နိရဉ္စရာ၊ ဒီဇင်ဘာ ၁၃/၂၀၂၂

စစ်ကောင်စီက မဖမ်းပါဟု ငြင်းဆိုထားသည့် ကျောက်တော်မြို့နယ်၊ ကာဒီရွာမှ ဆန်စက်ပိုင်ရှင်နှင့် အဖော်ဖြစ်သူတို့  ၂ လကျော်ကြာပြီးမှ မတရားအသင်း ဆက်သွယ်မှုပုဒ်မဖြင့် အမှုဖွင့်လိုက်သည်ဟု သတင်းရရှိသည်။  

၎င်းတို့နှစ်ဦးမှာ ကျောက်တော်မြို့နယ်၊ ကာဒီ(ခ)သဇင်ရွာမှ ဆန်စက်ပိုင်ရှင် ဦးလှမောင်သန်း(၄၃)နှင့် အပေါက်၀ကျေးရွာမှ မောင်ချေ(ခ) ဦးမောင်သာစိုး(၃၉)တို့ ဖြစ်ကြသည်။

၎င်းတို့နှစ်ဦးကို အောက်တိုဘာ (၂) ရက် ညနေ ၅ နာရီခွဲတွင် ကျောက်တော်မြို့နယ် ကန်စောက်အခြေစိုက်(၅၃၉)တပ်ရင်း၊ တပ်ရင်းမှူးကတွေ့ဆုံဆွေးနွေးရန် ဖိတ်ခေါ်ပြီး ဖမ်းဆီးခဲ့သည်။

၎င်းနောက်ပိုင်းမှ စ၍ ၎င်းတို့နှစ်ဦးစလုံး ပျောက်ဆုံးနေကြောင်းကို  ဦးလှမောင်သန်း၏ ဇနီးဖြစ်သူက ဒေါ်လှအေးဆန်းက ထုတ်ဖော်ပြောကြားခဲ့သဖြင့်  နိရဉ္စရာသတင်းဌာန အပါအဝင်  သတင်းဌာနများက သတင်းရေးသားဖော်ပြခဲ့သော်လည်း စစ်ကောင်စီဘက်က သူတို့ ဖမ်းဆီးခြင်း မရှိကြောင်း ငြင်းဆိုခဲ့သည်။

ဦးလှမောင်သန်း၏ဇနီးဒေါ်လှအေးဆန်းက " အခု ကျွန်မယောကျာ်းကိုလက်ရှိ စစ်တွေ၊ အမှတ်(၁)မှာ ချုပ်ထားပါတယ်။ ၁၇(၁) နဲ့အမှုဖွင့်တယ်လို့ ပြောပါတယ် ဒီဇင်ဘာလ (၆) ရက်နေ့ ရုံးမှာ ၇မန်ယူတဲ့နေ့ကတော့ ခဏလေးတွေ့ခွင့် ၇လိုက်ပါတယ်"ဟု  ပြောသည်။ 

 လက်ရှိတွင် သူတို့ကို ဖမ်းဆီးခံ၇ပြီး ၂ လကျော်ကြာ ပြီးနောက် ဒီဇင်ဘာ (၆) ရက်နေ့က စစ်တွေ တရားရုံးတွင် မတရားအသင်းဆက်သွယ်မှုပုဒ်မ ၁၇(၁)ဖြင့် အမူဖွင့်ကာချုပ်ရက် ရမန်ယူခဲ့၇ခြင်းဖြစ်သည်။

ယခုကဲ့သို့  မိသားစုကို အသိမပေးသည်သာမကဖမ်းဆီးထားခြင်း မရှိဟု လိမ်လည် ငြင်းဆိုခဲ့သည့် အပေါ်တွင်လည်း စိတ်မကောင်း ဖြစ် မတရားဖမ်းဆီး အမှုဖွင့်ခံ၇သည့် အတွက် စိတ်မကောင်းဖြစ်၇ကြောင်း ၊ ဒီဇင်ဘာ ၁၉ ရက်နေ့ကို ထပ်မံရုံးချိန်းထားကြောင်း သူမက ဆက်ပြောသည်။ 

"သူတို့က မတရားသဖြင့်ခေါ်ပြီး ဖမ်းထားကြတာပါ။ ဘာအပြစ်မှမရှိလို့ တက်နိုင်ရင်တော့ လွတ်အောင် လုပ်ပေးစေချင်ပါတယ်။ ဒီဇင်ဘာလ (၁၉) ရက်မှာလည်း ရုံးချိန်းထားသေးတယ်" ဟုပြောသည်။ 

အောက်တိုဘာ (၂) ရက် ညနေ ၅ နာရီခွဲတွင် ကျောက်တော်မြို့နယ် ကန်စောက် အခြေစိုက်(၅၃၉)တပ်ရင်း တပ်ရင်းမှူးကတွေ့ဆုံး ဆွေးနွေးစရာရှိသည်ဟု ဆိုကာ ဦးလှမောင်သန်းကို ဖုန်းဆက်ခေါ်သဖြင့်  အဖော်ဖြစ်သူ မောင်ချေ(ခ) ဦးမောင်သာစိုးနှင့် အတူသွားစဉ် ပြန်လည်ရောက်ရှိလာခြင်း မရှိဘဲ ဖမ်းဆီးခံခဲ့၇ခြင်းဖြစ်သည်။ (NN-7)