သောကြာ၊ မတ်လ ၂၉ရက်၊ ၂၀၂၄

စစ်တပ်ကဖမ်းဆီးသွားသည့် ပုဏ္ဏားကျွန်းကျော်ဇံရွာမှ သက်ကြီးပိုင်းရွာသား ၃ ဦးကို ၅ ရက်ကြာသည့်တိုင် သတင်းအစအနမရပျောက်ဆုံးနေ၍ မိသားစုများစိုးရိမ်


  • ရေးသူ: Web Master
  • | ရက်စွဲ: ၁၈ နိုဝင်ဘာ ၂၀၂၂
  • | ကြည့်ရှုသူ: 9.8k

နိရဉ္စရာ၊ နိုဝင်ဘာ ၁၈/၂၀၂၂

စစ်ကောင်စီတပ်က ဖမ်းဆီးသွားသည့် ပုဏ္ဏားကျွန်းမြို့နယ်၊ ကျော်ဇံကျေးရွာမှ သက်ကြီးပိုင်းရွာသား ၃ မှာ ၅ ရက်ကြာသည်အထိ အဆက်အသွယ်မရ ပျောက်ဆုံးနေသဖြင့် မိသားစုများအနေဖြင့် အထူးစိုးရိမ်နေကြသည်ဟု တင်းရရှိသည်။

ပျောက်ဆုံးနေသူ (၃) ဦးမှာ စစ်တပ်က ဖမ်းဆီးသွားသည့် ဦးမဲလှအောင်၊ ဦးစိန်ထွန်းနှင့် ဦးစောသိန်းတို့ဖြစ်ကြပြီး ၎င်းတို့ ၃ ဦးမှာ အသက် (၆၀) ကျော်အရွယ် ဝန်းကျင်ရှိသူများ ဖြစ်ကြသည်။

၎င်းတို့အနက် ဦးစိန်ထွန်းနှင့် ဦးစောသိန်းမှာ ပြီးခဲ့သည့် နိုဝင်ဘာလ ၁၃ ရက်၊ နံနက် ၈ နာရီခန့်အထိ ဦးစိန်ထွန်း၏နေအိမ်တွင် အတူရှိနေခဲ့ပြီး မိသားစုနှင့်  ယင်းအချိန်ထိ အဆက်အသွယ် ရရှိခဲ့သေးကြောင်းနှင့် နောက်ပိုင်းတွင် ဖုန်းအဆက်အသွယ် ပြတ်တောက်သွားခဲ့သည်ဟု မိသားစုဝင်တစ်ဦးက ပြောသည်။

နောက်တစ်နေ့တွင် ကျော်ဇံရွာသို့ မိသားစုများ ပြန်၍လာရောက်ရှာဖွေရာတွင် ဦးစိန်ထွန်း၏နေအိမ်ကို စစ်သားများ ဝင်ရောက် မွှေနှောက်ရှာဖွေထားပုံများကိုတွေ့ရှိရသဖြင့် ဦးစိန်ထွန်းနှင့်ဦးစောသိန်းအား စစ်တပ်မှဖမ်းဆီးသွားသည်ဟု ယူဆရကြောင်း ၎င်းတို့၏မိသားစုဝင်တစ်ဦးကပြောသည်။

" တောင်ပေါက်ရွာနားက စစ်သားတွေတပ်စွဲ နေထိုင်ခဲ့တဲ့ တောင်မှာတော့ ကျနော်တို့အိမ်က ကျောပိုးအိတ် တစ်လုံးကို တွေ့ခဲ့ပါတယ်။ သူတို့က အိမ်ကိုဝင်ပြီးဖမ်းတာဖြစ်နိုင်ပါတယ်။ နောက်ထပ် သက်သေတွေကတော့ ဖိနပ်တွေ၊ ဆန်အိတ်တွေကို အိမ်လမ်းဝမှာတွေ့ပါတယ်။ အိမ်ကပစ္စည်းတွေနဲ့ ရှင်ပြုဖို့ထားထားတဲ့ငွေ ၄၇ သိန်းကိုလည်း စစ်သားတွေယူသွားပါတယ်။ သူ(ဦးစိန်ထွန်း)က နေကောင်းတဲ့သူလည်း မဟုတ်ပါဘူး။ အမြဲဖျားပြီး ချောင်းဆိုးနေလို့ အိပ်ယာမှာ နေနေရတဲ့သူပါ။ ဒါကြောင့်လည်း တစ်ခုခုဖြစ်သွားမှာကို ပိုပြီးစိုးရိမ်နေရပါတယ်။ ကျနော်တို့က လွှတ်ပေးဖို့ တောင်းဆိုပါတယ်။ အပြစ်မရှိတဲ့အဖိုးတွေကို။ နေကောင်းကြတဲ့သူတွေလည်း မဟုတ်ပါဘူး" ဟုပြောသည်။

