ကန်စောက် ၅၃၉တပ်ရင်းထဲ လက်နက်ကြီးကျရောက်ပေါက်ကွဲသံများကြားခဲ့ရဟုဆို

နိရဉ္စရာ၊ နိုဝင်ဘာ ၁၆/ ၂၀၂၂ 

ကျောက်တော်မြို့နယ် ချောင်းတူရွာကို ကန်စောက်အခြေစိုက် (၅၃၉)တပ်ရင်းမှ လက်နက်ကြီးများဖြင့်  ပစ်ခတ်၍ အရပ်သား ၃ ဦးသေဆုံးသွားပြီးနောက် တစ်နာရီခန့်အကြာတွင် (၅၃၉) တပ်ရင်းထဲမှ  လက်နက်ကြီးကျည်ကျရောက် ပေါက်ကွဲသံများကို ကြားခဲ့ရကြောင်း ဒေသခံများကပြောသည်။

အနီးအနားရှိဒေသခံတစ်ဦးက " အဲဒီတပ်ရင်းကနေ လက်နက်ကြီးပစ်ခတ်ပြီး  ချောင်းတူ ဖြစ်စဉ်ပြီးတဲ့နောက်ပိုင်း တစ်နာရီလောက် အကြာမှာ  ၅၃၉ မှာ ပေါက်ကွဲသံတွေကို တဂျိန်းဂျိန်း တစ်လုံးနှစ်လုံးကြားရပါတယ်။ အဲဒီနောက်မှာ ၅၃၉ ကအပြန်ထပ်ပြီးတော့ အများပစ်သေးတယ်" ဟုပြောသည်။

ထိုသို့ တပ်ရင်း  ၅၃၉ တပ်ရင်းထဲ ပေါက်ကွဲသံကြားခဲ့ရပြီးနောက် ၎င်းတပ်ရင်းက ပန်းခိုင်တောင်နှင့်  ကန်စောက်တောင် အနီးရှိ ကျေးရွာများကို လက်နက်ကြီးများဖြင့် ဆက်လက် ပစ်ခတ်ခဲ့သည်ဟု ပြောဆိုသည်။

“ ပေါက်ကွဲသံတွေကို ကြားရပေမယ့် ရက္ခိုင်တပ်တော် အေအေက ပစ်တာလား။ ဘယ်ကနေ ပစ်တယ်ဆိုတာ မသိရသေးပါဘူး။  လက်နက်ကြီးကျည်ကျရောက်ပေါက်ကွဲသံတွေကိုတော့ အနီးအနားရွာတွေက သေချာကြားရပါတယ်” ဟု ၎င်းက ပြောဆိုသည်။

ယနေ့ နိုဝင်ဘာလ ၁၆ ရက်၊ နံနက်ပိုင်းက ကျောက်တော်မြို့နယ်၊ ဆနွင်းတောင်ဘက်မှ လက်နက်ငယ် ပစ်ခတ်သံများ အကြိမ် ၂၀ခန့် ထွက်လာပြီးနောက် ၎င်းနေရာအနီးဝန်းကျင်ကို ကန်စောက်အခြေစိုက် (၅၃၉)တပ်မှ နက်ကြီးများဖြင့် လှမ်းပစ်ခတ်ခဲ့၍ မွန်းတည့် ၁၂ နာရီကျော်ခန့်တွင် ချောင်းတူကျေးရွာမှ အသက် ၅၀ အရွယ်လူကြီးသုံးဦး သေဆုံးခဲ့ပြီး ၄ ဦးဒဏ်ရာရရှိခဲ့ကြောင်း သိရသည်။

 အဆိုပါဖြစ်စဉ်အပြီး နာရီဝက်ခန့်အကြာတွင် (၅၃၉)တပ်ရင်းမှ လက်နက်ကြီးများထပ်မံပစ်ခတ်၍ ချောင်းတူကျေးရွာမှ နေအိမ်တစ်လုံး ပျက်စီးသွားခဲ့ပြီး နောက်ထပ်တစ်နာရီခန့်အကြာတွင် ကန်စောက်အခြေစိုက် စစ်ကောင်စီတပ် (၅၃၉)ထဲတွင် လက်နက်ကြီးပေါက်ကွဲသံများ ကြားခဲ့ရသည်ဟု ဒေသခံများက ပြောဆိုသည်။

ကန်စောက်အခြေစိုက် စစ်ကောင်စီ ၅၃၉ တပ်မှ ယနေ့နေ့လယ် အချိန်မှစ၍ ညနေ လေးနာရီကျော်ခန့် အထိ ကန်စောက်တောင်ခြေ၊ ပန်းခိုင်တောင်၊ ကြိမ်ချောင်း၊ သံချောင်း၊ ဆင်မကျော်ကျေးရွာနှင့် အခြားနေရာများသို့ လက်နက်ကြီးများ ဆက်တိုက်ဆိုသလိုပစ်ခတ်ခဲ့ကြောင်း သိရသည်။

" ၅၃၉ တပ်ကနေပြီးတော့ ပစ်နေတာပါ။ သုံးနာရီခွဲလောက်မှာလည်း နောက်တစ်ဖြတ်ပစ်ပါတယ်။ အပြန်အလှန်ပစ်တာမျိုးတော့မဟုတ်ဘူး။ ထိချင်တဲ့နေရာထိ ပစ်နေတာပါပဲ။ ရွာသားတွေကတော့ အိမ်အောက် ဗုံးတွင်းထဲမှာ နေနေရပါတယ်။ ရွာအရှေ့နားလောက်မှာလည်း လက်နက်ကြီး တစ်လုံးကျခဲ့ပါသေးတယ်။ ညနေပိုင်းပစ်တာမှာတော့  အထိအခိုက်တော့မရှိခဲ့ပါဘူး" ဟု အနီးဝန်းကျင်ရှိ ဒေသခံတစ်ဦးကပြောသည်။

ထိုသို့ ကန်စောက်အခြေစိုက် (၅၃၉)တပ်မှ လက်နက် ကြီးများဖြင့်ပစ်ခတ်နေ၍ ဒေးဝန်းချောင်းနယ်ခွဲနှင့် ဗုဒ္ဓေါကျေးရွာ၊ ချောင်းတူကျေးရွာအနောက်ဘက်ရှိ တောင်ကြောများတွင် လက်နက်ကြီးကျည်များကျ ရောက်ပေါက်ကွဲနေပြီး ဒေသခံအရပ်သားများမှာလည်း စိုးရိမ်ထိတ်လန့်နေသည်ဟု သိရသည်။ 

လက်ရှိရခိုင်တွင် စစ်ကောင်စီတပ်သည် တိုက်ပွဲဖြစ်ပွားခြင်းမရှိဘဲ လူနေကျေးရွာများသို့ လက်နက်ကြီးများပစ်ခတ်ကာ ဒေသခံပြည်သူများ၏ အသက်အိုးအိမ်များကို ဖျက်ဆီးမှုများ  ပြုလုပ်နေကြောင်း ဒေသခံများကပြောသည်။

(NN-8)