နိရဥ္စရာ၊ဒီဇင်ဘာ ၇/၂၀၂၂

ရခိုင်ပြည်နယ်၊ဘူးသီးတောင်မြို့နယ်ရှိ စစ်ဘေးရှောင်များအတွက် ဂျပန်နိုင်ငံနီပွန်ဖောင်ဒေးရှင်းကလှူဒါန်းသည့် ဆန်အိတ်ပေါင်း၁ ထောင်ကျော်အနက် ဆန်အိတ် ၅၇၀ ကို စစ်ဘေးရှောင်စခန်းနှင့် စစ်ဘေးရှောင်များမရှိသည့်နေရာ ၃ ခုအတွက်မြို့နယ်ထွေအုပ်က တောင်းခံနေ၍ လှူဒါန်းမည့်အစီအစဥ်ကိုယာယီဆိုင်းငံ့ထားရသည်ဟု သိ၇သည်။
အဆိုပါဆန်အိတ်၅၇၀ ကို ဘူးသီးတောင်မြို့နယ်ရှိမူဆလင်ကျေးရွာ ၃ ရွာအတွက်ဟု အကြောင်းပြကာ မြို့နယ်ထွေအုပ်က တောင်းခံနေခြင်းဖြစ်သည်ဟု သိ၇သည်။

 ယခုဆန်အိတ်များသည် စစ်ဘေးရှောင်များအတွက် ရည်ရွယ်ပြီးလှူဒါန်းသောဆန်အိတ်များဖြင့် စစ်ဘေးရှောင်မဟုတ်သူများကို ထောက်ပံ့ကူညီရန်မှာ မဖြစ်နိုင်ကြောင်း၊စစ်ဘေးရှောင်ဖြစ်ပါက လူမျိုးမရွေး ဘာသာမရွေး ကူညီထောက်ပံ့ပေးသွားမည်ဖြစ်ကြောင်း ဆန်လှူဒါန်းနိုင်ရေးကူညီလုပ်ဆောင်ပေးနေသူ ဦးဝင်းအောင်က နိရဥ္စရာကို ပြောသည်။
"Camp စခန်းမရှိတဲ့၊လူမရှိတဲ့နေရာတွေမှာပါဖြန့်ဖို့စာရင်း အဓိကအထူးသဖြင့် ထွေအုပ်က တောင်းတယ်ပေါ့နော်။ ပြောတာဆိုတာကလည်း ထွေအုပ်နဲ့ နည်းနည်းအဆင်မပြေဘူး။ သူတို့ လက်ဝါးကြီးအုပ်ချင်တယ်။ဆရာကြီး လုပ်ချင်တာပါတယ်။ ကျနော်တို့ကတော့ စာရင်းတွေမပြနိုင်ဘူးဆိုရင်နောက် နီပွန်နဲ့ အစိုး၇နဲ့ မျက်နှာပျက်စရာတွေ ဖြစ်မယ်လေ။ကျနော်ကတော့ နယ်လုံဝန်ကြီးကိုပြောပြီးသား။ စခန်း မရှိ၊လူမရှိရင် အဲဒါကို ဒုတိယအဆင့်ပဲ စဥ်းစားမယ်ပေါ့။ အဲဒါကို ထွေအုပ်ကစခန်း မရှိ၊လူမရှိတဲ့နေရာတွေအတွက် ဆန်အိတ်၅၇၀ ကို အဓမ္မတောင်းထားတယ်ပေါ့။ ကျနော်တို့ကတော့ မပေးဘူး။ အဲဒါကြောင့်ရပ်ထားတာပါ"ဟု ပြောသည်။
ယင်းကျေးရွာ၃ ရွာသည် စစ်ဘေးရှောင် စခန်းလည်းမဟုတ်သလိုစစ်ဘေးရှောင်များလည်း မဟုတ်သည့်အတွက်ပြန်လည်စိစစ်နိုင်ရန်ထောက်ပံ့မည့်အစီအစဥ်ကို ယာယီဆိုင်းငံ့ထား၇ခြင်းဖြစ်သည်ဟုဆိုသည်။

