နိရဥ္စရာ၊ နိုဝင်ဘာ ၁၆/၂၀၂၂

၇ခိုင်ပြည်နယ်၊ ပုဏ္ဏားကျွန်းမြို့နယ်ရှိ ကျေးရွာအုပ်စုအုပ်ချုပ်ရေးမှူး ၉ ဦးသည် ယမန်နေ့က နုတ်ထွက်စာတင်လိုက်ကြသည်ဟု ခိုင်လုံသောသတင်းရင်းမြစ်က ပြောသည်။

နုတ်ထွက်စာတင်ခဲ့ကြသည့် ကျေးရွာအုပ်စုများမှာ အောင်ဖြူပြင်၊ ဘုရားကြီး၊ ယိုးငူ၊ ဘဲခိုးကြိမ်ချောင်း၊ ထောင်လောင်ပွန်း၊ ခမီကြိမ်ချောင်း၊ ကံဦး၊ ပဲစီးနန်းနှင့် ဖောင်ဆိပ်ကျေးရွာ အုပ်စုတို့ဖြစ်ကြသည်။

အဆိုပါကျေးရွာအုပ်စုများမှ အုပ်စုအုပ်ချုပ်ရေးမှူး ၉ ဦးသည် ယမန်နေ့ နိုဝင်ဘာလ ၁၅ ရက်တွင် ပုဏ္ဏားကျွန်းမြို့နယ်အုပ်ချုပ်ရေးမှူးရုံးသို့ နုတ်ထွက်စာတင်ခဲ့ကြခြင်းဖြစ်သည်ဟု ခိုင်လုံသောသတင်းရင်းမြစ်က ပြောသည်။

"အဓိကတော့ သူတို့ဟာ စစ်တပ်နဲ့ AA နှစ်ဘက်ကြားမှာ ကြားညှပ်နေတယ်လို့ ခံစား၇တဲ့ အတွက် ဆက်လက်ပြီး တာဝန်ထမ်းဆောင်ချင်စိတ်မရှိကြတော့တဲ့အတွက် အခုလို နုတ်ထွက်စာတင်တာပါ။ စာကိုတော့ မနေ့က မြို့နယ်အုပ်ချုပ်ရေးမှူးရုံးမှာတင်ခဲ့ကြပါတယ်"ဟု ပြောသည်။

ပုဏ္ဏားကျွန်းမြို့နယ်တွင် ကျေးရွာအုပ်စုပေါင်း ၉၆ အုပ်စုရှိပြီး ယင်းအနက် ကျေးရွာအုပ်စု ၉ အုပ်စုမှ အုပ်စုအုပ်ရေးမှူး ၉ ဦး နုတ်ထွက်စာတင်လိုက်ကြခြင်းဖြစ်သည်။

နောက်ထပ်လည်း ပုဏ္ဏားကျွန်းမြို့နယ်ထဲမှ ကျေးရွာအုပ်စုအုပ်ချုပ်ရေးမှူးများနှင့် ကျေးရွာအုပ်ချုပ်ရေးမှူးအများအပြား နုတ်ထွက်ကြဦးမည်ဟုလည်း သူတို့နှင့် နီးစပ်သူများက ပြောသည်။

ယခင် ၂၀၁၈ ခုနှစ်မှ ၂၀၂၀ ပြည့်နှစ်အတွင်း ၇ခိုင်တွင် စစ်တပ်နှင့် ရက္ခိုင့်တပ်တော်(AA)တို့ တိုက်ပွဲများပြင်းထန်ခဲ့ချိန်ကလည်း မြောက်ဦး၊ ကျောက်တော်နှင့် ၇သေ့တောင် စသည့်မြို့နယ်များမှ ကျေးရွာအုပ်ချုပ်ရေးမှူးအများအပြားသည် တာဝန်မှ နုတ်ထွက်စာတင်ကာ နုတ်ထွက်ခဲ့ကြဖူးသည်။