နိရဉ္စရာ၊နိုဝင်ဘာ ၂၄/၂၀၂၂

ရခိုင်ပြည်နယ်၊မြောက်ဦးမြို့နယ်၊ ကျွဲတဲကျေးရွာ အထကကျောင်း(ခွဲ)မှတပြိုင်တည်း အသက်၇ှူမွန်းကျပ်ခဲ့မှုသည့် ကျောင်းသူ ၁၃ ဦးမှာ ကျန်းမာရေးကောင်းမွန်သွားပြီဖြစ်သဖြင့် ယမန်နေ့ ညနေကတည်းက ဆေးရုံက ဆင်းသွားကြပြီဟု သိ၇သည်။

ယခုကဲ့သို့ ကျောင်းသူ ၁၃ ဦးတစ်ပြိုင်တည်း  အသက်ရှူမွန်းကျပ်မူဖြစ်ခဲ့၇ခြင်းမှာ  သူတို့စားခဲ့သည့်ရေခဲချောင်းများနှင့်စိတ်ကြောင့်ဟု ဆရာဝန်က သုံးသပ်သည်ဟု ဒေသခံများက ပြောကြားသည်။

အဆိုပါကျောင်းသူ ၁၃ အနက် ကျောင်းသူတစ်ဦးတွင် နှလုံးရောဂါအခံရှိပြီးယမန်နေ့ နိုဝင်ဘာလ ၂၃ ရက် နံနက်တွင်ကျောင်းခန်း၌စာသင်ကြားနေစဥ် ရုတ်တရက် အသက်၇ှူကျပ်လာသည့်အတွက် ဆရာ၊ ဆရာမများက ရှူဆေးဗူးများဖြင့်ဝေဒနာ သက်သာအောင်ပြုလုပ်ခဲ့၇သည်ဟု သိ၇သည်။

ယင်းဖြစ်စဥ်ကိုသွားကြည့်ခဲ့ကြသည့် အခြားကျောင်းသူနှစ်ဦးသည်လည်း ထပ်မံအသက်ရှူကျပ်ပြီးနောက်အခြားကျောင်းသူအချို့တို့သည်လည်း အသက်ရှူကျပ်မှု ဆက်တိုက်ဖြစ်လာခဲ့ရာကျောင်းကိုလွှတ်လိုက်၇ပြီး ကျောင်းသူ ၁၃ ဦးကို ဆေးရုံတင်ခဲ့၇သည်ဟု သိ၇သည်။

ကျောင်းလွှတ်လိုက်ပြီးနောက် အိမ်သို့ပြန်ရောက်သည့်အခါလည်းကျောင်းသူအချို့ ထပ်မံအသက်ရှူကျပ်ကာမူးမေ့လဲကျသွားခဲ့သည့်အတွက်မြောင်းဘွေတိုက်နယ်ဆေးရုံသို့ အရေးပေါ်ပို့ဆောင်ခဲ့ရသည်ဟုရွာသားများက ပြောသည်။

ယင်းဖြစ်စဥ်ကြောင့်Grade(7)မှ Grade (9)အထိ စုစုပေါင်းဆေးရုံတင်ခဲ့၇သည့် ကျောင်းသူ ၁၃ ဦးအထိရှိခဲ့သည်ဟုလည်း ဆိုသည်။

