အငူမော်-မောင်တောကားလမ်းကို ယနေ့ပြန်ဖွင့်

နိရဥ္စရာ၊ ဒီဇင်ဘာ ၄/၂ဝ၂၂

မောင်တောကနေ စစ်တွေကို ဆက်သွယ်ထားသည့် လူသွားလူလာများသည့်   အငူမော်-မောင်တောကားလမ်းကို ယနေ့ ဒီဇင်ဘာ ၄ ရက်နေ့တွင် ပြန်လည် ဖွင့်ပေးလိုက်ကြောင်း သတင်းရရှိသည်။

ယနေ့ နံနက်ပိုင်းကစကာ အငူမော်-မောင်တောကားလမ်းပေါ်ရှိ အငူမော်ဂိတ်နှင့် အင်းဒင်ဂိတ်တို့က သွားလာခွင့် ပြန်ဖွင့်ပေးလိုက်ခြင်းဖြစ်ကြောင်း ကားသမားတစ်ဦးက ပြောသည်။ 

 "ဒီနေ့ ဖွင့်ပါပြီ။ အင်းဒင်ဂိတ်ရော၊ အငူမော်ဂိတ်ရော ဖွင့်ပေးပါပြီ။ မနက်ကနေ စစ်တွေလမ်းဖွင့်ရင်တော့ ဖွင့်တော့မလားဆိုပြီး အခြေအနေတွေ သွားကြည့်နေတာ။ ကားတွေတော့ သွားတာမတွေ့ဘူး။ ဆိုင်ကယ်တွေကိုတော့ အကျိုးအကြောင်းပြောသွားရင်ခွင့်ပြုတာတွေ့တယ်။ ခုနကမှ ကားတွေပါ သွားလာလို့ရပြီလို့ သိရတယ်" ဟု ပြောသည်။

 အဆိုပါ အငူမော်-မောင်တော ကားလမ်းကို ရသေ့တောင်မြို့နယ်၊ ဒုံးပိုက် ကျေးရွာနှင့် ချိန်ခါလီကျေးရွာအနီး ကားလမ်းတွင် တိုက်ပွဲ ဖြစ်ပွားခဲ့ပြီးနောက် စစ်ကောင်စီက သြဂုတ်လ ၁၃ ရက်နေ့ကတည်းက (၄) လကျော်ကြာ ပိတ်ထားခဲ့သည်။

 နိုဝင်ဘာ ၂၆ ရက်က ရက္ခိုင့်တပ်တော်နှင့် စစ်ကောင်စီတို့ အလွတ်သဘော အပစ်ရပ်ပြီး နောက်တစ်နေ့ နိုဝင်ဘာ ၂၇ ရက်နှင့် ၂၈ ရက်တွင် ၂ ရက်တာ ဖွင့်လှစ်ပေးခဲ့သည်။

၎င်းနောက် ထပ်မံပိတ်ထားလိုက်ပြီး ၆ ရက် ခန့်အကြာတွင် ပြန်ဖွင့်လှစ်ပေးခြင်းဖြစ်သည်။  

မောင်တော- အငူမော်ကားလမ်းသည် လူသွားလူလာများပြီး စီးပွားရေးနှင့် ကုန်သွယ်ရေး အရလည်း အရေးပါသော လမ်းဖြစ်သဖြင့် ဒေသခံ ပြည်သူများအဖို့ အထူးအခက်အခဲနှင့် အကျပ်အတည်းဖြစ်ခဲ့ကြရသည်။ ထိုသို့ လမ်းကို ပိတ်ဆို့ထားသဖြင့် ရသေ့တောင်၊ ဘူးသီးတောင် နှင့် မောင်တောတို့မှ စစ်ဘေးရှောင်များသည်လည်း စားနပ်ရိက္ခာအခက်အခဲကို အကြီးအကျယ် ရင်ဆိုင်ခဲ့ကြရကြောင်း ဒေသခံများက ပြောသည်။

လက်ရှိတွင် နိုဝင်ဘာလ ၂၆ ရက်မှစတင်ကာ စစ်ကောင်စီတပ်နှင့် AA တို့ နားလည်မှုဖြင့် ယာယီအပစ်အခတ်ရပ်စဲပြီးနောက် ရခိုင်၌ စစ်ကောင်စီဘက်က ပိတ်ထားသည့် ကုန်းလမ်း၊ ရေလမ်းများကိုလည်း တဖြည်းဖြည်း ဖွင့်ပေးနေခြင်း ဖြစ်သည်။

ယမန်နေ့က ၃ လကျော်ကြာပိတ်ထားသည့် ကျောက်တော်-ပလက်ဝရေကြောင်းလိုင်းကို စစ်ကောင်စီဘက်က ပြန်လည်ဖွင့်ပေးခဲ့ပြီး စစ်တွေတပ်ထိန်းဂိတ်ကိုပါ သွားလာခွင့်ပြုခဲ့သည်။ 

စစ်တွေ-ပေါက်တော-မြောက်ဦး-မင်းပြား ရေကြောင်းလိုင်းများ ကိုလည်း ပြီးခဲ့သည့်ရက်ပိုင်းက ပြန်လည်ဖွင့်လှစ်ပေးခဲ့သည်။

 စစ်တွေ- ရေချမ်းပြင်-အငူမော်ရေကြောင်းလိုင်းကိုမူ ပြီးခဲ့သည့်ရက်ပိုင်းက ပြန်လည်ဖွင့်လှစ်ပေးခဲ့သော်လည်း ပြန်လည်ပိတ်ပင်လိုက်သဖြင့် နောက်ထပ် ပြန်ပိတ်မည်ကို ပြည်သူများအနေဖြင့် မလိုလာကြောင်း ဒေသခံများက ပြောဆိုသည်။(NN-7)