မောင်တော ဝက်ကျိန်း(မြို)ကျေးရွာမှ မီးရှို့ခံလိုက်ခံရသည့် နေအိမ် ၇ လုံး ပြန်လည်တည်ဆောက်ရန်အကူအညီများလိုအပ်နေ

နိရဉ္စရာ၊ ဒီဇင်ဘာ ၂၂/၂၀၂၂

ပြီးခဲ့သည့် နိုဝင်ဘာလ ၁၃ ရက်က ရက္ခိုင့်တပ်တော်(AA)နှင့် စစ်ကောင်စီတပ်တို့ တိုက်ပွဲ အပြင်းအထန် ဖြစ်ပွားနေချိန်အတွင်း မောင်တောမြို့နယ်မြောက်ပိုင်း၊  ဝက်ကျိန်း(မြို) ကျေးရွာမှ မီးရှို့ခံလိုက်ရသည့် နေအိမ် ၇လုံးကို ပြန်လည်တည်ဆောက်ရန်အတွက် အကူအညီများ လိုအပ်နေကြောင်း ကျေးရွာသားများက ပြောသည်။

ကျေးရွာသားတစ်ဦးက"တိုက်ပွဲဖြစ်နေလို့ ကျနော်တို့ ခုံတိုင်ကျေးရွာကို ထွက်ပြေးနေကြတဲ့ အချိန်မှာ မီးရှို့ခံလိုက်ရတာပါ။ ရွာသားတွေအားလုံးက ထွက်ပြေးနေကြတဲ့အချိန်မှာ ဖြစ်တာပါ။  အိမ်မီးရှို့ ခံထားရတဲ့ သူတွေအထဲက  အိမ်မရှိတော့လို့   အခုထိရွာကို ပြန်မလာ ကြသေးတာလည်း ရှိပါတယ်။ နေမယ့်အိမ်လည်း မရှိတော့ သူများရွာက နေအိမ်တွေမှာ ခိုကပ်နေရတယ်လေ။ အကူအညီ ပေးကြရင်တော့ ကျေးဇူးအရမ်းတင်မိမှာပါ။ အခုအိမ်တွေ ပြန်ဆောက်ဖို့ အခက်အခဲအရမ်း ဖြစ်နေကြပါတယ်။ တိုက်ပွဲဖြစ်နေလို့ အလုပ်အကိုင်လည်း မဖြစ်ဘူးလေ။ အိမ်ကိုတော့ပြန်ချင်တာပါပဲ။ အိမ်ပြန်မဆောက်နိုင်သေးတော့ အိမ်ကိုမလာနိုင်ကြတာပါ" ဟု ပြောသည်။

ပြီးခဲ့သည့် နိုဝင်ဘာလ ၁၃ ရက်၊ ညနေလေးနာရီခန့်က ဝက်ကျိန်းကျေးရွာ အနီးပတ်ဝန်းကျင်တွင် စစ်ကောင်စီတပ်နှင့် ရက္ခိုင့်တပ်တော်(အေအေ)တို့ တိုက်ပွဲများပြင်းထန်နေသည့်အချိန်တွင် ဝက်ကျိန်းကျေးရွာမှ လူနေအိမ် ၇ လုံး မီးရှို့ခံခဲ့ရသည်။

ကျေးရွာသားများမှာ ဘေးလွတ်ရာလုံခြုံမည့် အနီးအနား ကျေးရွာများသို့ ထွက်ပြေးနေကြ၍ နေအိမ်များကို မည်သူမည်ဝါက မီးရှို့လိုက်သည်ကို မသိရှိရကြောင်း ရွာသားများကပြောသည်။

မီးရှို့ခံလိုက်ရသည့်နေအိမ် ၇ လုံးအထဲတွင်  သွပ်မိုး၊ ပျဉ်စီပျဉ်ထောင် အိမ်တစ်လုံးပါဝင်ပြီး ကျန်နေအိမ်များ သစ်၊ ဝါး၊ ဒမနိမိုးအိမ်များဖြစ်ကြောင်း သိရသည်။

လက်ရှိတွင် အဆိုပါနေအိမ်များကို ပြန်လည်တည်ဆောက်ရန်အတွက် ကျေးရွာသားများမှာ အခက်အခဲများရှိနေပြီး အထောက်အပံ့အကူအညီများလိုအပ်နေသည်ဟု ကျေးရွာသားတစ်ဦးက ပြောသည်။

“ ကျွန်တော်တို့မှာ အလုပ်အကိုင်လည်းမရှိဘူး။ တောတောင်တွေကို တက်ပြီး သစ်တွေ ဝါးတွေခုတ်ဖို့ကလည်း မဖြစ်နိုင်ဘူး။ တောတောင်တွေကို သွားဖို့က အန္တရာယ်များတယ်။ ဒါကြောင့် ကျွန်တော်တို့ရွာက မီးလောင်သွားတဲ့ အိမ်တွေကို ပြန်ဆောက်ဖို့ ကူညီပေးစေချင်ပါတယ်”ဟု ပြောသည်။

အဆိုပါ ဝက်ကျိန်းကျေးရွာအနီးတွင် ပြီးခဲ့သည့် နိုဝင်ဘာလက ရက္ခိုင့်တပ်တော်(AA)နှင့် မြန်မာစစ်တပ်တို့ မကြာခဏဆိုသလို တိုက်ပွဲများဖြစ်ပွားလေ့ရှိကြောင်း ဒေသခံများက ပြောသည်။

အဆိုပါ ဝက်ကျိန်းမြိုကျေးရွာအုပ်စုတွင် အိမ်ခြေ ၇၀ ရှိပြီး အဆိုပါ အိမ်ခြေများအထဲတွင် ဒိုင်းနက်လူမျိုးအိမ် ၂ ဆောင်လည်းပါဝင်ကြောင်း သိရသည်။

(NN-8)
ဓာတ်ပုံ- Mro Youth Union