော်ခန့်သည် ပုဏ္ဏားကျွန်းမြို့နယ်ရှိ နီးစပ်ရာဘေးလွှတ်မည့် ကျေးရွာများ၊ ပုဏ္ဏားကျွန်းမြို့ပေါ်ရှိ ဘုန်းကြီးကျောင်းအချို့နှင့် ၇သေ့တောင်မြို့နယ်၊ စစ်တွေမြို့နယ် များသို့လည်း ယာယီစစ်ဘေးရှောင်နေကြ၇သည်ဟု သိ၇သည်။

မြန်မာစစ်ကောင်စီတပ်သားများသည် ကျေးရွာများကို လက်နက်ကြီးများပစ်ခတ်သည်သာမက ကျေးရွာသားများကို သတ်ဖြတ်ခြင်း၊ ဖမ်းဆီးခြင်း၊ ညှဉ်းပမ်းနှိပ်စက်ခြင်းများကြောင့် ကြောက်လန့်ပြီး အဝတ်တစ်ထည်၊ ကိုယ်တစ်ခုနှင့် ထွက်ပြေးလာကြ၇သူများဖြစ်သဖြင့် အရေးပေါ်စားနပ်ရိက္ခာ အကူအညီများအပြင် အဝတ်အထည်၊ စောင်၊ ဖျာ၊ မိုးကာအစများ လိုအပ်နေကြောင်း စစ်ဘေးရှောင်များကို ကူညီပေးနေသည့် ဆရာတော်တစ်ပါးမှ မိန့်ကြားသည်။

"အဓိက စားရေးသောက်ရေးလိုအပ်ပါတယ်။ အဝတ်အင်္ကျီတွေ၊ အနွေးထည်တွေလည်း လိုအပ်ပါတယ်။ အခုစားသောက်နေတာကတော့ ကိုယ်တော်တို့ကျောင်းက အစီအစဉ်နဲ့ ကိုယ်တော်တို့ကျွေးထားပါတယ်။ ဒီနေ့အလှူရှင်တွေဆီကတော့ တစ်ရက်စာနှစ်ရက်စာ ဟင်းတွေရောက်နေတာတော့ရှိတယ်။ ဒီထက်ပိုပြီးတော့ မရှိတော့ပါဘူး။ နောက်ထပ်လာပြီးတော့ လှူကြရင် ပိုအဆင်ပြေပါမယ်" ဟု မိန့်သည်။

ထို့အပြင် ယခုအခါ ၇ခိုင်တွင် ဆောင်းရာသီဝင်စပြုနေပြီဖြစ်၍ အအေးဓာတ်ဝင်လာပြီဖြစ်သဖြင့် အနွေးထည်နှင့် စောင်များလည်း လိုအပ်လာနေပြီဖြစ်သလို စစ်ဘေးရှောင်လူဦးရေအများအပြား သောက်သုံးနိုင်ရန်အတွက်လည်း သောက်ရေ အခက်အခဲဖြစ်နေကြောင်း စစ်ဘေးရှောင်များက ပြောသည်။

လက်ရှိတွင် စစ်တွေနှင့် ပုဏ္ဏားကျွန်း၊ ကျောက်တော်၊ မြောက်ဦး၊ မင်းပြား အစရှိသည့်မြို့များနှင့် ကားလမ်း၊ ရေကြောင်းလမ်းများကို စစ်ကောင်စီမှ ပိတ်ပင်ထားသဖြင့် စစ်ဘေးရှောင်များကို သွားရောက်ကူညီရေး ကိစ္စများလုပ်ဆောင်ရန်လည်း အခက်အခဲများဖြစ်နေကြောင်း စစ်ဘေးရှောင်များကို ကူညီပေးနေသူတစ်ဦးက ပြောသည်။

