ပုဏ္ဏားကျွန်းတွင် မြို့ခံတစ်ဦးပျောက်ဆုံးနေ

ရေးသူ: Web Master
| ရက်စွဲ: ၂၀ နိုဝင်ဘာ ၂၀၂၂
| ကြည့်ရှုသူ: 3.9k

နိရဥ္စရာ၊ နိုဝင်ဘာ ၂၀/၂၀၂၂

ရခိုင်ပြည်နယ် ပုဏ္ဏားကျွန်းမြို့တွင် မြို့ခံတစ်ဦးပျောက်ဆုံးနေသည်ဟု သိရသည်။

ပျောက်ဆုံးနေသူမှာ ပုဏ္ဏားကျွန်းမြို့၊ စံပြရပ်ကွက်မှ ဦးဝေမောင်သိန်း (၅၂)နှစ် ဖြစ်သည်။

သူသည် ပြီးခဲ့သည့်နိုဝင်ဘာလ ၁၈ ရက် နံနက် ၁၁ နာရီခန့်တွင် စံပြရပ်ကွက်ရှိနေအိမ်မှ ပုဏ္ဏားကျွန်း-ရသေ့တောင်လမ်းဆုံအထိ စစ်တွေ-ရန်ကုန်လမ်းမကြီးအတိုင်း လမ်းလျှောက်ထွက်သွားရာမှ ယနေ့ နိုဝင်ဘာလ ၂၀ ရက်အထိ နေအိမ်သို့ ပြန်ရောက်မလာတော့ကြောင်း ယောက်ဖဖြစ်သူ ဦးအောင်ကျော်ညွန့်က ပြောသည်။

"သူက အဲဒီလမ်းအတိုင်း အမြဲလမ်းလျှောက်ထွက်နေကျပါ။ အဲဒီနေ့ကလည်း အိမ်ကထွက်တော့ သမီးလေးက ဘယ်သွားတာလဲမေးတော့ လမ်းလျှောက်ထွက်တာလို့ပြောခဲ့တယ်လို့ သမီးလေးက ပြန်ပြောတယ်။ အဲဒီကနေ ခုထိ ပြန်ရောက်မလာဘဲ ပျောက်နေတယ်"ဟု ပြောသည်။

ပျောက်ဆုံးသွားသူသည် ယခင်က ပဲပလာတာ၊ သကြားပလာတာနှင့် စမူစာစသည့် အကြော်များပြုလုပ်ကာ ရပ်ကွက်ရှိ လိပ်ကုန်းမော်စျေးငယ်တွင် ရောင်းချခဲ့သူဖြစ်သော်လည်း လက်ရှိတွင် တိုက်ပွဲများကြောင့် အလုပ်အကိုင်အဆင်မပြေတော့၍ စိတ်ပိုင်းဆိုင်ရာထိခိုက်နေသူတစ်ဦးဖြစ်သည်ဟု ဆိုသည်။

လက်ရှိတွင် သူနှင့် ၂ ရက်ကြာ အဆက်အသွယ်မရ၍ မိသားစုများ အထူးစိုးရိမ်နေကြသည်ဟု သိရသည်။

သူသည် ပုဏ္ဏားကျွန်းမြို့၊ စံပြရပ်ကွက်တွင် မိသားစုနှင့်အတူ နေထိုင်သူဖြစ်သည်။