နိရဉ္စရာ၊ဒီဇင်ဘာ ၂/၂၀၂၂

ရခိုင်ပြည်နယ်၊စစ်တွေမြို့ရှိ စက်သုံးဆီအရောင်း ဆီဆိုင်ကြီးများတွင် စက်သုံးဆီများ ဆက်လက်ပြတ်လပ်နေဆဲဖြစ်သည်ဟုသိ၇သည်။

ရခိုင်ပြည်နယ်ဆီလုပ်ငန်းရှင်များအသင်းမှ အတွင်းရေးမှူးကိုအောင်ထိုက်က "စစ်တွေတစ်မြို့လုံးကဆီဆိုင်တွေမှာတော့ ဆီမရှိတော့ဘူး။ ပြီးခဲ့တဲ့ နိုဝင်ဘာ ၁၀ရက်နေ့ကနေဒီနေ့အထိ ၂၂ရက်နေ့အထိ ကားလမ်းပိတ်ထားတယ်။ ကားတွေဝင်ခွင့်ရမှ ဆီတွေ၇မယ်။ကျွန်တော့်အနေနဲ့တော့ ကားလမ်းကို အမြန်ဆုံးပြန်ဖွင့်ပေးစေချင်တယ်"ဟု ပြော သည်။

စက်သုံးဆီအရောင်းဆီဆိုင်ကြီးများတွင် စက်သုံးဆီများပြတ်လပ်နေ၇ခြင်းမှာ ရန်ကုန် - စစ်တွေကားလမ်းမရှိ စစ်တွေ - ပုဏ္ဏားကျွန်းကားလမ်းကို စစ်ကောင်စီတပ်ကပိတ်ပင်ထား၍ ရန်ကုန်မှ တင်သွင်းသယ်ယူလာသည့် ဆီသယ်ကားများမှာ စစ်တွေသို့မရောက်ရှိဘဲပုဏ္ဏားကျွန်းမြို့လမ်းတစ်ဝက်တွင်ပိတ်မိနေခြင်းကြောင့်ဖြစ် သည်ဟု သိ၇သည်။

"ဆီပြတ်လပ်နေတာကတော့ကြာပါပြီ။ဆီပြတ်လပ်၇တဲ့ အကြောင်းရင်းကတော့ကားလမ်းတွေကိုပိတ်ထားတယ်။ ဖြတ်သန်းသွားလာခွင့်မပြုဘူး။  ဆီသယ်လာတဲ့ကားတွေလည်း မြို့ထဲ ဝင်မလာနိုင်တော့ဘူး။ ပိတ်မိနေတယ်။ နိုဝင်ဘာလအစောပိုင်းကတော့လက်ကျန်ဆီတွေကိုရောင်းချတယ်။ လမ်းပိတ်ထားတာကိုလည်းဖွင့်နိုးနိုးနဲ့ မျှော်နေ၇တာပေါ့။ ဒါပေမဲ့ ဒီနေ့ချိန်ထိ လမ်းမဖွင့်ပေးတော့ဆီကားတွေလည်း ပိတ်မိတယ်။လက်ကျန်ဆီတွေလည်း ရောင်းချရင်းကုန်တယ်။ အခုတော့  ဆီပြတ်လပ်နေတာကြာပါပြီ" ဟု အမည်မဖော်လိုသည့် စက်သုံးဆီအရောင်းဆီဆိုင်ကြီးမှမန်နေဂျာတစ်ဦးက ပြောသည်။

 ထိုသို့ကားလမ်းများကို ပိတ်ပင်ထား၍စစ်တွေမြို့ရှိစက်သုံးဆီအရောင်း ဆီဆိုင်ကြီး ၅ဆိုင်စလုံးတွင်း စက်သုံးဆီများပြတ်လပ်နေကာသုံးဘီး၊ ဘေးတွဲဆိုင်ကယ်မောင်းနှင်သူများမှာ လမ်းဘေးတွင်ဆီလီတာအလိုက်ချရောင်းနေသည့် အရောင်းဆိုင်တို့မှ အောက်တိန်း 92 ၁လီတာလျှင်၃၂၀၀ကျပ်မှ ၃၅၀၀ကျပ်အထိ ပေးဝယ်သုံးစွဲနေ၇သည်ဟု ဘေးတွဲဆိုင်ကယ်မောင်းနှင်သူတစ်ဦးကပြောသည်။

