တိုက်ပွဲပြန်ဖြစ်/မဖြစ်မှာ ရှေ့ဖြစ်လာမယ့်အခြေအနေပေါ်မူတည်၊ အမြင်မတူသူများ၏ ဝေဖန်မှုအပေါ် လက်ခံကြောင်း AA ပြော

နိရဥ္စရာ၊ နိုဝင်ဘာ ၂၈/၂၀၂၂

ရက္ခိုင့်တပ်တော်(AA) နှင့် စစ်ကောင်စီတို့အကြား အလွတ်သဘောနှစ်ဘက်အပစ်အခတ် ရပ်စဲထားသော်လည်း တိုက်ပွဲပြန်ဖြစ် မဖြစ်မှာ ရှေ့ဖြစ်လာမယ့် အခြေအနေပေါ်မူတည်ကြောင်းနှင့် အပစ်ရပ်စဲလိုက်သည့်အပေါ် ပြောဆိုဝေဖန်မှုအပေါ်တွင်လည်း လက်ခံကြောင်း ရက္ခိုင့်တပ်တော်(AA) ပြောခွင့်ရ ဦးခိုင်သုခက ပြောသည်။

"ကြိုပြောလို့တော့မရပါဘူး။ စာရွက်စာတမ်းနဲ့ လက်မှတ်ထိုးထားတာလည်း မဟုတ်ဘူး။ ကျနော်တို့ဟာ နှစ်ဘက်အလွတ်သဘောတူထားတာပဲ ဖြစ်တဲ့အတွက် တစ်ဘက်ဘက်က တစ်ခုခုလုပ်လာလို့ရှိရင် အချိန်မရွေးတိုက်ပွဲတွေလည်း ပြန်ဖြစ်လာနိုင်ပါတယ်။ ဖြစ်မဖြစ်ကတော့ ရှေ့မှာဖြစ်လာမယ့်အခြေအနေအပေါ်ပဲ မူတည်တယ်လို့ ကျနော့ အနေနဲ့ပြောချင်ပါတယ်"ဟု ပြောဆိုခဲ့သည်။ 

ယနေ့ ပြုလုပ်သည့် (၆)ကြိမ်မြောက် အေအေသတင်းစာရှင်းလင်းပွဲတွင် သတင်းထောက် တစ်ဦး၏မေးခွန်းကို ဦးခိုင်သုခကဖြေကြားစဉ် ထိုသို့ ပြောကြားသွားခြင်းဖြစ်သည်။

ယခုကဲ့သို့ တကျော့ပြန်တိုက်ပွဲများ (၄) လကြာပြင်းပြင်းထန်ထန်ဖြစ်ပွားနေစဉ်မှာပင် ရုတ်တရက်အပစ်အခတ်ရပ်စဲမှုအပေါ် ဝေဖန်မှုတချို့လည်းရှိနေသည့်အတွက် အမြင်အမျိုးမျိုးဖြင့် ဝေဖန်နေသူများအနေနှင့်လည်း မကြာခင်နားလည်လာလိမ့်မည်ဟု ပြောဆိုခဲ့သည်။ 

"ကျနော်တို့အနေနဲ့ကတော့ အမြင်မတူတာတွေကို လက်ခံပါတယ်။ သို့သော် စစ်ပွဲပြင်းထန်တဲ့ကာလမှာ ဘယ်နိုင်ငံကိုပဲကြည့်ကြည့် လိုအပ်လာရင်တော့ အပစ်ရပ်စဲတာက ရှိကြတာပါပဲ။ ကျနော်တို့ ULA/AA အနေနဲ့  ပြည်သူတွေရဲ့ လတ်တလောရင်ဆိုင်နေရတဲ့ အခက်အဲတွေကိုဖြေရှင်းနိုင်ဖို့ ပြည်သူတွေကို ဦးထိပ်ထားပြီး ဒီကိစ္စကိုလုပ်တယ်ဆိုတာကိုလည်း အတိအလင်းပြောထားပြီးဖြစ်ပါတယ်။ အမြင်အမျိုးမျိုးနဲ့ ပြောနေကြသူတွေကိုတော့ မကြာခင် သူတို့လည်း သဘောပေါက်လာလိမ့်မယ်လို့ ဖြည့်စွက်ပြောလိုပါတယ်" ဟု ပြောသည်။

ရက္ခိုင့်တပ်တော်(AA) အနေနှင့် ရက္ခိုင်ပြည်သူလူထု၏ လတ်တလော ရင်ဆိုင်ကြုံတွေ့နေရသည့် အခက်အခဲကို ဖြေရှင်းနိုင်ရန်တွက် အပစ်အခတ်ရပ်စဲခဲ့ခြင်းဖြစ်သဖြင့်  အခြေအနေအရအချိန်မရွေးတိုက်ပွဲများ ပြန်ဖြစ်လာနိုင်သည်ဟု သတင်းစာရှင်းလင်းပွဲတွင် အလေးထား ပြောဆိုသွားခဲ့သည်။

ရက္ခိုင့်တပ်တော်(AA) နှင့် စစ်ကောင်စီတို့သည် နိုဝင်ဘာ (၂၆) ရက်နေ့က နီပွန်ဖောင်ဒေးရှင်းဥက္ကဌ မစ္စတာဆာဆာကာဝါ၏ ကြားဝင်ညှိနှိုင်းမှုဖြင့် အလွတ်သဘော အပစ်အခတ်ရပ်စဲခဲ့ကြခြင်း ဖြစ်သည်ဟု သိရသည်။

ရခိုင်တွင် ယခုနှစ် သြဂုတ်လမှစကာ တကျော့ပြန်စစ်ပွဲများပြန်လည်ဖြစ်ပွားခဲ့ပြီး (၄) လအကြာတိုက်ပွဲများအတွင်း စစ်ကောင်စီက လူထုကို ဦးတည်တိုက်ခိုက်မှုများကြောင့် စက်တင်ဘာ ၂၀ ရက်နေ့မှ နိုဝင်ဘာ ၂၇ ရက်အထိ အပြစ်မဲ့ပြည်သူ (၂၆)ဦးသေဆုံးပြီး (၁၁၁)ဦး ထိခိုက်ဒဏ်ရာရရှိခဲ့ကြောင်း ဦးခိုင်သုခက ပြောသည်။

ယင်းအပြင် ဒေသခံပြည်သူများကို အေအေသံသယဖြင့် ဖမ်းဆီးမှုများကြောင့် တကျော့ပြန်တိုက်ပွဲကာလအတွင်း ရခိုင်ပြည်သူ (၃၂၄) ဦးဖမ်းဆီးခံခဲ့ရကြောင်း သိရသည်။ (NN-7)