မောင်တောတွင် ဖမ်းဆီးခံထားရသည့် မအေးမြစန္ဒာနှင့် ဆိုင်ကယ် ကယ်ရီသမားတို့ကို ၁၇ (၁)ဖြင့် တရားစွဲဆိုလိုက်ပြီဟုသတင်းထွက်နေသော်လည်း မိသားစုများအနေဖြင့်တစ်စုံတစ်ရာ မသိရသေးဟု မောင်ဖြစ်သူကပြောဆို


နိရဥ္စရာ၊ ဒီဇင်ဘာ ၈/၂၀၂၂

 

မောင်တောမြို့နယ်၊ ကြိမ်ချောင်းနယ်ခြားစောင့် အမှတ်(၂၄) စစ်ဆေးဂိတ်တွင် ဖမ်းဆီးခံလိုက်ရသည့်  ယခုနှစ် တက္ကသိုလ်ဝင်တန်းဖြေဆိုမည့် အသက် ၂၀ အရွယ် မအေးမြစန္ဒာနှင့် ဆိုင်ကယ် ကယ်ရီသမား ကိုမောင်မောင်ကျော်တို့ကို မတရားအသင်း ဆက်သွယ်မှု ပုဒ်မ ၁၇(၁) ဖြင့် အမှုဖွင့်လိုက်ပြီး ဒီဇင်ဘာ ၅ ရက်နေ့က ရုံးထုတ်ခဲ့သည်ဟု သတင်းထွက်ပေါ်  နေသော်လည်း အဆက်အသွယ် မရသေး၍ မိသားစုများအနေဖြင့် တစ်စုံတစ်ရာ အတည်ပြု ပြောဆိုနိုင်ခြင်း မရှိသေးကြောင်း အဆိုပါအမျိုးသမီး၏ မောင်ဖြစ်သူ ကိုမျိုးငြိမ်းချမ်းက ပြောဆိုသည်။

 

"မတရားအသင်းဆက်သွယ်မှုပုဒ်မ ၁၇(၁/၂) နဲ့အမှုဖွင့်ခံရတယ်လို့ သတင်းအစအနတွေကြားရတယ်။ တရားစွဲတာနဲ့ပတ်သက်လို့လည်း အတိအကျမသိရဘူး။ ကျွန်တော် ိဘတွေက ဖမ်းဆီးခံရတဲ့ ကြိမ်ချောင်းစခန်းကို သွားတွေ့တော့လည်း တွေ့ခွင့်မရခဲ့ဘူး။ ဒီဇင်ဘာ (၅) ရက်နေ့က ရုံးထုတ်မယ်လို့ သတင်းကြားလို့ မောင်တောတရားရုံးကိုသွားကြည့်ပေမယ့်လည်း ဘာမှမပြောဘူး။ ရုံးလည်း မထုတ်ပါဘူး"ဟု ပြောသည်။ 

 

ဖမ်းဆီးခံထားရသည့် မအေးမြစန္ဒာနှင့် ကယ်ရီသမားတို့နှင့်  ဖမ်းဆီးထားသည်မှာ တစ်လကျော် ရှိလာပြီဖြစ်ပြီး မိသားစုနှင့်တွေ့ခွင့်မရ၍ သူတို့ အခြေအနေမည်သို့ ဖြစ်နေသည်ကို မသိရသေးကြောင်း ၎င်းက ပြောကြားသည်။

 

မင်းပြားမြို့နယ်၊ ပြိုင်းတောကျေးရွာမှ ယခုနှစ်တွင် တက္ကသိုလ်ဝင်တန်းဖြေဆိုမည့် အသက် ၂၀ အရွယ် မအေးမြစန္ဒာနှင့် မောင်တောမြို့နယ်၊ အောင်သပြေကျေးရွာမှ ဆိုင်ကယ် ကယ်ရီသမား ကိုမောင်မောင်ကျော် ဆိုင်ကယ်ဖြင့် မောင်တောမြို့နယ်မြောက်ပိုင်း မင်္ဂလာညွန့်ကျေးရွာမှ မောင်တောသို့ ပြန်လာစဉ် နိုဝင်ဘာလ ၁ ရက်နေ့က ကြိမ်ချောင်းနယ်ခြားစောင့် အမှတ်(၂၄) စစ်ဆေးရေးဂိတ်တွင် ဖမ်းဆီးခံခဲ့ရခြင်းဖြစ်သည်။ 

 

 

