အင်းစိန်ထောင်တွင် အကြမ်းဖက်မှုပုဒ်မဖြင့် တရားစွဲခံနေရသူ ရခိုင်လူမျိုး ၄ ဦးကို ၃ နှစ်ကျော်ကြာသည့်တိုင် အမိန့်မချဘဲထိန်းသိမ်ထား

နိရဥ္စရာ၊ နိုဝင်ဘာ ၂၁/၂၀၂၂

ရက္ခိုင့်တပ်တော်(AA)နှင့်ပတ်သက်သည်ဟုဆိုကာ အကြမ်းဖက်မှုပုဒ်မဖြင့် အင်းစိန်ထောင်တွင် အမှုဖွင့် တရားစွဲခံနေရသူ ရခိုင်လူမျိုး ၄ ဦးကို ၃ နှစ်ကျော်ကြာသည့်တိုင် အမိန့်မချနိုင်သေးဘဲ ထောင်ထဲတွင် ထိန်းသိမ်းထားသည်ဟု မိသားစုများက ပြောသည်။

၎င်းတို့ ၄ ဦးမှာ စစ်တွေမြို့မှ ဒေါ်အေးအေးဝင်း (၃၂)နှစ်၊ ဦးရဲထွန်းကျော်(၄၀)နှစ်ခန့်၊ ဦးရဲထွန်းကျော်၏ဇနီး (၃၀)နှစ်ကျော်နှင့် နောက်ထပ် ၁ ဦးတို့ဖြစ်ကြသည်။

သူတို့သည် ပြီးခဲ့သည့် ၂၀၁၉ ခုနှစ်၊ အောက်တိုဘာလအတွင်း ရန်ကုန်တွင် ဖမ်းဆီးခံခဲ့ရပြီးနောက် အကြမ်းဖက်မှုတိုက်ဖျက်ရေးဥပဒေပုဒ်မ ၅၀ (ည)၊ ၅၂ (က)တို့ဖြင့် အမှုဖွင့် တရားစွဲခံရသည်။

တရားစွဲခံနေရသူ ဒေါ်အေးအေးဝင်း၏အမျိုးသား ဦးမင်းသိန်းထွန်းက  "ကျနော်တို့လိုချင်တာက AA ကို အကြမ်းဖက်အဖွဲ့ကနေလည်း ပယ်ဖျက်ထားပြီဖြစ်လို့ ဒီပုဒ်မနဲ့စွဲဆိုထားတာကိုလည်း ရုပ်သိမ်းပေးစေချင်တယ်။ တကယ်လို့ သူတို့မှာ ပြစ်မှုမြောက်တယ်ဆိုရင်လည်း အမိန့်ချသင့်ရင် ချ၊ လွှတ်ပေးသင့်ရင်လွှတ်ပေး။ ဒီလိုမျိုးလိုချင်တယ်။ ခုဟာက ၃ နှစ်ကျော် တရားရင်ဆိုင်နေရတာက မဖြစ်သင့်ဘူးထင်ပတယ်"ဟု နိရဥ္စရာကိုပြောသည်။

အမှုတစ်ခုကို ၃ နှစ်ကျော်ကြာသည် အထိ အမိန့်မချဘဲထားခြင်းမှာ စွပ်စွဲခံရသူ တရားခံများဘက်က အထူးနစ်နာမှုရှိပြီး လက်ရှိတည်ဆဲ တရားဥပဒေကြောင်းအရလည်း မကိုက်ညီဟု ပြောဆိုသည်။

လက်ရှိ စစ်ကောင်စီက AA ကို ပြီးခဲ့သည့် ၂၀၂၁ ခုနှစ်၊ မတ်လမှစတင်ကာ အကြမ်းဖက်အဖွဲ့ အဖြစ်မှ ပယ်ဖျက်ထားပြီ ဖြစ်သော်လည်း သူတို့ ၄ ဦးကို အကြမ်းဖက်မှု တိုက်ဖျက်ရေး ဥပဒေပုဒ်မများဖြင့် တရားစွဲဆိုထားခြင်းမှာ မဖြစ်သင့်ဟု ဦးမင်သိန်းထွန်းက ပြောဆိုသည်။

“  ကျွန်တော်ရဲ့ အမျိုးသမီး ဒေါ်အေးအေးဝင်းက အေအေရဲ့ နှစ်ပတ်လည်နေ့ အခမ်းအနား တစ်ခုကိုတက်ရောက်ခဲ့စဉ်က ယူနီဖောင်းဝတ်ဆင်ထားတဲ့ AA တပ်ဖွဲ့ဝင်တစ်ဦးနဲ့ အတူတွဲ၍ရိုက်ထားတဲ့ ဓာတ်ပုံကို သူမရဲ့ လက်ကိုင်ဖုန်းမှာ တွေ့ရှိရာကနေ  စရဖက တရားလိုလုပ်ကာ အခုလို  အကြမ်းဖက်မှုပုဒ်မတွေနဲ့ တရားစွဲဆိုခံနေရခြင်း ဖြစ်ပါတယ်။ အမှုကို ၃ နှစ် ကျော်ကြာလာတဲ့တိုင်အောင် အမှုကို မဆုံးဖြတ်ဘဲထားတာက လူ့အခွင့်အရေး ချိုးဖောက်ခံနေရတဲ့ သဘောလည်း ဖြစ်နေပါတယ်” ဟု ပြောဆိုသည်။

