တောင်ကုတ်ခရိုင်ရွာမှ စစ်ကောင်စီတပ်က ရွာသား ၄ ဦးပိုင် နွား၂၅ကောင်ကို ယူဆောင်သွား

နိရဉ္စရာ၊ ဒီဇင်ဘာ ၅/၂၀၂၂

ရခိုင်ပြည်နယ်၊ တောင်ကုတ်မြို့နယ်၊  ခရိုင်ရွာမှ ရွာသားများပိုင်ဆိုင်သည့် နွားများကို စစ်ကောင်စီတပ်ကဖမ်းဆီးခဲ့ပြီး ၎င်းနွားများအထဲက ရွာသား  ၄ ဦးပိုင်သည့် နွား  ၂၅ ကောင်ကို  နိုင်ငံခြားသို့ တင်ပို့မည့် နွားများဟု ဆိုကာ စစ်တပ်တပ်ရင်းသို့ ယူဆောင်သွားသည်ဟု သတင်းရရှိသည်။

ပြီးခဲ့သည့် ဒီဇင်ဘာလ ၃ ရက်၊ နံနက် ၁၁ နာရီခန့်က ငပလီအခြေစိုက် ၅၅ တပ်ရင်းမှ စစ်ကောင်စီတပ်သားများသည် ခရိုင်ရွာသို့ ရောက်ရှိလာပြီး ဘုန်းတော်ကြီးကျောင်းတွင် စခန်းချကာ ကျေးရွာသားများပိုင်ဆိုင်သည့် နွားများကို ဖမ်းဆီးခဲ့ကြောင်း၊ ၎င်းအထဲမှ ရွာသား ၄ ဦး ပိုင်ဆိုင်သည့် နွားများကို သိမ်းယူသွားကြောင်း ရွာသားတစ်ဦးက ပြောဆိုသည်။

“ လူတစ်ဦးရဲ့ တိုင်ကြားချက်ကြောင့် နွားများကို လာရောက်ရှာဖွေတာလို့ ပြောတယ်။ နိုင်ငံခြားကို ထုတ်မယ်ပေါ့လေ။ စစ်တပ်က ကျေးရွာအတွင်းက  နွားများအားလုံးကို ဖမ်းတယ်။ ကျေးရွာ အုပ်ချုပ်ရေးမှူးက ကျေးရွာသားတဲ့ပိုင်တဲ့ နွားတွေကို အာမခံပေးတဲ့ အတွက် ယူမသွားဘူး။ ရွာသား ၄ ဦးပိုင်တဲ့ နွား ၂၅ ကောင်ကိုတော့ ဖမ်းဆီးပြီး သူတို့ တပ်ရင်းကို ယူသွားတယ်” ဟု ၎င်းက ပြောသည်။

၎င်းရွာသား ၄ ဦးသည် အနီးအနားကျေးရွာများမှ နွားများကို ဝယ်ယူပြီး နိုင်ငံခြားသို့ တင်ပို့ရန် စီစဉ်နေကြောင်း လူတစ်ဦးက အနောက်ပိုင်းတိုင်းမှူးကို တိုင်ကြားရာမှ လာရောက် ဖမ်းဆီးခြင်းဖြစ်ကြောင်း သိရသည်ဟု ၎င်းက ပြောကြားသည်။

နောက်ထပ် ကျေးရွာသားတစ်ဦးက " နွားပိုင်ရှင်တစ်ယောက်ရဲ့သမက်တစ်ယောက်ကိုတော့ ခေါ်ယူပြီးတော့ စစ်ဆေး မေးမြန်းခဲ့ပါတယ်။ အဲဒီလူကိုတော့ တစ်ညလုံးခေါ်ထားပေမယ့် မနက်အာရုဏ်တက်လောက်မှာ သူကထွက်ပြေးသွားတော့ လွတ်မြောက်သွားပါတယ်။ သူထွက်ပြေးသွားလို့ စစ်သားတွေက ရွာမှာ ရှာဖွေခဲ့ပါသေးတယ်။ စစ်သားတွေဆီမှာက သူတို့ဖမ်းမဲ့နွားပိုင်ရှင်တွေရဲ့ နာမည်တွေ၊ စာရင်းတွေတခါတည်းပါလာပြီးသားပါ။ အတိအကျတိုင်ပုံရတယ်" ဟု ပြောဆိုသည်။

တောင်ကုတ်မြို့နယ်တွင် နွားနှင့် သစ်များကို ခိုးထုတ်ပြီး တစ်ဘက်နိုင်ငံ ဘင်္ဂလားဒေ့ရှ်သို့ တင်ပို့ကြကြောင်း၊ ထိုသို့ပို့ဆောင်ရာတွင် ရဲ၊ စသုံးလုံး၊ SB ၊ တပ်ကို ပိုက်ဆံများ ပေးရကြောင်း နောက်ထပ်ခရိုင်ကျေးရွာသားတစ်ဦးက ပြောသည်။

" ဒီဘက်မှာ နွားကုန်သည်အဖွဲ့က ရဲရယ်၊ စသုံးလုံးရယ်၊ SBတွေရယ်၊ တပ်ရယ်ကိုလည်း ပိုက်ဆံတွေ ပေးရပါတယ်။ ဒါပေမယ့်သူတို့တွေက မထင်ရင်မထင်သလိုလည်း ဖမ်းပါတယ်။ သစ်တွေလည်း ခိုးထုတ်လို့ မကျန်တော့ဘူး။ သူတို့လည်း ပိုက်ဆံပေးပြီးခိုးထုတ်ကြတယ်" ဟုပြောသည်။

တောင်ကုတ်မြို့နယ်အတွင်းမှ ခိုးထုတ်သောသစ်များကို ဘင်္ဂလားဒေ့ရှ်နိုင်ငံ တက်ကနက်မြို့ မှ တဆင့် သင်္ဘောများ၊ မော်တော်ဘုတ်များ တင်ပို့ကြပြီး ထိုသို့တင်ပို့ရာတွင် တောင်ကုတ်တပ်နယ်  အရာရှိ အဆင့်ထိ ပါဝင်ပတ်သက်မှုများရှိနေကြောင်း ဒေသခံများက ပြောကြားသည်။

ယခု ဖမ်းဆီးသွားသည့် နွား ၂၅ ကောင်ကို တောင်ကုတ်မြို့အခြေစိုက် ၃၄၆ တပ်ရင်းသို့ ယူဆောင်သွားပြီး ၎င်းနွားများကို တရားရုံးတင်ပြီး ပိုင်ရှင်များကို တရားစွဲ မစွဲ  မသိရသေးကြောင်း  ဒေသခံများက ပြောသည်။  (NN-8)