ယင်းဖြစ်စဥ်နှင့်ပတ်သက်ပြီးမြောင်းဘွေတိုက်နယ်ဆရာဝန်အားမေးမြန်းခဲ့သည့် ရပ်မိရပ်ဖ တစ်ဦးက"ဆရာဝန်ကြီးကပြောတာကစိတ်ကြောင့်ဖြစ်တာလို့ပြောပါတယ်။ကျနော်တို့အဲဒီမှာအောက်ဆီဂျင်တိုင်းတယ်။ နှလုံးခုန်နှုန်းတိုင်းတယ်။ နှလုံးခုန်နှုန်းလည်းအကောင်း၊အောက်ဆီဂျင်လည်းအကောင်းပါ။ အသက်ရှူကျပ်တယ်ဆိုတာကလည်းစိတ်ပယောဂကြောင့် ထင်ပါတယ်တဲ့။ သူငယ်ချင်းတစ်ယောက်ကမွန်းကျပ်နေတာမြင်တော့ နောက်တစ်ယောက်က ဘာဖြစ်မှန်းမသိ၊ ကိုဗစ်ဖြစ်လား၊ အဲလိုစိတ်တွေမွန်းကျပ်ပြီးတော့ဖြစ်တတ်တယ်။  ်တော့ အောက်ဆီဂျင်တွေဘာတွေပေးလိုက်တော့ တစ်ခုမှမဖြစ်တော့ဘူး။အားလုံးကောင်းသွားပြီ ဆိုလိုက်တော့ခဏလေးနဲ့ သက်သာသွားကြတယ်။ မိန်းကလေးတစ်ယောက်ဆိုရင် ဓာတ်ပုံမှတ်တမ်းတောင်မယူလိုက်ရဘူး။ခဏလေးနဲ့ကောင်းသွားလို့ဆေးရုံက ချက်ချင်းဆင်းသွားတယ်"ဟု ပြောသည်။

ယခုကိစ္စနှင့်ပတ်သက်ပြီးမြောင်းဘွေတိုက်နယ်ဆရာဝန်ကိုဆက်သွယ်ခဲ့သော်လည်း အဆက်အသွယ်မ၇ခဲ့ပါ။

ယခုဖြစ်စဥ်မှာစိတ်ပိုင်းဆိုင်ရာကြောင့်လည်းဖြစ်နိုင်သလို ကျောင်းအနီးရောင်းချသည့်သူတို့စားသုံးခဲ့ကြသော ရေခဲချောင်းကြောင့်လည်း ၅၀ ရာခိုင်နှုန်း ဖြစ်နိုင်သည်ဟုလည်း ဒေသခံရပ်မိရပ်ဖများနှင့်ကျောင်းသားမိဘများက ယူဆနေကြသည်။

ကျောင်းသားမိဘတစ်ဦးက"ဒီမှာရောင်းနေတဲ့ရေခဲချောင်းတွေဟာ မြို့က၊ စက်ရုံကြီးတွေကသန့်သန့်ပြန့်ပြန့်ထုတ်တဲ့ ရေခဲချောင်းတွေမဟုတ်ဘူး။ ဒီမှာ တပိုင်တနိုင် ရောင်းနေကြတဲ့ ရေခဲချောင်းတွေဖြစ်တယ်။ ကျနော်တို့ဒီမှာစားကြည့်လိုက်တဲ့အခါလည်း သံချေးနံ့နံတယ်။ ဆိုးဆေးများတယ်။ ဆေးသကြားများတယ်။ အဲလိုတွေတွေ့ပါတယ်။ကျနော်တို့ထင်တာက ရေကလည်း သန့်မှာမဟုတ်ဘူး။ဆိုတော့ ဖြစ်နိုင်ခြေက ကိုဗစ်ဆိုရင်လည်း တစ်ကျောင်းလုံး ဖြစ်မယ်လေ။ဆိုရင် စိတ်ကြောင့်ဖြစ်တာက ၅၀ ရာနှုန်း၊ ရေခဲချောင်းကြောင့်ဖြစ်တာက၅၀ ရာခိုင်နှုန်းလို့ထင်ပါတယ်"ဟု ပြောသည်။

ယင်းကြောင့်ကျောင်းအနီးရောင်းချနေကြသည့် ရေခဲချောင်းရောင်းသူများကို သက်ဆိုင်ရာက သေသေချာချာစိစစ်ပြီးမှ ရောင်းချခွင့် ပေးစေလိုသည်ဟုလည်းဒေသခံများနှင့် ကျောင်းသားမိဘများက ပြောဆိုနေကြသည်။

လက်ရှိတွင်အဆိုပါကျောင်းသူ၊ ကျောင်းသားများသည်ယမန်နေ့ညနေတွင် ဆေးရုံမှ ဆင်းသွားကြပြီဖြစ်ပြီး ကျောင်းကိုလည်း ယနေ့တွင်ပုံမှန်အတိုင်းဖွင့်လှစ်သင်ကြားနေပြီဟု ဒေသခံများက ပြောသည်။

ဓာတ်ပုံ- မြောင်းဘွေတိုက်နယ်ဆေးရုံအားတွေ့၇စဥ်။