နောက်ထပ် ၃ ဦးကိုလည်း ယင်းအချိန်က ရန်ကုန်တွင် ဖမ်းဆီးပြီး AA နှင့်ပတ်သက်သည်ဟုဆိုကာ တရားစွဲဆိုထားခြင်း ဖြစ်သည်။

သူတို့ ၄ ဦးကို ၂၀၂၀ ပြည့်နှစ်တွင် ကိုဗစ်ကြောင့်လည်းကောင်း၊ ၂၀၂၁ ခုနှစ်တွင် စစ်အာဏာသိမ်းမှုဖြစ်စဥ်ကြောင့်လည်းကောင်း အမိန့်ချရန်ကြန့်ကြာနေခဲ့သလို လက်ရှိတွင်လည်း လိုပြသက်သေများ ရုံးချိန်းပျက်ကွက်နေကြသည့်အတွက် အမိန့်ချရန်ကြန့်ကြာနေခြင်းဖြစ်သည်ဟုလည်း ဦးမင်းသိန်းထွန်းက ဆက်ပြောသည်။

"အမိန့်မချနိုင်သေးတော့ AA နဲ့ပတ်သက်ပြီးလွတ်ငြိမ်းချမ်းသာပေးသူတွေထဲမှာလည်း သူတို့မပါလာနိုင်ဖြစ်နေတယ်"ဟု ပြောသည်။

ပြီးခဲ့သည့် နိုဝင်ဘာလ ၁၈ ရက်ကလည်း စစ်ကောင်စီက AA နှင့်ပတ်သက်သည်ဟုဆိုကာ အကျဥ်းထောင်အသီးသီးတွင် ပြစ်ဒဏ်ချမှတ်ခံထားရသူ ၁၇ ဦးကို လွတ်ငြိမ်းခွင့်ပေးခဲ့ပြီး AA နှင့်ပတ်သက်ပြီး အမှုရင်ဆိုင်နေရသူများအနက် ၁ ဦးကို အမှုပိတ်သိမ်းပေးခဲ့သည်။

ယင်းအပြင် ၂၀၂၁ ခုနှစ်အတွင်းတွင်လည်း AA နှင့်ပတ်သက်သည်ဟုဆိုကာ အကျဥ်းထောင်အသီးသီးရှိ ပြစ်ဒဏ်ချမှတ်ခံထားရသူ လူဦးရေ ရာနှင့်ချီကိုလည်း လွတ်ငြိမ်းချမ်းသာခွင့်ပေးခဲ့သည်။

ယင်းအထဲတို့တွင် ဒေါ်အေးအေးဝင်းအပါအဝင် ၄ ဦးသည် ပါဝင်ခဲ့ခြင်းမရှိပေ။

ယခုကိစ္စနှင့်ပတ်သက်ပြီး ရခိုင့်လူ့အခွင့်အရေးကာကွယ်မြှင့်တင်သူများအဖွဲ့မှ ဒါရိုက်တာ ဦးမြတ်ထွန်းက "တရားလိုက စစ်တပ်ကဖြစ်တယ်။ သက်သေဟာစစ်တပ်က။ သူတို့ဟာ လာရောက်ဖို့ပျက်ကွက်တာတွေရှိတယ်။ တမင်တကာလည်း မလာလာဘဲနဲ့ ကြန့်ကြာအောင် လုပ်တာရှိတယ်။ အခုလိုလုပ်ခြင်းအားဖြင့် စွပ်စွဲခံရသူတွေအနေနဲ့ အရမ်းနစ်နာတယ်။ တရားရုံးကလည်း ဒီလိုလုပ်တာတွေဟာ တရားမျှတမှုမရှိဘူး"ဟု ဝေဖန်ပြောသည်။

ရခိုင်ရှိ စစ်တွေ၊ သံတွဲ၊ ကျောက်ဖြူစသည့် အကျဥ်းထောင်များတွင် AA နှင့်ပတ်သက်ပြီး အကျဥ်းကျခံနေရသူ လက်ရှိအချိန်အထိ ၂၀ ဦးခန့်ရှိနေဆဲဖြစ်ပြီး ရန်ကုန်၊ မန္တလေးမြို့များရှိ အကျဥ်းထောင်များတွင် AA နှင့်ပတ်သက်ပြီး အကျဥ်းကျခံနေရသူများနှင့် တရားစွဲ ခံနေရသူများလည်းရှိနေကြဆဲဖြစ်သည်ဟု ရခိုင့်လူ့အခွင့်အရေး ကာကွယ်မြှင့်တင်သူများ အဖွဲ့စာရင်းများအရ သိရသည်။

Photo by Myanmar Now