မင်းပြားတွင် အောင်မြေကုန်းဆရာတော်နှင့် ရွှေဆိုင်ပိုင်ရှင်၁ဦးတို့ ပြန်လွတ်မြောက်လာ

နိရဉ္စရာ၊ နိုဝင်ဘာ ၂၂/၂၀၂၂

ရခိုင်ပြည်နယ်၊ မင်းပြားမြို့တွင် စစ်ကောင်စီတပ်မှ ဖမ်းဆီးသွားခဲ့သည့်  အောင်မြေကုန်းဆရာတော်နှင့် ရွှေဆိုင်ပိုင်ရှင် ၁ဦး တို့  မနေ့ ညနေ့ ပြန်လွတ်မြောက်လာသည်ဟု သိရသည်။

အောင်မြေကုန်းရတနာဝါရမေသုကျောင်းတိုက်မှ ဆရာတော် ဦးဝါရမဉ္စဇူ (သက်တော် ၅၀)နှစ်နှင့် ဝင်းတိုးရွှေဆိုင်ပိုင်ရှင် ဦးကျော်နုမောင်(၄၉)နှစ်တို့ကို  ယမန်နေ့နိုဝင်ဘာလ ၂၁ရက်၊ ညနေ ၃ နာရီ အချိန်ခန့်တွင် ရှေ့ဆင့်နောက်ဆင့် စစ်ကောင်စီက ပြန်လွှတ်ပေးလိုက်သည်ဟု သူတို့နှင့် နီးစပ်သူ တစ်ဦးက ပြောသည်။

"လွတ်လာတာ အောင်မြေကုန်းဆရာတော်နဲ့ ဝင်းတိုးရွှေဆိုင်ပိုင်ရှင် ဦးကျော်နုမောင်တို့ဖြစ်ပါတယ်။ အောင်မြေကုန်းဆရာတော်ကို ညနေ ၃နာရီလောက်မှာ မိခင်ဖြစ်သူကို ခေါ်ယူပြီးတော့ ဖမ်းဆီးထားတဲ့နေရာကနေ ပြန်လွှတ်ပေးလိုက်တာပါ။ အခုတော့ကျောင်းတိုက်ကိုရောက်နေပါပြီ” ပြောဆိုသည်။

စစ်ကောင်စီတပ်သည် ဆရာတော်အား လူဝတ်လဲ၍ စစ်ဆေးမှုများပြုလုပ်ခဲ့သည်ဟု  သတင်းများထွက်ပေါ်နေသည်ဟုလည်း ၎င်းက ပြောကြားသည်။

မင်းပြားတွင် ဖမ်းဆီးခံရသည့် ရွှေဆိုင်လုပ်ငန်းပိုင်ရှင် နှစ်ဦးအနက် ဝင်းတိုးရွှေဆိုင်ပိုင်ရှင် ဦးကျော်နုမောင်ကို ပြန်လွှတ်ပေးလိုက်သော်လည်း နောက်ထပ် ရွှေဆိုင်ပိုင်ရှင် ဦးမောင်ထွန်းသိန်း(၅၁)နှစ်ကို ဆက်လက်ဖမ်းဆီးထားကြောင်း သိရသည်။

တစ်ခြားမင်းပြားဒေသခံတစ်ဦးက“ ဝင်းတိုးရွှေဆိုင်ပိုင်ရှင် ကိုကျော်နုမောင်ကိုလည်း မနေ့က ညနေ ၃နာရီခွဲလောက်မှာ ပြန်လွတ် ပေးလိုက်တယ်။ ဆရာတော်နဲ့ ရှေ့ဆင့်နောက်ဆင့် ပြန်လွတ်မြောက်လာကြတာပါ" ဟု ပြောသည်။

အောင်မြေကုန်းဆရာတော်နှင့် ရွှေဆိုင်ပိုင်ရှင် ၂ဦးကိုမင်းပြားအခြေစိုက် ခမရ(၃၇၉)တပ်တွင် ၁၀ ရက်ကျော်ကြာ ဖမ်းဆီးထားခဲ့ခြင်းဖြစ်ပြီး ပြန်လွတ်မြောက်လာသည့်အချိန်၌ နေကောင်းကျန်းမာနေကြောင်းသိရသည်။

"အောင်မြေကုန်းဆရာတော်တော့ နေကောင်းကျန်းမာတယ်လို့ သိရတယ်။ ဖုန်းအဆက်အသွယ်ရှိလို့ သိရတာပါ။ ဝင်းတိုးရွှေဆိုင်ပိုင်ရှင် ဦးကျော်နုမောင်လည်း ကျန်းကျန်းမာမာပါပဲ။ ဒါပေမဲ့ ငွေပိုင်ထွန်းရွှေဆိုင်ပိုင်ရှင် ဦးမောင်ထွန်းသိန်းတော့ ပြန်လွတ်မြောက်လာခြင်းမရှိသေးတော့ စိတ်မကောင်းစရာပါ။ သူ့ကိုလည်း ပြန်လွှတ်ပေးသင့်ပါတယ်" ဟု ၎င်းက  ပြောသည်။

အောင်မြေကုန်းရတနာ ဝါရမေသုကျောင်းတိုက်မှ ဆရာတော်နှင့် ရွှေဆိုင်ပိုင်ရှင် ၂ဦးကို ပြီးခဲ့သည့် နိုဝင်ဘာလ ၁၁ရက်၊ ညဥ့်အချိန် ၁၁ နာရီနှင့် ၁၂နာရီအချိန်တွင် မင်းပြားအခြေစိုက် ခမရ (၃၇၉)တပ်မှ စစ်သားအင်အား၁၀၀ ကျော်ကို ၂သုတ်ခွဲ၍ မင်းပြားမြို့ထဲ ဝင်ရောက်လာပြီး နေအိမ်များပေါ်မှ ခေါ်ချကာ ဖမ်းဆီးသွားခဲ့ခြင်းဖြစ်သည်။

 စစ်ကောင်စီတပ်သည် ရခိုင်မှ လုပ်ငန်းရှင်များကို အေအေနှင့်ဆက်စပ်မှုရှိသည်ဟု မဟုတ်မမှန် လုပ်ကြံ စွပ်စွဲဖမ်းဆီးပြီး ပြန်လွှတ်ပေးရန်အတွက် ငွေညစ်တောင်းခံမှုများရှိကြောင်း၊ လက်ရှိ လူတစ်ဦးပြန်လွတ်ရေးအတွက် ပေါက်စျေးမှာ ငွေကျပ် သိန်း ၁၀၀ မှ သိန်း ၅၀၀ ထိ ရှိသည်ဟု သတင်းများထွက်ပေါ်လျှက်ရှိနေသည်။
သို့သော် ယခုရွှေဆိုင်ပိုင်ရှင်တစ်ဦးအား လွှတ်ပေးရာတွင် ငွေညစ်တောင်းဆိုမှု ရှိ/မရှိကို နိရဉ္စရာသတင်းဌာနအနေဖြင့် မသိရှိရသေးပါ။

(NN-12)