နိရဉ္စရာ၊ ဒီဇင်ဘာ ၅/၂၀၂၂

ရခိုင်ပြည်နယ်၊ ရသေ့တောင်မြို့ပေါ်ရှိ စစ်ဘေးရှောင်များနှင့် ဒေသခံများအတွက် ရေသွယ်ရန်ပိုက်များ စီစဉ်ပေးပြီး အုတ်ကန်များကို တည်ဆောက်ထားပေးထားသော်လည်း မြို့နယ်စည်ပင်က ရေပေးဝေရေးကို ခွင့်မပြု၍ စစ်ဘေးရှောင်များနှင့် ဒေသခံများမှာ သောက်သုံးရေ  မဖြစ်နေကြောင်း သတင်းရရှိသည်။

ရသေ့တောင်မြို့ပေါ်တွင် ပြီးခဲ့သည့်နှစ်က ICRCနှင့် လွှတ်တော်ကိုယ်စားလှယ်ဟောင်းတစ်ဦး စုပေါင်းပြီး စစ်ဘေးရှောင်များနှင့် ဒေသခံများအသုံးပြုရန်အတွက် သွပ်အမိုးနှင့်အုတ်ကန် ၅ ကန်လှူဒါန်းပေးခဲ့ခြင်းဖြစ်ကြောင်း၊ တစ်နှစ်ကျော်ကြာမြင့်နေပြီဖြစ်သော်လည်း ရေပေးဝေမှုကို မစတင်နိုင်သေးကြောင်း  ရသေ့တောင်မြို့ အရှေ့တောင်ရပ်ကွက်အုပ်ချုပ်ရေးမှူး ဦးကျော်သန်းလှိုင်က နိရဉ္စရာကို ပြောသည်။

"စစ်ဘေးရှောင်တွေက ကျနော်တို့မြို့မှာ တစ်သောင်းလောက်ကို ခန့်မှန်းပါတယ်။ အဲဒီလူတွေက ဒီကန်တွေကို မှီခိုပြီးသုံးနေရတာပါ။ ကျနော်တို့ရပ်ကွက်မှာဆိုရင်လည်း မြေသားကန်တစ်ကန်ပဲ ရှိတာပါ၊ လုံးဝအသုံးပြုလို့အဆင်မပြေပါဘူး။ အဲဒီကန်တွေကို လှူတဲ့သူတွေကလှူထားပါပြီ။ အဲဒီကန်တွေကို လုံးဝရေမသွယ်ပေးဘူး။ အထက်ကိုလည်း စာတွေနဲ့တင်ပြပြီးပါပြီ။ ဒါပေမယ့် ရေမပေးဘူး။ အားလုံးပိုက်လိုင်းတွေက ရောက်ပြီးသားနေရာတွေပါ။ သူတို့(စည်ပင်ဦးစီး)ကို ပြောရင်လည်း အပြတ်ငြင်းပါတယ်။ အခုရပ်ကွက်ရပ်ကွက်သားတွေကလည်း ပေါက်ကွဲနေကြပါပြီ။ ရေနဲ့ပတ်သက်တဲ့ပြသနာတွေကို အမြဲတမ်းခံစားနေကြရပါတယ်" ဟုပြောသည်။

အဆိုပါအုတ်ကန်များအနက် အုတ်ကန်တစ်ကန်ကို လှူဒါန်းခဲ့သည့်အချိန်မှစ၍ ရက်ပိုင်းခန့် အကြာထိသာ သုံးစွဲခဲ့ရကာ မြို့နယ်စည်ပင်မှ စည်ပင်ဦးစီးက ရေဖြတ်ခိုင်း၍ ဖြတ်ထားသဖြင့် ရေအသုံးပြုခွင့်မရသည်မှာ တစ်နှစ်ကျော်ခန့်ကြာမြင့်နေပြီဖြစ်ကြောင်း ဒေသခံများကပြောသည်။

အဆိုပါကန်များတွင် ရေမရရှိသည့်ကိစ္စနှင့်ပတ်သက်၍ မြို့နယ်အစည်းအဝေးများ ကျင်းပရာတွင်လည်း ရပ်ကွက်အုပ်ချုပ်ရေးမှူးများမှ တင်ပြမှု၊ တောင်းဆိုမှုများရှိခဲ့သော်လည်း လက်ရှိအချိန်အထိ ရေပေးဝေးခြင်း မရှိသေးကြောင်း ၎င်းက ပြောဆိုသည်။

