နိရဥ္စရာ၊
နိုဝင်ဘာ ၂၈ /၂ဝ၂၂
ရခိုင်ပြည်နယ်နှင့် ချင်းပြည်နယ်ပလက်ဝမြို့နယ်တွင်
၂ လကျော်အတွင်း စစ်တပ်၏ပစ်ခတ်မှုကြောင့် အရပ်သား
၂၆ ဦးထက်မနည်းသေဆုံးပြီး ၁၁၁ ဦးပြင်းထန်ဒဏ်ရာရခဲ့ဟု ရက္ခိုင်အမျိုးသားအဖွဲ့ချုပ်/ ရက္ခိုင့်တပ်တော် (AA)၏ ပြောခွင့်ရသူ ဦးခိုင်သုခက
ယနေ့တွင်ပြောဆိုလိုက်သည်။
စက်တင်ဘာလ
၂၀ ရက်မှ ယမန်နေ့ နိုဝင်ဘာလ ၂၇ ရက်အထိသေဆုံးသွားခြင်းဖြစ်သည်ဟု ဦးခိုင်သုခက
ပြောသည်။
“သေဆုံးသွားတဲ့
ပြည်သူတွေအတွက် မိသားစုနဲ့ထပ်တူဝမ်းနည်းကြေကွဲရပါကြောင်း ULA/AA အနေနဲ့ ဒီနေရာကနေ
ထပ်ဆင့်ပြောကြားလိုပါတယ်။ နိုင်ငံတကာအနေနဲ့ စစ်ရာဇဝတ်မှုတွေကို
သတိထားစောင့်ကြည့်ဖို့လိုသလို အပြစ်ရှိတဲ့သူတွေကိုလည်း အပြစ်ပေးနိုင်ဖို့အတွက်
အားလုံး ဝိုင်းဝန်းကြိုးပမ်းဆောင်ရွက်ကြဖို့လိုပါတယ်”ဟု ပြောသည်။
ယနေ့
နိုဝင်ဘာလ ၂၈ ရက် နံနက် ၁ဝ နာရီတွင်ပြုလုပ်သည့် ULA/AA ၏ ဆဋ္ဌမအကြိမ်မြောက် သတင်းစာရှင်းလင်းပွဲတွင်
ပြောဆိုသွားခြင်းဖြစ်သည်။
အစုလိုက်အပြုံလိုက်သေဆုံးမှုဖြစ်ရပ်များထဲမှ အစုလိုက်အပြုံလိုက်
ကြေကွဲဖွယ် သေဆုံးမှုဖြစ်ရပ် တစ်ခုမှာ မြိုလူမျိုးများနေထိုင်သည့်
မောင်တောမြို့နယ် ဂြစ်ချောင်းကျေးရွာတွင် ပြီးခဲ့သည့်
နိုဝင်ဘာလ ၁၆ ရက်၊ နေ့လယ်က ကလေးငယ်တစ်ဦးကိုနားထိုးပွဲပြုလုပ်နေစဉ် အနီးအနားရှိ
ကြိမ်ချောင်း နယ်ခြားစောင့်တပ် နခခ(၇)က ပစ်ခတ်လိုက်သည့် လက်နက်ကြီးကျည် ၃
လုံးကျရောက် ပေါက်ကွဲ၍ ၁၀ နှစ်အောက် ကလေးငယ် ၄ ဦးအပါအဝင် ၁၃ ဦးသေဆုံးပြီး
ဒေသခံ ၂၀ ကျော် ဒဏ်ရာရရှိခဲ့သည်။
အလားတူ ပုဏ္ဏားကျွန်းမြို့နယ်
ဆင်အင်းကြီးရွာတွင် နိုဝင်ဘာ ၁၀ ရက်နေ့က ရွာထဲကို ဝင်လာသည့် စစ်ကောင်စီစစ်ကြောင်း
တစ်ခုက အသက် ၉၀ အရွယ် အဖွားအိုတစ်ဦးအပါအဝင် ရွာသား ၉ ဦးကို အကြောင်းမဲ့သတ်ဖြတ်ပစ်ခဲ့သည်။
စစ်ကောင်စီတပ်သည်
စစ်ပွဲကာလအတွင်း အေးချမ်းစွာနေထိုင်ကြသည့်အပြစ်မဲ့ပြည်သူများကို အကြောက်တရားလွှမ်းမိုးအောင်
ရည်ရွယ်၍ တိုက်ပွဲလုံးဝမရှိဘဲ ရပ်ရွာများကို လက်နက်ကြီး၊
လက်နက်ငယ်များဖြင့် ပစ်ခတ်ပြီး ယင်းပစ်ခတ်မှုများမှာ ULA/AA ကပစ်ခတ်ခြင်းဖြစ်သည်ဟု
လုပ်ကြံဝါဒဖြန့်မှုတွေလည်းရှိခဲ့သည်ဟု ဦးခိုင်သုခက ပြောသည်။
စစ်ကောင်စီတပ်က
ကုန်းလမ်းနှင့် ရေလမ်းတို့ကိုပိတ်ပင်ထား၍ ပြည်သူများ အသွားအလာပြတ်တောက်ကာ
စားနပ်ရိက္ခာများပြတ်တောက်နေသည့်အတွက် ရခိုင်ပြည်သူလူထု
ရင်ဆိုင်နေရသည့်အခက်အခဲများကို ဖြေရှင်းနိုင်ရန်ရည်ရွယ်ပြီး အပစ်အခတ်
ရပ်စဲလိုက်ခြင်းဖြစ်သည်ဟု ဦးခိုင်သုခက
ယနေ့သတင်းစာရှင်းလင်းပွဲတွင် ပြောဆိုသွားသည်။