သောကြာ၊ မတ်လ ၂၉ရက်၊ ၂၀၂၄

ရသေ့တောင်နှင့် မင်းပြားတွင် စပါးရိတ်နေသည့်လယ်သမားများကို စစ်တပ်က သေနတ်ဖြင့် ပစ်ခတ်၍ ထွက်ပြေးရ


  • ရေးသူ: Web Master
  • | ရက်စွဲ: ၁၉ နိုဝင်ဘာ ၂၀၂၂
  • | ကြည့်ရှုသူ: 4.8k

နိရဥ္စရာ၊ နိုဝင်ဘာ ၁၉/၂၀၂၂

ရခိုင်ပြည်နယ်၊ ရသေ့တောင်မြို့နယ်နှင့် မင်းပြားမြို့နယ်တို့တွင် စပါးရိတ်နေသည့် လယ်သမားများကို စစ်တပ်က သေနတ်များဖြင့် ပစ်ခတ်၍ ထွက်ပြေးခဲ့ကြရသည်ဟု လယ်သမားများက ပြောသည်။

ရသေ့တောင်မြို့နယ် ငစံဖော်ရွာ၊ ကျောက်ရံရွာနှင့် မညှင်းတောင်ရွာအနီးတို့ရှိ လယ်ကွင်းပြင်၌ မှည့်ဝင်းနေသည့်စပါးများကို ပိုင်ရှင်လယ်သမားများက ယနေ့ နိုဝင်ဘာလ ၁၉ ရက် နံနက်တွင် ရိတ်သိမ်းခဲ့စဥ် ကျောက်ရံရွာအနီး ပြိုင်တောင်တောင်ပေါ်နှင့် မညှင်းတောင်ရွာအနီး မညှင်းတောင်ပေါ်တို့တွင်တပ်စွဲထားသည့်စစ်တပ်က သေနတ်များဖြင့် လှမ်းပစ်ခဲ့သဖြင့် ထွက်ပြေးခဲ့ရသည့် လယ်သမားတစ်ဦးက ပြောသည်။

"ကိုယ့်ရဲ့စပါးတွေက ရိတ်ချိန်တန်နေတော့ သွားရိတ်တာကို သူတို့က လှမ်းပစ်လို့ ခွေးပြေးဝက်ပြေး ပြေးခဲ့ရတယ်။ ကံကောင်းလို့မသေတာ။ တော်တော်ယုတ်မာတဲ့လူတွေပဲ"ဟု ပြောသည်။

ယင်းအပြင် ကျောက်ရံရွာတစ်ဘက်ကမ်းရှိ မချိုးချောင်းဘက်တွင် ယနေ့နံနက်က စပါးသွားရိတ်သူများကိုလည်း စစ်သားများက ပစ်ခတ်မှုများရှိခဲ့၍ ထွက်ပြေးခဲ့ရသည်ဟု ကျောက်ရံရွာမှ လယ် ၂ ဧကလုပ်ကိုင်ထားသူ လယ်သမားတစ်ဦးက ပြောသည်။

"အခုလို အချိန်တန်လို့မှ ကိုယ့်စပါးကိုကိုယ်မရိတ်ရရင် စပါးတွေပျက်စီးဆုံးရှုံးကုန်မယ်လေ။ ပြည်သူတွေလည်း စားရေးသောက်ရေးခက်ခဲလာမယ်"ဟု ပြောသည်။


ရသေ့တောင်မြို့နယ် ပြိန်းတောရွာနှင့် မညှင်းတောင်ရွာကြားရှိ လယ်ကွင်းများတွင်ဆိုလျှင် စပါးရိတ်သိမ်းမည့်သူများအနေဖြင့် အင်္ကျီအဖြူဝတ်ကာ ၃ ဦးထက်ပိုမရိတ်ရဘဲ ၃ ဦးထက်ပိုပါက တာဝန်မယူနိုင်ဟု ရွာအနီးရှိ စစ်တပ်က သတိပေးထားသည်ဟုလည်း ဒေသခံများက ပြောသည်။

အလားတူ မင်းပြားမြို့ထွက်၀ ကြပ်စပ်တံတားအနီး စပါးရိတ်နေခဲ့သည့် လယ်သမားများကိုလည်း တံတားပေါ်ရှိစစ်ကောင်စီတပ်သားများက လက်နက်ကြီးများဖြင့် လှမ်းပစ်နေခဲ့သည့်အတွက် ထွက်ပြေးခဲ့ရသည်ဟု သိရသည်။

ကြပ်စင်တံတားအနီး စပါးရိတ်သည့် လယ်သမားများကို ယခုလအစောပိုင်းနှင့် ပြီးခဲ့သည့်ရက်ပိုင်းတို့တွင်လည်း စစ်တပ်က စ်ခတ်မှုများရှိခဲ့သည်ဟု ဒေသခံများက ပြောသည်။

ထိုသို့ သေနတ်ဖြင့် လှမ်းပစ်သော်လည်း စပါးရိတ်သူများအနေဖြင့် ထိခိုက်ဒဏ်ရာရသူမရှိခဲ့ဟုလည်း ဒေသခံများက ပြောသည်။

ဓာတ်ပုံ - ပုံဟောင်း

ဆက်စပ် သတင်းများ