စစ်တွေရှိ ယာဉ်ထိန်းရဲအချို့က မွတ်ဆလင်ဆိုင်ကယ်များကို ပစ်မှတ်ထားလိုင်စင်စစ်ကာ ဖမ်းဆီးငွေညစ်ခြင်းများလုပ်ဆောင်နေဟုဆို
ရခိုင်ပြည်နယ်၊စစ်တွေမြို့ရှိ ယာဉ်ထိန်းရဲအချို့သည်စစ်တွေမြို့တွင်းနှင့် ဘုမေ၊ သဲချောင်းတဝိုက် နှစ်ဘီး၊ သုံးဘီးဆိုင်ကယ်များဖြင့် သွားလာနေသည့်မွတ်ဆလင်များကိုအဓိက ပစ်မှတ်ထားကာ ယာဉ်မောင်းလိုင်စင်များကို စစ်ဆေးနေပြီးဖမ်းဆီး၊ ငွေညစ်မှုများ လုပ်ဆောင်နေသည်ဟု မွတ်ဆလင် ဒေသခံများက နိရဉ္စရာသတင်းဌာနကိုပြောသည်။
ယခုကဲ့သို့ဖမ်းဆီး ငွေညစ်မှုများကို ယခင်နှစ်များကလည်း ပြုလုပ်လေ့ရှိပြီး ယခုနှစ်တွင် အခြေအနေပို၍ ဆိုးဝါးလာနေသဖြင့် နှစ်ဘီးယာဉ်၊သုံးဘီးယာဉ်များဖြင့် လုပ်ကိုင်စားသောက် နေသူ လက်လုပ်လက်စားများအနေဖြင့် ယခုလို စီးပွားရေးကျပ်တည်းသည့်ကာလတွင် အထူး အခက်အခဲ ဖြစ်နေကြ၇သည်ဟု ၎င်းတို့ကပြောဆိုသည်။
ယာဉ်ထိန်းရဲ အချို့သည်စစ်တွေမြို့ ယာဉ်ထိန်းဂိတ်ရှိသည့် နေရာများတွင်သာမဟုတ်ဘဲမွတ်ဆလင်များ ဆိုင်ကယ်များဖြင့်သွားလာတတ်သည့် လမ်းကြောင်းများတွင်ပါစောင့်ဆိုင်းကာဖမ်းဆီးခြင်းများ ပြုလုပ်ကာ ငွေတောင်းခံနေကြောင်း ဘုမေကျေးရွာမှမူဆလင် လူငယ်တစ်ဦးက ပြောသည်။
" အရမ်းကထက် အခု အဖမ်းများပါတယ်။ သွားလာလို့ကိုမရလောက်အောင်ပါ။ ဂိတ်တွေကလည်း ဖမ်းပါတယ်။ ဂိတ်မရှိတဲ့နေရာတွေမှာဆိုရင်လည်း စောင့်ပြီးဖမ်းပါတယ်။ မူဆလင်ပုံရိပ် မြင်ရင်ကို ဖမ်းပြီးငွေတောင်းတာပါ”ဟုပြောသည်။
၎င်းယာဉ်ထိန်းရဲများက လိုင်စင်မရှိသူ မည်သူ့ကို မဆို အားလုံးကိုဖမ်းသည်ဟုဆိုသော်လည်း အဓိက မွတ်ဆလင် ဆိုင်ကယ်စီးသူများကိုသာ ဦးတည်စစ်ဆေးပြီး ငွေညစ်နေကြောင်းပြောဆိုသည်။
“ သူတို့ကပြောရင်တော့မောင်းလိုင်စင်မရှိတဲ့ သူတွေအားလုံးကို ဖမ်းတယ်ပြောတာပဲ။ ဒါပေမယ့် အမှန်တကယ်မှာသူတို့မဖမ်းပါဘူး။ကျန်တဲ့ လူမျိုးတွေထက် ကျနော်တို့ကို ဖမ်းတယ်။ ငွေတောင်းတယ်။ ဒီလိုလုပ်ပါတယ်။ ကျနော့်သူငယ်ချင်းရခိုင်တစ်ယောက်ရဲ့ဆိုင်ကယ်နောက်ကကျနော်တို့မွတ်ဆလင် နှစ်ယောက် ထိုင်ပြီးလိုက်တာတောင် မဖမ်းပါဘူး။ ဟိုတလောကတော့Without ကား၊ဆိုင်ကယ်တွေ ဖမ်းတုန်းကတော့ အကုန်လုံးကို ဖမ်းခဲ့ပေမယ့် ကျနော်တို့တွေကိုကျတော့ အမြဲတမ်းဖမ်းပြီးငွေညစ်နေတာပါ" ဟု ၎င်းလူငယ်ကပြောသည်။