နောက်ထပ်ဖမ်းဆီးခံရသည့် ကျော်ဇံရွာက ဦးမဲလှအောင်သည် နိုဝင်ဘာလ ၁၃ ရက်၊ နံနက် ၇ နာရီခန့်က ကျော်ဇံရွာမှ ဘေးလွှတ်ရာသို့ ထွက်ပြေးရာတွင် ဦးမဲလှအောင်ကို ရွာ၏သင်္ချိုင်းအနီးတွင် စစ်ကောင်စီ တပ်သားများမှ ခေါ်ယူသွားသည်ကို မြင်တွေ့ခဲ့ရပြီး  ယင်းနောက်ပိုင်းမှစပြီး  သတင်းအစအနမရပျောက်ဆုံးနေသည်ဟု မိသားစုများက ပြောဆိုသည်။

ရွာသားတစ်ဦးက ဦးမဲလှအောင်ကို စစ်တပ်က ဖမ်းသွားတာပါ။ စစ်တပ်သားတွေ  စခန်းချနေထိုင်ခဲ့တဲ့ ကျော်ဇံရွ တောင်ဦးပေါ်မှာ ဦးမဲလှအောင်ရဲ့ လွယ်အိတ်တစ်လုံးနဲ့ ၎င်းနှင့်လူကြုံမှာထားတဲ့  ဆေးတွေကိုတွေ့ရှိခဲ့ရပါတယ်။ ဒါကြောင့်သူ့ကိုလည်း စစ်သားတွေ ဖမ်းသွားတာသေချာပါတယ် ဟု ပြောသည်။  

၎င်းတို့သုံးဦးစလုံးသည် သက်ကြီးပိုင်းများဖြစ်နေပြီး ကျန်းမာရေးမကောင်းသူများလည်းဖြစ်သဖြင့် လမ်းပြ ဖြစ်ခေါ်ဆောင်သွားပါကလည်း ပြန်လွှတ်စေချင်ကြောင်း ဦးမဲလှအောင်၏သားဖြစ်သူက ပြောသည်။

"ကျနော်စိုးရိမ်တာက အဖေက ကျန်းမာရေးအခံလည်းမကောင်းတော့ တကယ်တော့လမ်းပြအဖြစ် ခေါ်သွားရင်လည်း ပြန်လွှတ်ပေးစေချင်ပါတယ်။ အဖေကရွာမှာ ဒလိုပဲနေတဲ့ ရိုးရိုးသားသား သက်ကြီးရွယ်အိုတစ်ယောက်ပါ။ အဖေနဲ့အတူပါသွားတဲ့ သူတွေလည်း တစ်ဦးမှ သတင်းမကြားရသေးပါဘူး အထူးစိုးရိမ်နေကြရပါတယ်" ဟုပြောသည်။

စစ်ကောင်စီတပ်သားများသည် နိုဝင်ဘာလ ၁၂ ရက်နှင့် ၁၃ ရက်တို့တွင် ကျော်ဇံရွာထဲ ဝင်ရောက်လာပြီး လူနေအိမ်များနှင့် ရွာ၏တောင်ဦးတွင် စခန်းချ နေထိုင်ခဲ့ကြောင်း ဒေသခံများကပြောသည်။

နိုဝင်ဘာလ ၁၀ ရက်မှစ၍ ယနေ့အထိ စစ်တပ်သည် ပုဏ္ဏားကျွန်းမြို့နယ်ရှိ ကျေးရွာအချို့သို့ လက်နက်ကြီးများ၊ ဒရုန်းများနှင့်စစ်ရဟတ်ယာဉ်များဖြင့် ပစ်ခတ်မှုများပြုလုပ်ခဲ့ပြီး ကျေးရွာအချို့မှ ဒေသခံ ၁၀ ဦးခန့်ကိုလည်း ဖမ်းဆီးခေါ်ဆောင်သွားခဲ့ကြောင်း သိရသည်။

အဆိုပါဖြစ်စဉ်များကြောင့် ပုဏ္ဏားကျွန်းမြို့နယ်မှ ဒေသခံ လေးထောင်ကျော်သည် နီးစပ်ရာ ဘေးလွှတ်မည့်နေရာများသို့ စစ်ဘေးရှောင်နေကြရကြောင်းသိရသည်။

ယင်းအပြင် နိုဝင်ဘာ ၁၀ ရက်နေ့ကလည်း  ပုဏ္ဏားကျွန်းမြို့နယ် ဆင်အင်းကြီး ကျေးရွာအနီး စစ်ကောင်စီ၏ရိက္ခာကား မိုင်းဆွဲတိုက်ခိုက်ခံခဲ့ရပြီးနောက် အနီးအနားကျေးရွာများကို လက်နက်ကြီးများ၊ ဒရုန်းများနှင့် ပစ်ခတ်ခဲ့ပြီး လေကြောင်းကပါ ပစ်ခတ်မှုများ လုပ်ဆောင်ခဲ့သည်။

ဆင်အင်းကြီး ကျေးရွာထဲကိုလည်း စစ်ကြောင်းတစ်ခု ဝင်ရောက်ကာ နေအိမ်များကို မီးရှို့ပြီး အသက် ၉၀ ကျော်အရွယ်အဖွားကြီးတစ်ဦး အပါအဝင် ရွာသား ၉ ဦးကိုလည်း ရက်စက်စွာ သတ်ဖြတ်သွားခဲ့သည်။

 

(NN-8)

ဆက်စပ် သတင်းများ