အမ်းတွင် သံတိုသံစများခိုးယူမှုဖြင့် အသက်မပြည့်သေးသည့်စစ်ဘေးရှောင်ကလေးငယ် ၄ဦးနှင့် ဝယ်ယူသူဆိုင်ပိုင်ရှင်ကိုဖမ်းဆီးထား

နိရဉ္စရာ၊ ဒီဇင်ဘာ ၂၁/၂၀၂၂

ရခိုင်ပြည်နယ်၊ အမ်းမြို့တွင် ကွန်ကရစ်လမ်းခင်းသည့်နေရာမှ သံတိုသံစများ ခိုးယူသည်ဟုဆိုကာ  အသက်မပြည့်သေးသည့် စစ်ဘေးရှောင်ကလေးငယ် ၄ ဦးနှင့် အတူ ဝယ်ယူသူဆိုင်ရှင်အား ပြီးခဲ့သည့် ဒီဇင်ဘာလ ၁၆ ရက်မှ ယနေ့အထိ ဖမ်းဆီးချုပ်နှောင်ထားကြောင်း သတင်းရရှိသည်။

ဖမ်းဆီးချုပ်နှောင်ခံထားရသည့် ကလေးငယ်လေးဦးမှာ အမ်းမြို့တွင် စစ်ဘေးရှောင်နေကြသည့် မောင်မောင်လင်း (၇ နှစ်)၊ မောင်ဟန်လင်း (၁၀ နှစ်)၊ မောင်နေလင်းဦး (၁၀ နှစ်)၊ မောင်ဇော်မင်းနိုင် (၉ နှစ်)တို့ဖြစ်ကြသည်။

၎င်းကလေးငယ် ၄ ဦးသည် အမ်းမြို့နယ် ဒါးလက်ချောင်းအုပ်စုမှ ဖြစ်ကြပြီး လက်ရှိ အမ်းမြို့ပေါ်တွင် မိဖများနှင့် အတူ စစ်ဘေးရှောင်နေကြသူများဖြစ်ကြသည်ဟု သိရသည်။

၎င်းတို့လေးဦးသည် ပြီးခဲ့သည့် ဒီဇင်ဘာလ ၁၆ ရက်၊ ညနေပိုင်းက အမ်းမြို့ ဦးဥတ္တမကုန်းအနီးရှိ ကွန်ကရစ်လမ်းခင်းနေသည့်နေရာမှ သံတိုသံစတချို့ကို ကောက်ယူကာ ၎င်းတို့မုန့်ဖိုးရရှိရန်အတွက် သံတိုသံစရောင်းသည့် ဆိုင်တွင် ရောင်းပြီးသည့်နောက်ပိုင်းတွင် ဖမ်းဆီးခံရခြင်းဖြစ်ကြောင်း သိရသည်။

၎င်းတို့ကို ဖမ်းဆီးစဉ်က အမ်းမြို့မရဲစခန်းမှ ရဲသားတစ်ဦးနှင့် ကွန်ကရစ်လမ်းခင်းသည့်နေရာမှ အလုပ်သမား ၂ ဦးတို့လည်း ပါဝင်ကြောင်း မိသားစုဝင်များကပြောသည်။

၎င်းအသက်မပြည့်သေးသည့် ကလေးငယ်လေးဦးကို ပြီးခဲ့သည့် ဒီဇင်ဘာလ ၁၆ ရက်မှစ၍ ယနေ့အထိ ချုပ်ရမန်မယူဘဲ ဖမ်းဆီးချုပ်နှောင်ထားဆဲဖြစ်ပြီး တစ်စုံတစ်ရာ အပြစ်ရှိလျှင်လည်း မိဖများကို ခေါ်ယူကာ ဆိုဆုံးမပြီး ပြန်လွှတ်ပေးသင့်သည်ဟု မိသားစုဝင်တစ်ဦးက ပြောသည်။

