ရခိုင်ရှိ စစ်ဘေးရှောင်များနေရပ်ပြန်နိုင်ရေးနှင့် စစ်ဘေးရှောင်စခန်းများပိတ်သိမ်းနိုင်ရေး ပြည်နယ်စစ်ကောင်စီ စီစဉ်နေ

နိရဥ္စရာ၊ဒီဇင်ဘာ ၂၃ /၂၀၂၂

ရခိုင်ပြည်နယ်အတွင်းရှိ ဒေသအခြေအနေများတည်ငြိမ်လာပြီဟုဆိုကာ စစ်ဘေးရှောင်များ နေရပ်သို့ပြန်နိုင်ရေးနှင့်စစ်ဘေးရှောင်စခန်းများအား ပိတ်သိမ်းနိုင်ရေး ပြည်နယ်စစ်ကောင်စီကစီစဉ်နေသည်ဟု သိ၇သည်။

သူတို့ကို နေရပ်ပြန်ပို့နိုင်ရေးနှင့်စစ်ဘေးရှောင်စခန်းများကို ပိတ်သိမ်းနိုင်ရေးအတွက်ရခိုင်ပြည်နယ်အစိုး၇အဖွဲ့၏ ပြည်နယ်အဆင့်လုပ်ငန်းကော်မတီလုပ်ငန်းညှိနှိုင်းအစည်းအဝေးကို ယနေ့ ဒီဇင်ဘာလ ၂၃ ရက်၊ နံနက်တွင်ပြည်နယ်အစိုးရအဖွဲ့ရုံးအစည်းအဝေးခန်းမ၌ ကျင်းပခဲ့သည်ဟု သိ၇သည်။

ညှိနှိုင်းအစည်းအဝေးတွင် ပြည်တွင်းနေရပ်စွန့်ခွာသူများပြန်လည်နေရာချထားရေးနှင့် ယာယီခိုလှုံရာ စခန်းများပိတ်သိမ်းရေးဆိုင်ရာ ပြည်နယ်အဆင့်လုပ်ငန်းကော်မတီဥက္ကဋ္ဌ၊ ရခိုင်ပြည်နယ်ဝန်ကြီးချုပ် ဒေါက်တာအောင်ကျော်မင်းက ၇ခိုင်ပြည်နယ်အတွင်း တည်ငြိမ်အေးချမ်းမှုများပြန်လည် ရရှိလာပြီဖြစ်သည့်အတွက်ပြည်တွင်းမှ ခေတ္တနေရပ်စွန့်ခွာသူများပြန်လည်နေရာချထားရေးနှင့် ယာယီခိုလှုံရာစခန်းများ ပိတ်သိမ်းရေးဆိုင်ရာအမျိုးသားအဆင့် မဟာဗျူဟာပါ လုပ်ငန်းများကို အကောင်အထည်ဖော်ဆောင်ရွက်သွားကြ၇မည်ဟု ပြောဆိုသွားခဲ့သည်ဟု သိ၇သည်။

ယင်းကြောင့် ယခုကိစ္စနှင့်ပတ်သက်ပြီးပြည်နယ်အဆင့်ကော်မတီအသီးသီးတွင် တာဝန်ပေးအပ်ခြင်း ခံထားရသည့် တာဝန်ရှိသူများအနေဖြင့်နိုင်ငံတော်၏ မူဝါဒလမ်း ညွှန်ချက်များအတိုင်းလိုက်ပါဆောင်ရွက်ပေးကြရန်စသည်တို့ကို တိုက်တွန်းပြောကြားခဲ့သည်ဟု သိ၇သည်။

ရခိုင်တွင်ပြီးခဲ့သည့် သြဂုတ်လမှစတင်ကာ စစ်တပ်နှင့် ရက္ခိုင့်တပ်တော်(AA)တို့တကျော့ပြန်တိုက်ပွဲများပြင်းထန်ခဲ့ပြီး ပြီးခဲ့သည့် နိုဝင်ဘာလ ၂၆ ရက်တွင်နှစ်ဘက်နားလည်မှုဖြင့် အပစ်အခတ်ရပ်စဲခဲ့ကြပြီး နေရပ်ပြန်လိုသူ စစ်ဘေးရှောင်များရှိသလို နေရပ်မပြန်ရဲဖြစ်နေသည့် စစ်ဘေးရှောင်များလည်းရှိနေကြသည်ဟု သိ၇သည်။

အိမ်ခြေ၁၀၀ ကျော်မီးရှို့ခံထားရသည့် ကျောက်တော်မြို့နယ် တင်းမရွာမှ စစ်ပြေးရှောင် ရွာသားများအနေဖြင့်နေရပ်ပြန်လိုနေကြပြီး ပြန်ခွင့်ရရန် စစ်ကောင်စီ တာဝန်ရှိသူများထံသို့(၉)ကြိမ်မြောက်စာရေးတောင်းဆိုထားသည်ဟု သတင်းရရှိသည်။

တင်းမဆရာတော်ဦးဝါယာမိန္ဒက"အခုအခြေအနေကတော့အပစ်အခတ်တွေကလည်း ငြိမ်းချမ်းနေပြီဆိုတော့ ရွာသူ၊ ရွာသားတွေက နေရပ်ပြန်ချင်ကြတယ်။ကယ်ဆယ်ရေးစခန်းတွေမှာ ၃နှစ်လုံး နှစ်ရှည်လများ ငတ်တစ်လှည့်ပြတ်တစ်လှည့်နေလာ၇တာကြာတော့ကိုယ့်လယ်ယာ ကိုယ်လုပ်ကိုင်စားသောက်လိုလာကြတယ်။ ဒါကြောင့်စာရေး တင်ပြတောင်းဆိုတာဖြစ်တယ်။အခု ဒီဇင်ဘာ ၁၂ရက်နေ့ကတော့ နိုင်ငံတော်အဆင့်ထိစာတင်တာင်းဆိုထားတာ " ဟုမိန့်ကြားသည်။