အဆိုပါအုတ်ကန်များတွင် မြို့နယ်စည်ပင်မှ ရေပေးဝေမှုမရှိသဖြင့် စစ်ဘေးရှောင်များမှာ အနီးအနားရှိ မြေသားကန်များကို မှီခိုနေကြရပြီး ရေမသန့်ရှင်းမှုများကြောင့် ယားနာများဖြစ်နေကြရကြောင်းလည်း ရသေ့တောင်မြို့မှ စစ်ဘေးရှောင်အမျိုးသမီးတစ်ဦးကပြောသည်။

"စလို့လှူထားကတည်းကနေ အခုထိရေမသုံးရသေးတာပါ။ သုံးရေကိုဆိုရင် စခန်းအနောက်ကန်က သုံးရပါတယ်။ သောက်ရေကိုကျတော့ ပဒေကာကန်ကနေခပ်ယူပြီးတော့ သုံးရပါတယ်။ အခုသုံးနေရတဲ့ စခန်းအနောက်ကကန်ဆိုရင် မြက်တွေပေါက်နေပြီး လုံးဝမသန့်ပါဘူး။ အဲဒီရေကိုသုံးလို့ အားလုံးယားနာတွေပေါက်နေကြပါတယ်။ အရမ်းယားတယ်၊ ဒါပေမယ့်အဲဒီကရေတွေနဲ့ပဲ ထမင်းချက်ရတယ်၊ ရေချိုးရတယ်။ ရေတွေကအားလုံးရဲနေတယ်၊ ဒါပေမယ့်သုံးနေရပါတယ်။ အားလုံးယားနာတွေ ပေါက်ကြလို့ ဆေးခန်းတွေတောင်သွားကြရပါတယ်။ အုတ်ကန်တစ်ကန် ပေးထားတာလည်း ရေတစ်စက်မှမမြင်ဖူးသေးပါဘူး" ဟုပြောသည်။

အဆိုပါရေပေးဝေရေးကို မြို့နယ်စည်ပင်က တားမြစ်ထားခြင်းနှင့် ပတ်သက်ပြီး စည်ပင်ရုံးသို့ နိရဉ္စရာက ဖုန်းဖြင့်ဆက်သွယ်ရာ မြို့နယ်စည်ပင် ဒုဦးစီးဖုန်းကိုင်ပြီး ၎င်းကိစ္စကို သူမသိကြောင်းနှင့် မြို့နယ်ဦးစီးမှူးကို မေးရမည်ဖြစ်ကြောင်း၊ မြို့နယ်ဦးစီး၏ ဖုန်းကိုလည်း သူ့ခွင့်ပြုချက်မှ ရရှိမှသာ ပေးနိုင်မည်ဖြစ်ကြောင်း ပြောဆိုသည်။

သို့အတွက် ယခုကဲ့သို့ ရေပေးဝေရေးကိုတားမြစ်ထားခြင်းနှင့်ပတ်သက်ပြီး စည်ပင်ဘက်မှ တုံ့ပြန်ပြောဆိုမှုကိုတင်ပြနိုင်ခြင်း မရှိသေးပါ။

ရသေ့တောင်မြို့ပေါ်တွင် စစ်ဘေးရှောင်စခန်းစုစုပေါင်း ၂၀ ကျော်ရှိပြီး စစ်ဘေးရှောင်ဦးရေ တစ်သောင်းခန့်အထိရှိကာ ၎င်းတို့အတွက်လှူဒါန်းပေးထားသည့် အုတ်ကန်များတွင် ရေမရရှိသဖြင့် သောက်ရေ၊ သုံးရေအခက်အခဲများနှင့် ရင်ဆိုင်နေရကြောင်း စစ်ဘေးရှောင်များကပြောသည်။

အဆိုပါအုတ်ကန် ၅ ကန်ကို စစ်ဘေးရှောင်ပြည်သူများအပြင် ရသေ့တောင်မြို့ခံများလည်း သုံးစွဲရန်အလို့ငှါ လှူဒါန်းပေးထားသော်လည်း မြို့နယ်စည်ပင်မှ ရေပေးဝေခြင်းလုံးဝမရှိသည့်အပေါ် ဒေသခံပြည်သူများက ကျေနပ်မှုမရှိဖြစ်နေကြောင်း သိရသည်။

(NN-8)