 "ဆီဆိုင်ကြီးတွေမှာတော့ ဆီပြတ်လပ်နေလို့ဆီဆိုင်တွေအကုန်လုံးပိတ်ထားတယ်။ လမ်းဘေး ချရောင်းနေတဲ့ ဆိုင်တွေဆီကလီတာအလိုက် အောက်တိန်း92 ၁လီတာကို၃၂၀၀ကျပ်ကနေ ၃၅၀၀ကျပ်အထိ ကိုယ်ရောင်းကိုယ့်ဈေးတဲ့ဆီပြတ်လို့ဈေးတက်တယ် ဆိုပြီးပေးဝယ်နေ၇တယ်။ အရင်တုန်းကဆီဆိုင်ကြီးကနေဆီ ၅၀၀၀ကျပ်ဖို့ ဆီဖြည့်ရင် တစ်နေကုန် မောင်းနှင်လို့၇တယ်။အခုတော့ ဆီ၁လီတာကို ၃၅၀၀ကျပ်ပေးပြီးတော့  မြို့ထဲကယ်ရီ ၂ခေါက်ဆွဲ၇တယ်၊ ကုန်ပြီ"ဟုပြောသည်။

 ယနေ့ထုတ်မြန်မာ့အလင်း သတင်းစာတွင်သတ်မှတ်ထားသည့် စက်သုံးဆီဈေးနှုန်းအ၇  92 အောက်တိန်း တစ်လီတာကို ၂၁၃၅ကျပ်၊95 အောက်တိန်းတစ်လီတာကို ၂၂၁၀ကျပ်၊ ရိုးရိုးဒီဇယ်ဆီ တစ်လီတာကို ၂၅၆၅ကျပ်နှင့်၊ဒီဇယ်ဆီတစ်လီတာကို ၂၆၄၀ကျပ်ရှိကြောင်း ဖော်ပြထားသည်။

 ပုဏ္ဏားကျွန်းတွင် ပြီးခဲ့သည့်နိုဝင်ဘာလ၁၀ရက်နေ့၊ နံနက် ရ နာရီကျော်ခန့်က ပုဏ္ဏားကျွန်းမြို့နယ် ဆင်အင်းကြီးနှင့်ပဒေသာကျေးရွာကြားရှိ ရန်ကုန်-စစ်တွေ ကားလမ်းမပေါ်တွင် စစ်ကားတစ်စီး မိုင်းဆွဲခံရပြီးနောက် ရန်ကုန် -စစ်တွေကားလမ်းမကို စစ်တပ်ကပိတ်ပင်လိုက်၍ ကုန်ကားများ၊ ခရီးသည်တင်ကားများအပြင်ဆီသယ်ကားများမှာရက်ပေါင်း၂၂ရက်ကြာသည့်တိုင်(ယနေ့အချိန်ထိ)ပိတ်မိနေခြင်းဖြစ်သည်။

 ရက္ခိုင့်တပ်တော်(AA)နှင့်စစ်ကာင်စီတို့ ပြီးခဲ့သည့်နိုဝင်ဘာလ ၂၆ရက်နေ့က အလွတ်သဘော အပစ်အခတ် ရပ်စဲလိုက်သည်မှာ ၄ရက်ကြာမြင့်လာပြီဖြစ်သော်လည်းရန်ကုန် - စစ်တွေ ကားလမ်းမကို စစ်ကောင်စီတပ်မှပြန်လည်ဖွင့်လှစ်ပေးခြင်းမရှိ၍ကုန်ကားများ၊ ခရီးသည်တင် ကားများအပြင် ရန်ကုန်မှစက်သုံးဆီများတင်ယူလာသည့် ဆီသယ်ကားများလည်း ပိတ်မိနေခြင်း ဖြစ်သည်။(NN-12)