ကုန်းလမ်း၊ရေလမ်းများကိုပိတ်ထားသဖြင့် ရခိုင်ကွမ်းသီးခင်းပိုင်ရှင်များ ဝယ်လက်မရှိ၍အခက်ကြုံ
နိရဉ္စရာ၊ နိုဝင်ဘာ ၁၆/ ၂၀၂၂
၇ခိုင်ပြည်နယ်တွင် စစ်ကောင်စီတပ်မှကုန်းလမ်း၊ ရေလမ်းများကို အကန့်အသတ်မရှိ ပိတ်ထားသည့် အတွက် ဝယ်လက်မရှိဖြစ်နေ၍မင်းပြားနှင့် မြောက်ဦးမြို့နယ်မှ ကွမ်းသီးခင်း ပိုင်ရှင်များမှာ အခက်ကြုံနေကြရကြောင်းသိရှိ၇သည်။
မင်းပြားမြို့နယ်မှကွမ်းသီးခြင်းပိုင်ရှင် တစ်ဦးက “အရင်နှစ်ကတော့ ကွမ်းသီးအခြောက်တစ်မောင်း (၂၅ ပိဿာ) ကိုကျပ် ၂ သိန်းကျော်ဈေးရှိတယ်။ ဒီနှစ်မှာတော့ လာမေးတဲ့သူတောင်မရှိသလောက်ဘဲ။ ရှားရှားပါးပါး ရောက်လာတဲ့ တစ်ယောက်တစ်လေကလည်း ကွမ်းခြောက်တစ်မောင်းကို၁၈၀၀၀၀ လောက်ဘဲ ပေးတယ်” ဟု ပြောသည်။
မင်းပြားမြို့နယ်မှ နရမ်း၊သဲတက်၊ ကုတိုးဆိပ်၊ ကျဉ်းထောင့်ချေ၊ နပိတ်ချောင်း၊ ခြိတ်တောင်၊ ငပုဂွ၊ကြက်မကျ နှင့် နားဒင်စသည့် ကျေးရွာများနှင့် မြောက်ဦးမြို့နယ်မှငမဲပြင်၊ လောင်းမီးရွာ၊ ပါးတော်၊ တန်းပျင်းကြီး၊ ကျွဲတဲနှင့်မြောင်းဘွေစသည့်ကျေးရွာများတွင် ကွမ်းသီးကိုစီးပွားအဖြစ်စိုက်ပျိုး ကြသည်။
ယခုကဲ့သို့ ဈေးကျပြီးဝယ်လက်မရှိဖြစ်နေရခြင်းမှာ ၇ခိုင်ပြည်တွင် လမ်းပမ်းဆက်သွယ်ရေး ပြတ်တောက်နေပြီး ကုန်ပစ္စည်းများသယ်ယူခွင့်ကို စစ်ကောင်စီက တင်းတင်းကျပ်ကျပ် ပိတ်ထားသည့်အတွက် ဖြစ်နိုင်ကြောင်းလည်း၎င်းကပြောသည်။
“ ဝယ်မဲ့သူမရှိတော့ဈေးကျတာပေါ့လေ။ ဝယ်မဲ့သူတွေကလည်း လမ်းတွေကိုပိတ်ထားပြီး ပစ္စည်းတွေလည်းသယ်မရဆိုတော့ မလာ၇ကြာနေမှာပါ” ဟု ပြောသည်။
ကွမ်းသီးပင်များမှာ အသီးထွက်ရန်၁၀ နှစ်ခန့်ကြာမြင့်ပြီး တစ်ဧက ကွမ်းသီးခင်းတွင် ပျမ်းမျှအားဖြင့် အထွက်များသည့်နှစ်တွင် ၂၅ မောင်းခန့်ထွက်ရှိကြောင်း သိရှိ၇သည်။
ယခုနှစ် ဇွန်၊ဇူလိုင်လများတွင်တရုတ်နိုင်ငံမှ အလေးချိန် ဂရမ် ၂၀ နှင့် ၃၀ ကျော်ရှိသည့်ကွမ်းသီး စိမ်းအနုများ ကို ဝယ်ယူမှုရှိခဲ့သည့်အတွက် ကွမ်းသီးစိမ်းအနုတစ်လုံးကို ကျပ် ၄၀ ခန့်ဈေးရှိခဲ့ပြီး တချို့လည်း ရောင်းချခဲ့ကြသော်လည်း တချို့မှာလည်း အချိန်မတိုင်မီ ဆွတ်ခူးလျှင် ကွမ်းသီးအထွက်နည်းသည်ဟုဆိုကာ မရောင်းခဲ့ကြကြောင်းလည်း သိရှိ၇သည်။
ယခုကဲ့သို့ ရာသီမတိုင်မီဈေးမြင့်ခဲ့သည့်အတွက် ရာသီချိန်တွင် ဈေးပိုရရန် ကွမ်းသံခြံပိုင်ရှင်များကမျှော်မှန်းခဲ့သော်လည်းလက်ရှိတွင်တခြားစီဖြစ်နေကြောင်းလည်း အဆိုပါ ခြံပိုင်ရှင်ကပြောသည်။
၇ခိုင်ပြည်တွင်ကွမ်းသီးအထွက်ဆုံးမြို့နယ်များ
၇ခိုင်ပြည်မှ ထွက်ရှိသည့်ကွမ်းသီးအခြောက်များကို ယခင်နှစ်များက ဘင်္ဂလာဒေ့ချ်နိုင်ငံဘက်ကို နယ်စပ်ကုန်သွယ်ရေးမှတစ်ဆင့် တင်ပို့ခဲ့သော်လည်း ယခုအခါ ကုန်သွယ်ရေးလမ်းကြောင်းများကိုစစ်ကောင်စီတပ်မှ လွန်ခဲ့သည့် သြဂုတ်လ အတွင်းက ပိတ်ထားလိုက်သည့်အတွက်နယ်စပ် ကုန်သွယ်ရေးမှာလည်းယခင်ကထက် အများကြီးကျဆင်းနေ ကြောင်း စီးပွားရေးသမားများက ပြောသည်။
လှူရန်