၅၅၀ တပ်ရင်းက ပစ်သည့်လက်နက်ကြီးကျည် ပုဏ္ဏားကျွန်းရေဖြူကန်ရွာထဲကျရောက်ပေါက်ကွဲ၍ ရွာသား ၁ ဦးဒဏ်ရာရပြီးတစ်ရွာလုံးထွက်ပြေးကြရ

နိရဥ္စရာ၊ နိုဝင်ဘာ ၁၉/၂၀၂၂

ပုဏ္ဏားကျွန်းအခြေစိုက် ၅၅၀ တပ်ကပစ်လိုက်သည့် လက်နက်ကြီးကျည် ရေဖြူကန်ရွာထဲသို့ ကျရောက်ပေါက်ကွဲ၍ ရွာသား ၁ ဦးအနည်းငယ် ဒဏ်ရာရသွားကြောင်း ဒေသခံများကပြောသည်။

ယနေ့ နိုဝင်ဘာလ ၁၉ ရက် ညနေ ၃ နာရီ ၁၀ မိနစ်ခန့်တွင် တိုက်ပွဲ ဖြစ်ပွားခြင်းမရှိဘဲ ၅၅၀ တပ်ကပစ်သည့် လက်နက်ကြီးကျည် ၃ လုံးသည် ရွာထဲသို့ ကျရောက်ပေါက်ကွဲမှု ဖြစ်ပွားခဲ့ခြင်းဖြစ်သည်ဟု ရွာသားတစ်ဦးက ပြောသည်။

"ရွာသားတစ်ယောက်မှာ ဦးခေါင်းမှာ ထိခိုက်ဒဏ်ရာနည်းနည်းရသွားတယ်။ အခု ဆေးရုံသွားကြပြီ။ အိမ်တချို့ပျက်စီးသွားတယ် "ဟု ပြောသည်။ ထိခိုက်မှုရရှိသွားသူမှာ ဦးအေးထွန်းဝင်း (၃၃)နှစ်ဖြစ်ပြီး ခေါင်းတွင် အနည်းငယ်ထိခိုက်သွားသည်ဟု ဆိုသည်။

ယင်းအပြင် ရွာထဲရှိ ဦးမောင်သိန်းရွှေနှင့် ဦးလှမောင်သန်းတို့၏ နေအိမ်တို့လည်း ပျက်စီးသွားကြောင်း သိရသည်။

လက်ရှိတွင် ရေဖြူကန်တစ်ရွာလုံး ကြောက်လန့်ထွက်ပြေးနေရသည်ဟုလည်း ရွာသားများက ပြောသည်။

ရေဖြူကန်ရွာသည် ပုဏ္ဏားကျွန်းမြို့နှင့် ၅၅၀ တပ်အနီး ရန်ကုန်-စစ်တွေကားလမ်းမဘေးရှိ ရေဖြူကန်စစ်ဘေးရှောင်စခန်း၏ ချောင်းတစ်ဘက်ကမ်းတွင်တည်ရှိသည့်ရွာဟုလည်း သိရသည်။

ဓာတ်ပုံ - ပုံဟောင်း