"လမ်းကြောင်းတွေက လုံး၀သွားလို့ကိုမ၇သေးပါဘူး။ ကျနော်တို့က ပစ္စည်းတွေကို စုထားတယ်။ ကိုယ်တို့ သွားလို့ရတဲ့နေရာတွေကို သွားပေးတယ်။ အဲဒီလောက်ပဲ လုပ်ပေးနိုင်ပါတယ်။ ကားတွေအားလုံးက ပိတ်ထားတော့ အဲဒီဘက်မှာ ရိက္ခာဝယ်ယူ၇တာတွေလည်း ခက်ခဲတာတွေရှိပါတယ်။ လူသားချင်စာနာတဲ့အနေနဲ့ စကစက ကူညီရေးလမ်းကြောင်းတွေကို ဖွင့်ပေးဖို့လိုပါတယ်။ နောက်ပြီး တခြားမြို့နယ်တွေမှာရှိတဲ့သူတွေအနေနဲ့လည်း ဒီဖက်ကိုအလေးထားပြီး ကူညီပေးဖို့လိုပါတယ်" ဟုပြောသည်။

လက်ရှိစစ်ဘေးရှောင်လာကြသည့် ဒေသခံ ၄၀၀၀ ကျော်အထဲတွင် မွေးကင်းစကလေးငယ်များ၊ ကိုယ်ဝန်ဆောင်များနှင့် သက်ကြီးရွယ်အိုများလည်း အများအပြား ပါဝင်ကြောင်း သိ၇သည်။

ပြီးခဲ့သည့် နိုဝင်ဘာလ ၁၀ ရက်၊ နံနက် ၇ နာရီကျော်ခန့်က ပုဏ္ဏားကျွန်းမြို့နယ် ဆင်အင်းကြီးကျေးရွာနှင့် ပဒေသာကျေးရွာအကြားရှိ ရန်ကုန်-စစ်တွေကားလမ်းပေါ်တွင် စစ်ကောင်စီတပ်၏ ရိက္ခာတင်ကားအချို့ကို ရက္ခိုင့်တပ်တော်(အေအေ)က မိုင်းဆွဲတိုက်ခိုက်ခဲ့သဖြင့် တစ်စီးထိမှန်ကာ စစ်သားအများအပြား သေဆုံးထိခိုက်မှုရှိခဲ့ပြီးနောက်တွင် စစ်တပ်က လူနေကျေးရွာများ အနီးဝန်းကျင်ကို လက်နက်ကြီးများ ပစ်ခတ်မှုခြင်း၊ ကျေးရွာသားများကို သတ်ဖြတ်ခြင်းများကို ပြုလုပ်ခဲ့ခြင်းဖြစ်ကြောင်း သိ၇သည်။

နိုဝင်ဘာလ ၁၀ ရက်မှ ယမန်နေ့နိုဝင်ဘာလ ၁၃ ရက်အထိ စစ်ကောင်စီက ပုဏ္ဏားကျွန်းမြို့နယ်ရှိ ကျေးရွာများသို့ လက်နက်ကြီးများ၊ ဒရုန်းများ၊ စစ်၇ဟတ်ယာဉ်များမှ ပစ်ခတ်မှုများရှိခဲ့သည်ဟု ဒေသခံများက ပြောကြားသည်။

(NN-8)

#စစ်ဘေးရှောင်#စားဝတ်နေရေး#စစ်ကောင်စီ

မင်္ဂလာပါ လူကြီးမင်းတို့ခင်ဗျာ။ ကျနော်တို့မီဒီယာဆက်လက်ရပ်တည်ရှင်သန်ရေးအတွက် လူကြီးမင်းတို့ရဲ့ပူးပေါင်းဆောင်ရွက်မှုနဲ့ ကူညီမှုတွေကို အထူးလိုအပ်နေပါတယ်။

လှူရန်

ဆက်စပ် အကြောင်းအရာများ

တစ်နေ့တာ၏ အရေးကြီးဆုံး ပြည်တွင်းပြည်ပ သတင်းများနှင့် အဖြစ်အပျက်များကို လစဥ် လူကြီးမင်း၏ အီးမေလ်းထဲသို့ ရယူနိုင်ပါသည်

ပုဏ္ဏားကျွန်းမြို့နယ်မှ စစ်ဘေးရှောင် ၄၀၀၀ကျော်အတွက် အရေးပေါ် စားနပ်ရိက္ခာအကူအညီများလိုအပ်နေ

ဆက်စပ် အကြောင်းအရာများ

နောက်ဆုံးရသတင်းများ