"ဖမ်းပြီးတဲ့နောက်မှာတော့ တွေ့ရပါတယ်။ အဲထဲကနေလင်းဦးဆိုတဲ့တစ်ယောက်ကတော့ နေမကောင်း ဖြစ်နေပါတယ်။ သူတို့တွေက မုန့်ဖိုးတစ်ရာ၊ နှစ်ရာလောက်ရဖို့အတွက် ရောင်းချခဲ့တာပဲရှိတာပါ။ အခုထိလေ့ပြန်လွတ်ပေးတာမရှိသေးပါဘူး" ဟု ပြောသည်။

၎င်းတို့လေးဦးကို လက်ရှိအချိန်ထိ အမ်းမြို့မရဲစခန်းတွင် ထိန်းသိမ်းထားပြီး ၎င်းတို့ ကောက်ယူခဲ့သော သံတိုသံစများကို လက်ခံဝယ်ယူခဲ့သည့် ဆိုင်ပိုင်ရှင်အားလည်း ဖမ်းဆီးထိန်းသိမ်းထားကြောင်း သိရသည်။

အဆိုပါအသက်မပြည့်သေးသည့် ကလေးသူငယ်များကို ချုပ်ရမန်မယူဘဲ ဖမ်းဆီးထားသည့်အပြင် ကလေးသူငယ်ဥပဒေပုဒ်မ ၈၄ ကိုမလိုက်နာဘဲ အသက်မပြည့်သေးသည့်ကလေးငယ်များအား မိဘအုပ်ထိန်းသးများထံ မအပ်နှံဘဲဖမ်းဆီးထားခြင်းသည် ဥပဒေကိုကျော်လွန်၍ လုပ်ဆောင်နေသော အပြုအမူဖြစ်သည်ဟု အမ်းမြို့ခံတစ်ဦးက ဝေဖန်ပြောဆိုသည်။

၎င်းတို့အား ယနေ့ ဒီဇင်ဘာလ ၂၁ ရက်တွင် အမ်းမြို့နယ်တရားရုံး၌ ချုပ်ရမန်ယူမည်ဟု သတင်း ကြားရသော်လည်း လက်ရှိနေ့လယ် ၁ နာရီကျော်ချိန်အထိ တစ်စုံတစ်ရာထူးခြားမှု မရှိသေးကြောင်း မိသားစုဝင်များကပြောသည်။

လူမှုရေး လှုပ်ရှားဆောင်ရွက်သူ အမ်းဒေသခံတစ်ဦးဖြစ်သည့် ကိုမျိုးလွင်ကလည်း " အဖမ်းခံရတဲ့ ကလေးတွေက စစ်ဘေးရှောင် ကလေးတွေပါ။ မိဘတွေကလည်း မုန့်ဖိုးတွေဘာတွေ မပေးနိုင်တဲ့အပိုင်းတွေ ရှိပါတယ်။ ဒါကြောင့်သူတို့တွေက မုန့်ဖိုးလေးတစ်ရာနှစ်ရာရဖို့ ရောင်းတာပဲရှိတာ။ အဖမ်းခံရတာက ၁၆ ရက်နေ့ကတည်းကနေ အခုထိချုပ်ရမန်မယူသေးဘူး။ အမှန်ဆိုရင် အသက်ပြည့်တဲ့သူကို ရဲစခန်းမှာချုပ်မယ်ဆိုရင်တောင် ချုပ်ရမန်ယူရတယ်လေ။ အခုကအသက်မပြည့်သေးတဲ့ ကလေးတွေဆိုတော့ ကလေးသူငယ်အခွင့်အရေးအရ လုံးဝကိုချုပ်နှောင်ခွင့်မရှိတာပါ။ ချုပ်နှောင်ခွင့်မရှိတာကို ချုပ်နှောင်ထားတာပါ" ဟုပြောသည်။

ယခုကိစ္စနှင့်ပတ်သက်၍ အမ်းမြို့မရဲစခန်းသို့ နိရဉ္စရာက ဖုန်းဖြင့်ဆက်သွယ်ခဲ့ရာတွင် ဖုန်းလက်ခံဖြေဆိုခြင်းမရှိခဲ့ပါ။