AA နှင့် အပစ်ရပ်ထားပြီဖြစ်သော်လည်း စစ်ကောင်စီက ပလက်၀မှ ညီအစ်ကိုနှစ်ဦးကို ပုဒ်မ ၂ ခုဖြင့်ထောင်၃နှစ်ချ

ရေးသူ: Web Master
| ရက်စွဲ: ၁၆ ဒီဇင်ဘာ ၂၀၂၂
| ကြည့်ရှုသူ: 5.5k

နိရဉ္စရာ၊ ဒီဇင်ဘာ ၁၆/၂၀၂၂

ရက္ခိုင့်တပ်တော် ( AA)နှင့် အပစ်ရပ်စဲထားပြီဖြစ်သော်လည်း စစ်ကောင်စီသည် အရပ်သားများကို ပုဒ်မအမျိုးမျိုးတပ်ကာ ဖမ်းဆီးထောင်ချနေဆဲဖြစ်ကြောင်း သတင်းရရှိသည်။

ယခုလ ဒုတိယပတ်ကလည်း ချင်းပြည်နယ် ပလက်၀မြို့မှ ညီအစ်ကိုနှစ်ဦးဖြစ်ကြသည့် ဦးစောလှ (၂၉) နှစ်နှင့် မောင်ဆန်းဖြိုး (၂၅) နှစ်ကို နိုင်ငံတော် ဆူပူအောင် လှုံ့ဆော်မှုဆိုင်ရာ ဥပဒေ ၅၀၅ (က)နှင့် မတရားအသင်း ဆက်သွယ်မှု ဥပဒေပုဒ်မ ၁၇ (၁) ဖြင့် ထောင် ၃ နှစ်စီချမှတ်လိုက်သည်ဟု မိသားစုအဖွဲ့ဝင် တစ်ဦးက ပြောသည်။

“ အစ်ကိုဖြစ်သူ ဦးစောလှကို ဒီလ ၁၂ ရက်နေ့က နိုင်ငံတော် ဆူပူအောင် လှုံ့ဆော်မှုဆိုင်ရာ ဥပဒေ ၅၀၅ (က)နဲ့ ထောင်ဒဏ် ၃ နှစ်၊ ညီဖြစ်သူ မောင်ဆန်းဖြိုးကို ဒီဇင်ဘာ ၁၄ ရက်နေ့က မတရားအသင်း ဆက်သွယ်မှု ဥပဒေပုဒ်မ ၁၇ (၁)နဲ့ ထောင် ၃ နှစ်စီ အမိန့်ချမှတ်လိုက်ပါတယ်။ ပလက်ဝမြို့နယ် တရားရုံးက ချလိုက်တာပါ”ဟု ၎င်းက ပြောသည်။

သူတို့ နှစ်ဦးကို အောက်တိုဘာလ ၁၃ ရက်နှင့် ၁၄ ရက်နေ့က စစ်ကောင်စီတပ်သားများက လက်ထိပ်ခတ်၊ မျက်နှာဖုံးချုပ်ကာ ဖမ်းဆီးခေါ်ဆောင်သွားခဲ့ပြီး ဖမ်းဆီးခေါ်ဆောင်ရာ လမ်းတစ်လျှောက်တွင်လည်း ဝိုင်းဝန်းရိုက်နှက် သွားခဲ့သည်ဟု မိသားစုဝင်များက ပြောသည်။

“ သူတို့နှစ်ဦးက ရခိုင်လူမျိုး ပန်းရံလုပ်နေသူတွေပါ။ အေအေနဲ့ အပစ်ရပ်လိုက်ပြီဆိုတော့ လွတ်မယ်လို့ မိသားစုတွေက မျှော်လင့်နေကြတာ။ ခုလို အပြစ်မရှိတဲ့သူတွေကို ထောင်ချလိုက်တဲ့ အပေါ် အထူးစိတ်မကောင်း ဖြစ်ရပါတယ်”ဟု ၎င်းမိသားစုဝင်က ဆက်လက် ပြောဆိုသည်။

ချင်းပြည်နယ်၊ ပလက်ဝမြို့နယ်၊ အဘောင်သားကျေးရွာမှ အသက် ၇၀ နီးပါးရှိနေပြီ ဖြစ်သည့် ကျန်းမာရေးချို့ယွင်းနေသည့် သက်ကြီးပိုင်းတစ်ဦးဖြစ်သူ ဦးချစ်စံကို အောက်တိုဘာ ၂၆ ရက်နေ့က မြို့နယ်စစ်ကောင်စီတရားရုံးက နိုင်ငံတော်ဆူပူလှုံ့ဆော်မှုဆိုင်ရာ ပုဒ်မ ၅၀၅(က)ဖြင့် ထောင်ဒဏ် ၃ နှစ်ချမှတ်ခဲ့သည်။