ရခိုင်ပြည်နယ်အတွင်းရှိ စစ်ဘေးရှောင်များအတွက်နီပွန်ဖောင်းဒေးရှင်းက ဆန်အိတ်ပေါင်း ၅ သောင်းကျော်ကိုလှူဒါန်းထားခြင်းဖြစ်ပြီး ယင်းအနက်ဘူးသီးတောင်မြို့နယ်အတွက်ဆန်အိတ်ပေါင်း ၁၁၁၅ အိတ်ကို ခွဲတမ်းရရှိထားခြင်းဖြစ်သည်။
အဆိုပါဆန်အိတ်၁ ထောင်ကျော်အနက် ၅၄၅ အိတ်ကိုဘူးသီးတောင်မြို့ပေါ်ရှိ စစ်ဘေးရှောင်းစခန်းများအား ယမန်နေ့ ဒီဇင်ဘာလ ၆ ရက်တွင် လှူဒါန်းနိုင်ခဲ့ပြီဖြစ်သော်လည်းကျန်ရှိသည့် ဆန်အိတ် ၅၇၀ ကိုမြို့နယ်ထွေအုပ်နှင့် ညှိနှိုင်းမ၇ဖြစ်နေသည့်အတွက် ထောက်ပံ့မည့်အစီအစဥ်ကိုယာယီရပ်ဆိုင်းထား၇ခြင်းဖြစ်သည်ဟု ဦးဝင်းအောင်က ပြောသည်။
ယခုကိစ္စနှင့်ပတ်သက်ပြီးဘူးသီးတောင်မြို့နယ်အုပ်ချုပ်ရေးမှူးကို ဆက်သွယ်ခဲ့သော်လည်း ဖုန်းလက်ခံဖြေကြားခြင်းမရှိခဲ့ပါ။
၇ခိုင်ပြည်နယ်အတွင်းစစ်တွေ၊ ပုဏ္ဏားကျွန်း၊ကျောက်တော်၊ မြောက်ဦး၊ မင်းပြား၊ အမ်း၊ ၇သေ့တောင်၊ ဘူးသီးတောင်၊ မောင်တောစသည့် မြို့နယ်(၉)မြို့နယ်ရှိ စစ်ဘေးရှောင် စခန်းများမှဒုက္ခသည်များအတွက် ဂျပန်နိုင်ငံ နီပွန်ဖောင်ဒေးရှင်းကဆန်အိတ်ပေါင်း ၅ သောင်းကျော်ကို ပြီးခဲ့သည့် မေလမှစတင်ပေးပို့လှူဒါန်းခဲ့ခြင်းဖြစ်သည်။
ဂျပန်နိုင်ငံနီပွန်ဖောင်ဒေးရှင်း ဥက္ကဋ္ဌဆာဆာကာဝါ၏ ၂၀၂၁ ခုနှစ်၊ နိုဝင်ဘာလခရီးစဉ်အတွင်း စစ်ကောင်စီဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့်တွေဆုံစဥ် နှုတ်ဖြင့် ကတိပေး လှူဒါန်းထားခဲ့ခြင်းဖြစ်ပြီးမေလတွင် ပေးပို့ခဲ့ခြင်းလည်းဖြစ်သည်။
သို့ရာတွင်စစ်ကောင်စီဘက်က ၇ခိုင်တွင် တိုက်ပွဲများဖြစ်နေ၍ဟုအကြောင်းပြကာထိုဆန်များကိုလှူဒါန်းခွင့်အား ၆လကြာတားမြစ်ခဲ့သည်။
ယင်းနောက်အနောက်ပိုင်းတိုင်း စစ်ဌာနချုပ်မှတိုင်းမှူးက ပြီးခဲ့သည့် အောက်တိုဘာလ ၉ ရက်တွင် ဆန်လှူဒါန်းခွင့်အားပြန်လည်ခွင့်ပြုပေးခဲ့သည့်အတွက် ယခုကဲ့သို့ လှူဒါန်းနေ၇ခြင်းဖြစ်သည်။
၆လအကြာမှ ယခုကဲ့သို့ လှူဒါန်းခွင့်ပေးလိုက်၍ ဆန်အချို့ ပျက်စီးမှုရှိသွားသည်ဟုလည်းဦးဝင်းအောင်က ပြောဆိုထားသည်။
လက်ရှိတွင်ရခိုင်ရှိ စစ်ဘေးရှောင်စခန်းများ၌အစိုးရက ဆန်ပုံမှန်ထောက်ပံ့ခြင်းမရှိ၍စစ်ဘေးရှောင်များသည် စားနပ်ရိက္ခာအငတ်ဘေးနှင့် ရင်ဆိုင်နေ၇သည်ဟုလည်း စခန်းတာဝန်ခံများက ပြောကြသည်။
ဓာတ်ပုံ- နီပွန်ဖောင်ဒေးရှင်းကလှူဒါန်းသည့်ဆန်အိတ်များကို အမ်းရှိစစ်ဘေးရှောင်များအား လှူဒါန်းခဲ့စဥ်။
Photo - ဦးဝင်းအောင်