လွတ်ငြိမ်းချမ်းသာခွင့်ပြုသူ(၅ရ၇၄)ဦးတွင် နိုင်ငံရေးအမှုဖြင့် ဖမ်းဆီးခံရသူ (၇၀၀) ကျော်သာပါဝင်

ရှင်မင်း၊ နိရဉ္စရာ၊ နိုဝင်ဘာ ၁၇၊၂၀၂၂

ဒီကနေ့အာဏာသိမ်းစစ်ကောင်စီရဲ့ လွတ်ငြိမ်းချမ်းသာခွင့်နဲ့ လွတ်မြောက်လာသူတွေထဲမှာ ၈၈မျိုးဆက် ကျောင်းသားခေါင်းဆောင် ကိုမြအေး၊ စာရေးဆရာ မောင်သာချို၊ရွှေညဝါဆရာတော်ဦးပညာသီဟနဲ့ အမျိုးသားဒီမိုကရေစီအဖွဲ့ချုပ်(NLD)က ဒေါက်တာမျိုးညွန့်တို့ပါဝင်လာပါတယ်။

“ကျနော်မြန်မာပြည်သူတွေနဲ့ အမြဲတမ်းအတူတူ ရှိနေမယ်”လို့ ကိုမြအေးက သတင်းသမားတွေကိုပြောဆိုခဲ့ပါတယ်။

စစ်ကောင်စီကဒီနေ့မနက်ပိုင်းမှာ အကျဉ်းထောင်အသီးသီးကနေ အကျဉ်းကျခံနေသူ (၅ရ၇၄) ဦးကိုပြန်လွှတ်ပေးမယ်လို့ကြေညာထားပြီး အဲ့ဒီထဲမှာ နိုင်ငံရေးအမှုတွေနဲ့ဖမ်းဆီးထောင်ကျခံနေရသူ (၇၁၂)ဦးသာ ပါဝင်ပါတယ်။

စစ်ကောင်စီကလွှတ်ပေးခဲ့တဲ့ လွတ်ငြိမ်းချမ်းသာတွေထဲမှာ ဒေါ်အောင်ဆန်းစုကြည် စီးပွားရေးအကြံပေးမစ္စတာ ရှောင်တာနယ်(သြစတေးလျ)၊ ဗြိတိန်သံအမတ်ဟာင်း ဗစ်ကီဘိုးမန်း၊မှတ်တမ်းရုပ်ရှင်ရိုက်ကူးသူ ဂျပန်နိုင်ငံသား တိုရူကူဘိုတာ၊ အမေရိကန်နိုင်ငံသားကျော်ဌေးဦးတို့ပါဝင်ပြီး ဗစ်ကီဘိုးမန်းရဲ့ အမျိုးသား ဖြစ်သူ ပန်းချီထိန်လင်းနဲ့ဟာသသရုပ်ဆောင် ဆင်မတို့လည်းပါဝင်ပါတယ်။

NLDလက်ထက် အဂတိမှုနဲ့ထောင်ဒဏ်ချမှတ်ခံထားရတဲ့တနင်္သာရီတိုင်းဝန်ကြီးချုပ်ဟောင်း ဒေါက်တာ လဲ့လဲ့မော်နဲ့ဝန်ကြီးတွေဖြစ်တဲ့ဦးကျော်တင့်ဆွေ၊ဦးသန်းဌေး၊တို့လည်းလွတ်မြောက်တဲ့ထဲပါဝင်ပြီး ပုဒ်မ ၅၀၅(က) နဲ့ တရားစွဲ ခံထားရတဲ့အနုပညာရှင်(၁၁)ဦးကိုလည်း အမှုပိတ်သိမ်းခဲ့ပါတယ်။

၅၀၅(က)ကနေအမှုပိတ်သိမ်းပေးလိုက်သူတွေကတော့ ဘုန်းသိုက်၊ ဖွေးဖွေး၊ ဟေမာန်သူသူအောင်၊မယ်မင်းဘုံ၊ စုမွန်၊ နီနီခင်ဇော်၊ သီဟဖြိုး၊ ယွန်း၀တီလွင်မိုး၊ သဇင်ထူးမြင့်၊ထက်ထက်ထွန်း၊ နန်းခင်ဇေယျာ တို့ ဖြစ်ပါတယ်။

အခုလွတ်ငြိမ်းချမ်းသာနဲ့လွတ်မြောက်လာသူနိုင်ငံရေးအကျဉ်းသားတွေဟာ ထောင်ဒဏ်(၂)နှစ်ချမှတ်ခံထား ရပြီး လွတ်ရက်နီးသူတွေအများစုဖြစ်တယ်လို့လည်း နိုင်ငံရေးအကျဉ်းသားအမှုလိုက်ပါဆောင်ရွက်ပေးနေ တဲ့ရှေ့နေတွေဆီကနေ သိ၇ပါတယ်။