"ကျနော်တို့ စိုးရိမ်တာက ဘယ်နေရာမှာ ဘယ်လိုထားလဲ။ ဘယ်လိုရှိနေလဲ။ ကျန်းကျန်းမာမာရော ရှိရဲ့လား။ ပုံမှန်ရော စားသာက်ရသလားဆိုတာတွေ မသိရတဲ့အခါ တော်တော်စိုးရိမ်ပါတယ် မိန်းခလေးဆိုတော့ အစစအရာရာ စိုးရိမ်ရပါတယ်" ဟု ၎င်းက ပြောသည်။ 

 

ယခုကဲ့သို့ တရားရုံးမတင်ဘဲ ဖမ်းဆီးထားသည်မှာ တစ်လကျော်လာပြီဖြစ်သဖြင့် ယခုလုပ်ရပ်မှာ လူ့အခွင့်ရေး ချိုးဖောက်သည်နှင့် တူနေကြောင်း ၎င်းက ဆက်လက်ပြောဆိုသည်။

 

 

"ကျွန်တော်တို့အစ်မဟာ ဒီမတရားအဖွဲ့တွေနဲ့ဆက်သွယ်ပြီး အပြစ်ကျူးလွန်ထားတာမရှိပါဘူး။ မရှိတဲ့အတွက် အခုလိုတရားစွဲခံရတာဟာ လုံးဝမတရားပါဘူး။  အခုလို တစ်လကျော်ထိ မိသားစုနဲ့ တွေ့ခွင့်မပေးဘဲ ချုပ်နှောင်ထားတာဟာ လူ့အခွင့်ရေးချိုးဖောက်တာနဲ့လည်း တူနေပါတယ်"

 

တိုင်းပြည်ကို အုပ်ချုပ်နေသည့် အစိုးရတစ်ရပ်အနေဖြင့် တရားဥပဒေလုပ်ထုံးလုပ်နည်းနှင့်အညီ ဖမ်းဆီးမှုနှင့် ပတ်သက်ပြီး မိသားစုကို အသိပေးအကြောင်းကြားရန် လိုအပ်ကြောင်း၊ တစ်လကျော်သည်အထိ ရုံးလည်း မတင်၊ တရားစွဲဆိုခြင်းလည်းမရှိဘဲ အမျိုးသမီးငယ် တစ်ဦးအပေါ်  ထိန်းသိမ်းထားခြင်းမှာ မဖြစ်သင့်ကြောင်း၊ ဥပဒေကို စောင့်ရှောက်နေသည့် အဖွဲ့အစည်းက ဥပဒေကို မလေးစားဘဲ ချိုးဖောက်နေခြင်းမှာ မဖြစ်သင့်ကြောင်း၊  သူမမှာ တစ်စုံတစ်ရာ အပြစ်ရှိလျှင်တောင်မှ ဥပဒေအရ အကာအကွယ်ရသင့်ကြောင်း အမည်မဖော်လိုသူ ရခိုင်လူ့အခွင်အရေး လှုပ်ရှားနေသူ တစ်ဦးက ပြောသည်။ 

 

လက်ရှိတွင် ရက္ခိုင့်တပ်တော်နှင့် မြန်မာစစ်ကောင်စီတို့ အလွတ်သဘော အပစ်အခတ်ရပ်စဲထားပြီ ဖြစ်သဖြင့် မတရားအသင်းဆက်သွယ်မူ ၁၇(၁) ဖြင့် ဖမ်းဆီးတရားစွဲခံထားရသူများကို မကြာမီ ပြန်လွတ်ပေးမည်ဟုလည်း သတင်းများထွက်ပေါ်နေကြောင်း သိရသည်။

 

ရခိုင်မှာ တကျော့ပြန်တိုက်ပွဲများပြင်းထန်ခဲ့သည့် အောက်တိုဘာလ မှ နိုဝင်ဘာ ၂၃ ရက်နေ့အထိ ဒေသခံ ၃၂၄ ဦးဖမ်းဆီးခံခဲ့ရပြီး (၈၅)ဦး ပြန်လည်လွတ်မြောက်လာသော်လည်း လက်ရှိမှာ (၂၃၉) ဦးအထိဖမ်းဆီးခံထားရဆဲဖြစ်ကြောင်း ရက္ခိုင့်တပ်တော် အေအေပြောခွင့်ရ ဦးခိုင်သုခက ရက္ခိုင့်တပ်တော်(AA)၏ (၆)ကြိမ်မြောက် သတင်းစာရှင်းလင်းပွဲတွင်ပြောသည်။ 

 

ဖမ်းဆီးခံရသူများပြန်လည်လွတ်မြောက်ရေးနှင့် ဆက်လက်ဖမ်းဆီးမှုများမပြုလုပ်ရန် စစ်ကောင်စီနှင့် ညှိနှိုင်းဆောင်ရွက်သွားမည်ဟုလည်း ဦးခိုင်သုခကပြောဆိုထားသည်။ (NN-7)

Share: