မောင်တောတွင် မိုင်းနင်းမိ၍ နောက်ထပ် လူငယ်တစ်ဦး ခြေထောက်တစ်ဖက်ပြတ်သွား

နိရဉ္စရာ၊ ဒီဇင်ဘာ ၃/  ၂၀၂၂

ယမန်နေ့က ဘူးသီးတောင်မြို့နယ်တွင် မွတ်ဆလင် လူငယ်တစ်ဦး မိုင်းပေါက်ကွဲ၍ ဒဏ်ရာရရှိသွားခဲ့ပြီး ယနေ့ ဒီဇင်ဘာ ၃ ရက်နေ့တွင်  မောင်တောမြို့နယ်တွင် ဒေသခံမြိုလူငယ်တစ်ဦး မိုင်းနင်းမိ၍ ခြေထောက် တစ်ဖက်ပြတ်သွားသည်ဟု သတင်းရရှိသည်။

ယနေ့ မိုင်းနင်းမိ၍ခြေထောက်တစ်ဖက်ပြတ်သွားသူမှာ မောင်တောမြို့နယ်၊ ဝက်ကျိန်းရွာသစ် (မြိုရွာ)မှ  ကိုကိန်းပေါ် (၁၈)နှစ်ဖြစ်သည်ဟု သိရသည်။

သူသည် ယနေ့ဒီဇင်ဘာလ ၃ရက်၊ နေ့လယ် ၁၂ နာရီအချိန်ခန့်၌ မင်းကြီးရွာသစ်မြောက်ဘက်၊ ဝက်ကျိန်းဘုရားသွားလမ်း၊ဝက်ကျိန်းရွာသစ်၏ တောင်ဖက်ရှိ တောင်ပေါ်သို့ သစ်ခုတ်ရန်သွားရာမှ မြေမြှပ်မိုင်းနင်းမိကာ ပေါက်ကွဲမှုဖြစ်ပြီး ထိခိုက်ဒဏ်ရာရရှိသွားခြင်းဖြစ်သည်ဟုသိရသည်။

"ရွာကလူတွေနဲ့ သစ်သွားခုတ်တာလို့တော့ပြောတယ်။တောင်ပေါ်ရောက်တော့ မြေမြှပ်မိုင်းနင်းမိပြီးတော့ ပေါက်ကွဲပြီး ထိခိုက်ဒဏ်ရာရသွားတာ။ ဘယ်ခြေထောက် တစ်ဖက်ပြတ်သွားတယ်လို့သိရတယ်" ဟု ဒေသခံတစ်ဦးက ပြောသည်။

အဆိုပါမိုင်းနင်းမိ၍ ပေါက်ကွဲမှုဖြစ်ကာ ကိုကိန်းပေါ်၏ ဘယ်ခြေထောက် ခြေချင်းဝတ်နားမှ ပြတ်ထွက်သွားပြီး ဒဏ်ရာအပြင်းအထန်ရရှိသွားသည့်အတွက် ကိုကိန်းပေါ်ကို မောင်တောမြို့ ဆေးရုံသို့ အရေးပေါ်ပို့ဆောင်လိုက်ရသည်ဟု သိရသည်။

အဆိုပါသတင်းနှင့် ပတ်သက်ပြီး အသေးစိတ်သိရှိနိုင်ရန် မောင်တောမြို့နယ်မှူးရုံးနှင့် ထွေအုပ်ရုံးသို့ ဆက်သွယ်ရာ ဖုန်းလက်ခံဖြေဆိုခြင်းမရှိသေးပါ။

ယမန်နေ့ ဒီဇင်ဘာ ၂ ရက်နေ့ကလည်း ဘူးသီးတောင်မြို့နယ် ဂူတာပြင်တောင်ရွာကျေးရွာမှ မူဆလင်လူငယ်တစ်ဦးဖြစ်သူ မောင်အုစ်ခန်ဂေါ်နီ အသက် (၁၈) နှစ်သည် တောင်ပေါ်သို့ နွားရှာသွားရာမှ မိုင်းနင်းမိပြီး ခြေထောက်တွင်  ထိခိုက်ဒဏ်ရာရရှိသွားကြောင်း သိရသည်။( NN-12)

(ဓာတ်ပုံ- အင်တာနက်)