ထိုသို့ဖမ်းဆီးမှုများပြုလုပ်ရာတွင်လည်းယာဉ်ထိန်းရုံးကိုသွား၍ ရှင်းလင်းမည်ဆိုပါကာ တစ်သိန်းခန့် ကုန်ကျနိုင်သဖြင့် ၎င်းယာဉ်ထိန်းရဲများတောင်းဆိုသည် ငွေကျပ်ငါးသောင်းကို ဖမ်းမိသည့် အခါတိုင်း ပေး၇သည်ဟု ဆိုသည်။
“ ယာဉ်ထိန်းရုံးကို သွားရှင်းရင်ငွေ တစ်သိန်း ပေးရတယ်။ ရဲနဲ့ ရှင်းရင် ငါးသောင်းလောက်နဲ့ အဆင်ပြေပြီး ဖမ်းဆီးထားတဲ့ ဂိတ်ကနေတခါတည်းယူသွားနိုင်တယ်။ ယာဉ်ထိန်းရဲတွေကို ငွေငါးသောင်းနဲ့ ညှိနှိုင်းတော့ ချက်ချင်းဆိုသလိုပြန်လွှတ်ပေးတယ်” ဟု ၎င်းကြုံခဲ့၇မှုနှင့် ပတ်သက်ပြီး ပြောဆိုသည်။
ထိုသို့ဖမ်းဆီး ငွေညစ်ခံနေရသဖြင့် မောင်းလိုင်စင်လျှောက်ထားရန်အတွက် သက်ဆိုင်ရာ ကျေးရွာအုပ်ချုပ်ရေးမှူးမှတဆင့်အထောက်အထားများပေးပို့လျှောက်ထားသော်လည်းယာဉ်မောင်းလိုင်စင်ကိုအချိန်မီ ရရှိခြင်းမရှိကြောင်းမူဆလင်ကျေးရွာသားများကပြောသည်။
စစ်တွေမြို့တွင်ပြီးခဲ့သည့် နိုဝင်ဘာလက လိုင်စင်မဲ့ မော်တော်ဆိုင်ကယ်များ၊ သုံးဘီးများ၊ ကားများကိုဖမ်းဆီးအရေးယူမှုများပြုလုပ်ခဲ့ပြီး ရခိုင်ပြည်နယ် ကုန်းလမ်းပို့ဆောင်ရေး ညွှန်ကြားရေးမှူးဦးစီးဌာနမှနိုဝင်ဘာလ လကုန်အထိ လိုင်စင်မဲ့ဆိုင်ကယ်များကို လိုင်စင်လာရောက်လျှောက်ထားနိုင်ကြောင်းကြေညာခဲ့ထားသည်။
၎င်းအပြင်စစ်တွေမြို့တွင်း သွားလာနေကြသည့် မွတ်ဆလင်များကိုမောင်းလိုင်စင်မပါဘဲသွားလာနေမှုကြောင့် ဖမ်းဆီးရာတွင်ရိုင်းစိုင်းစွာဆဲဆိုမှုများလည်း ပြုလုပ်နေပြီး ကိုယ်ထိလက်ရောက် စော်ကားမှုတချို့လည်း ရှိကြောင်း မူဆလင်ဒေသခံများကပြောသည်။
ဖမ်းဆီးငွေညစ်ရာတွင်လည်းငွေကျပ် သုံးသောင်းမှ ငါးသောင်းဝန်းကျင်အထိ ပေးဆောင်နေရပြီး အဆိုပါဒဏ်ကြေးသည် ဆိုင်ကယ်ကယ်ရီပြေးဆွဲနေသည့် မရှိဆင်းရဲသားများအတွက်လည်း အဆင်မပြေဖြစ်နေကြောင်း ဒေသခံများကပြောသည်။
