နိရဥ္စရာ၊ နိုဝင်ဘာ ၂၆/ ၂၀၂၂
ရခိုင်ပြည်နယ်၊ စစ်တွေမြို့နယ်၊ မင်းချောင်းတံတားအောက်တွင် ဖမ်းဆီးခံခဲ့ရသည့် စက်လှေ ၉ စီးအနက် ၇ စီး၏ပိုင်ရှင်များကို စစ်တွေမြို့နယ်တရားရုံးက တစ်ဦးလျှင်  ဒဏ်ငွေ ကျပ် ၅ စီ ပြစ်ဒဏ် ချမှတ်ခဲ့ကြောင်း ကာယကံရှင်များက ပြောသည်။
၎င်းတို့ကို ရေကြောင်းဥပဒပုဒ်မ (၄၃)အရ အနိမ့်ဆုံးပြစ်ဒဏ်ဖြစ်သည့် ဒဏ်ငွေကျပ် ၅ သိန်းစီဖြင့် နိုဝင်ဘာလ ၂၄ ရက်တွင် စစ်တွေမြို့နယ်တရားရုံးက ပြစ်ဒဏ်ချမှတ်ခဲ့ပြီး အမှုမှ လွှတ်ပေးလိုက်ခြင်းဖြစ်သည်ဟု ကာယကံရှင်စက်လှေပိုင်ရှင်တစ်ဦးက ပြောသည်။

"အနိမ့်ဆုံးဒဏ်ငွေ ၅ သိန်းကို တရားရုံက သက်ညှာစွာဆုံးဖြတ်တယ်ဆိုတဲ့ပုံစံမျိုးပေါ့။ လူကတော့ အရင်ကနေ အာမခံနဲ့ လွတ်ပြီးသားပေါ့။ ဒီနေ့တော့ ဘုတ်ကို တရားဝင်ပြန် လွှဲပြောင်းပေးပါတယ်။ ဒါကြောင့် လူပါ၊ ဘုတ်ပါ အမှုကနေ လွတ်သွားပြီ"ဟု ပြောသည်။

အမှုနှင့်ပတ်သက်ပြီး ဖမ်းဆီးထိန်းသိမ်းခံခဲ့ရသည့် သူတို့ပိုင် စက်လှေ ၇ စီးကိုလည်း ယနေ့ နိုဝင်ဘာလ ၂၆ ရက် နံနက်တွင် စစ်တွေမြို့နယ် အမြင့်ကျွန်းရဲစခန်းမှူးက ရေချမ်းပြင်ဆိပ်ကမ်းသို့ လာရောက်ပြီး စက်လှေပိုင်ရှင်များထံ တရားဝင်လွှဲပြောင်းအပ်နှံခဲ့သည်ဟု ကာယကံရှင်စက်လှေပိုင်ရှင်တစ်ဦးက ပြောသည်။
သူတို့ပိုင်ဆိုင်သည့် စက်လှေ ၇ စီးနှင့်အတူ နောက်ထပ် စက်လှေ ၂ စီး၊ စုစုပေါင်း ခရီးသည်တင်စက်လှေ ၉ စီးသည် ပြီးခဲ့သည့်အောက်တိုဘာလ ၁၂ ရက် ညနေ ၅ နာရီကျော်တွင် စစ်တွေမြို့နယ် မင်းချောင်းတံတားအောက်၌ ဆိုက်ကပ်ထားစဥ် စစ်ကောင်စီတပ်ဖွဲ့ဝင်များနှင့် ရဲတပ်ဖွဲ့ဝင်အင်အားစုစုပေါင်း ၄၀ ခန့်၏ဖမ်းဆီးခြင်းကို ခံခဲ့ရခြင်းဖြစ်သည်။
ယင်းနောက် စက်လှေများကို ဖမ်းဆီးထိန်းသိမ်းကာ စက်လှေပိုင်ရှင် ၉ ဦးကိုလည်း စစ်တွေမြို့မရဲစခန်းတွင် ရေကြောင်းဥပဒေပုဒ်မ (၄၃)ဖြင့် အမှုဖွင့်ပြီး ၁၀ ရက်အကြာတွင် စက်လှေပိုင်ရှင်များကို အာမခံဖြင့် ပြန်လွှတ်ပေးခဲ့သည်။
အမှုဖွင့်ခံခဲ့ရသည့်စက်လှေပိုင်ရှင်များအနက် ရသေ့တောင်မြို့နယ် အငူမော်ကျေးရွာမှ ဦးသိန်းထွန်း (၄၂ နှစ်)နှင့် အငူမော်ကျေးရွာအနီးရှိ မကျည်းချောင်းကျေးရွာမှ ဦးသန်းဝင်း (၅၆ နှစ်)တို့သည် ရက္ခိုင့်တပ်တော် (AA)ကိုအခွန်ဆောင်ကြောင်း ထွက်ဆိုသည်ဟုဆိုကာ စစ်တွေအခြေစိုက် ခမရ ၂၃၂ တပ်ရင်းမှ ဗိုလ်ကြီးတစ်ဦးက တရားလိုလုပ်ပြီး မတရားအသင်းဆက်သွယ်မှုပုဒ်မ ၁၇(၁)ဖြင့် နိုဝင်ဘာလ ၂ ရက်တွင် စစ်တွေမြို့မရဲစခန်း၌ ထပ်မံ အမှုဖွင့်ခံလိုက်ရသည်။
သူတို့ ၂ ဦးသည် ရေကြောင်းဥပဒေ ပုဒ်မ (၄၃)အပြင် မတရားအသင်းဆက်သွယ်မှု ပုဒ်မ ၁၇(၁)တို့ဖြင့်လည်း လက်ရှိအချိန်အထိ အမှုရင်ဆိုင်နေရခြင်းဖြစ်သည်။
သူတို့ ၂ ဦးအနက် ဦးသိန်းထွန်းသည် နိုဝင်ဘာလ ၁ ရက်က စစ်တွေမြို့နယ်တရားရုံးသို့ တရားရင်ဆိုင်ရန်လာစဥ် စစ်ကောင်စီတပ်၏ဖမ်းဆီးခြင်းကိုခံခဲ့ရပြီး ကျန်တစ်ဦးမှာ ယနေ့အထိ ခရီးလွန်နေသည်ဟု စက်လှေပိုင်ရှင်များနှင့် နီးစပ်သူများက ပြောသည်။
အဆိုပါစက်လှေ ၉ စီးလုံးသည် ဘူးသီးတောင်၊ ရသေ့တောင်နှင့် ပေါက်တောမြို့များကို ခရီးသည်များနှင့် ကုန်ပစ္စည်းများ ပို့ဆောင်ပေးနေသည့်စက်လှေများဖြစ်သည်ဟု သိရသည်။