မောင်းလိုင်စင်မပါ၍ဖမ်းဆီးမှုများပြုလုပ်နေသည့်အထဲတွင် ၎င်းတို့နှင့်အတူ သွားလာနေသည့် လိုင်စင်အထောက်အထား တစ်ခုမှမပါရှိသောအခြားလူမျိုးများကိုမူ ဖမ်းဆီးခြင်းမရှိဘဲ ၎င်းတို့၏ လူမျိုးဘာသာကို ခွဲခြားဆက်ဆံနေသကဲ့သို့ခံစားရပြီး အစိုး၇၏အာဏာကို အလွဲသုံးစား လုပ်နေဟန်နှင့်တူသည်ဟု အမည်မဖော်လိုသူ မွတ်ဆလင်ဒေသခံတစ်ဦးက ဝေဖန်ပြောဆိုသည်။
"ဥပဒေဟာလူတိုင်းအတွက်ဖြစ်သလို တစ်ဖက်သတ် ဖမ်းဆီးခြင်း၊ ငွေညစ်ခြင်းဟာလည်း ယုတ်မာခြင်းနဲ့ မတရားဆက်ဆံတာဖြစ်ပါတယ်။ကျနော်တို့က ဘုမေရွာမှာတောင် သွားလာခွင့် မရှိဘူးလားလို့မေးချင်ပါတယ်။ အခုက ဘုမေကျေးရွာနဲ့ သဲချောင်း ကျေးရွာအတွင်းမှာတောင် သွားလာလို့မ၇ဖြစ်နေပါတယ်။ အထက်ကလူကြီးတွေလည်းအရေးယူ တားဆီးစေချင်ပါတယ်" ဟုပြောသည်။
အဆိုပါ ကိစ္စနှင့် ပတ်သက်ပြီး ဆိုင်ကယ်စီးသူ မင်းဂံရပ်ကွက်ရခိုင်လူငယ်တစ်ဦးကို ဆက်သွယ်မေးမြန်းရာ ၎င်းက “ဆိုင်ကယ်လိုင်စင်မပါရင်၊ ဦးထုပ် မပါရင်တော့ မွတ်ဆလင်ရယ်လို့ မဟုတ်ပါဘူး။ အားလုံးကို ဖမ်းပါတယ်။စစ်တွေမြို့ထဲမှာလည်း ဖမ်းပါတယ်။ ၇ခိုင်တွေကိုလည်း ဖမ်းပါတယ်။ ငွေတောင်းပါတယ်။ မီးသတ်ခွဆုံ၊လေယာဉ်ကွင်းဝင်၀တို့မှာ မကြာခဏစစ်ပါတယ်။ လိုင်စင်မပါရင် လူတိုင်းဆီက ဒီလိုတောင်းနေကျပါ။နည်းတာများတာသာကွာပါမယ်။ ဟိုဘုမေဘက်မှာကျတော့ မွတ်ဆလင်တွေများတော့ သူတို့ကိုဘဲ သက်သက်ဘဲစစ်တယ်လို့ ထင်တာပါ။ ငွေတောင်းတယ်လို့ ထင်ပါ။ ဒီဘက်မှာရခိုင်တွေလည်း ပေးနေ၇တာပါဘဲ”ဟုပြောဆိုသည်။
မွတ်ဆလင်ဆိုင်ကယ်စီးသူများအနေဖြင့်လည်း ယာဉ်မောင်းလိုင်စင်လျှောက်ထားသင့်ပြီးသက်ဆိုင်ရာ အစိုးရတာဝန်ရှိသူများအနေဖြင့်လည်း လိုင်စင်လျှောက်ထားသူများကို လူမျိုးဘာသာမခွဲခြားဘဲစောစီးစွာ ဆောင်ရွက်ပေးသင့်သည်ဟု ၎င်းလူငယ်က ပြောဆိုသည်။
စစ်တွေမြို့၌ဆိုင်ကယ်လိုင်စင်မပါသူများ၊ ဆိုင်ကယ်ဦးထုပ်မဆောင်းသူများကို စစ်တွေတွင် အကျင့်ပျက်ခြစားသူ ယာဉ်ထိန်းရဲအချို့က နေ့စဉ်နေ့တိုင်းဖမ်းဆီးငွေညစ်မှုများ ရှိနေကြောင်းဒေသခံများကပြောသည်။
(NN-8)
လှူရန်