သို့ရာတွင်ကျောက်တော်မြို့နယ် တောင်မင်းကုလားစစ်ဘေးရှောင်စခန်းမှ စစ်ဘေးရှောင်များ နေရပ်ပြန်နိုင်ရေးကိစ္စမှာမလွယ်ကူနိုင်သေးဟုစခန်းတာဝန်ခံဦးအောင်ကျော်ဝင်းက နိရဥ္စရာကိုပြောသည်။

“ကျနော်တို့စစ်ဘေးရှောင်တွေ နေရပ်ပြန်နိုင်ဖို့က မလွယ်သေးဘူး။ ပြန်ရင် ဖြစ်ပေါ်လာနိုင်တဲ့စားနပ်ရိက္ခာတွေအကျပ်အတည်းတွေနဲ့ တာဝန်ယူမှု၊ တာဝန်ခံမှုတွေ၊ နောက်ပြီးမိုင်းအန္တရာယ်တွေကလည်း ရှိနေသေးတော့ ဒါတွေကို ဘယ်သူတွေကတာဝန်ယူပေးမလဲ။ နောက်ပြီး သူတို့အပစ်ရပ်ကြတယ်ဆိုတာက တရားဝင်စာချုပ်စာတမ်းနဲ့မဟုတ်တော့ တစ်ဘက်က ချိုးဖောက်ရင် အချိန်မရွေးတိုက်ပွဲတွေဖြစ်ပြန်လာနိုင်တယ်။ ဒါတွေကို စဉ်းစားပြီးတော့ကျနော်တို့ ပြန်ဖို့ စိတ်ကူးမရှိဘူး”ဟု ပြောသည်။

တောင်မင်းကုလားစစ်ဘေးရှောင်စခန်းတွင်အိမ်ထောင်စု ၈၁ စုရှိပြီး လူဦးရေ ၅၀၀ ကျော်ရှိသည်ဟု သိ၇သည်။

၇ခိုင်တွင် ၂၀၁၈ခုနှစ်မှ ၂၀၂၀ ပြည့်နှစ်အတွင်း တိုက်ပွဲဖြစ်ပွားမှုများနှင့် ယခုနှစ် ၂၀၂၂ခုနှစ်အတွင်း တကျော့ပြန်တိုက်ပွဲများကြောင့် မောင်တော၊ ဘူးသီးတောင်၊ ၇သေ့တောင်၊ပုဏ္ဏားကျွန်း၊ ကျောက်တော်၊ မြောက်ဦး၊ မင်းပြား၊ မြေပုံ၊ အမ်းစသည့်မြို့နယ်များတွင်စစ်ဘေးရှောင် သိန်းနှင့်ချီ နေရပ်စွန့်ခွာထွက်ပြေးခဲ့၇သည်။

၂၀၂၀ ပြည့်နှစ်နောက်ပိုင်းအပစ်အခတ်ရပ်စဲလိုက်ချိန်တွင် စစ်ဘေးရှောင်အများစု နေရပ် ပြန်သွားကြပြီဖြစ်သော်လည်းသောင်းနှင့်ချီသော စစ်ဘေးရှောင်များမှာ လက်ရှိအချိန်အထိစစ်ဘေးရှောင်စခန်းများတွင် စားဝတ်နေရေးအခက်အခဲများဖြင့် ဆက်လက် နေထိုင်နေကြ၇ဆဲဖြစ်သည်။

တစ်ဘက်တွင်လည်း စစ်ဘေးရှောင်များကမူနေရပ်ပြန်သွားပါက သူတို့၏ရပ်ရွာများတွင် နေအိမ်များ၊ တောင်ယာလုပ်ငန်းခွင်များပျက်စီးဆုံးရှုံးနေမှုများကြောင့် သူတို့၏လူမှုစီးပွားဘ၀ ပြန်လည် ရပ်တည်နိုင်ရေးအတွက်အခက်အခဲများကြုံလာနိုင်သည်ဟု ပြောကြသည်။

ယင်းအပြင်တောတောင်များကို မှီခိုလုပ်ကိုင်စားသောက်ကြရသည့်သူတို့အတွက်မြေမြှုပ်မိုင်းများကို စစ်ကောင်စီဘက်က ရှင်းလင်းမပေးမှုသေးမှုကြောင့်လည်း နေရပ်ပြန်ရန်လုံး၀မဖြစ်နိုင်သေးဟု ဘူးသီးတောင်မြို့နယ် ရန်အောင်မြေစစ်ဘေးရှောင်စခန်းတာဝန်ခံဦးအောင်သိန်းလှက နိရဥ္စရာကိုပြောသည်။

“ကျနော်တို့ ဒီကိုရောက်တာ၄ နှစ်ကျော်သွားပြီ။ ရွာပြန်မယ်ဆိုရင်လည်း ဟိုမှာက အိမ်တွေ ပျက်စီးနေလောက်ပြီ။ဒါကြောင့် ကျနော်တို့ဘ၀ ပြန်လည်ထူထောင်ဖို့အတွက် ဘယ်သူတွေကတာဝန်ယူပေးနိုင်မလဲ။ ပြီးတော့ စံဂိုးထောင်နဲ့ သရက်ပြင်အုပ်စုတွေမှာဆိုစစ်တပ်က တပ်စွဲထားတာရှိနေသေးသလို တောတောင်တွေမှာ မိုင်းအန္တရာယ်ကလည်းကျနော်တို့ကို ခြိမ်းခြောက်နေသေးတော့နေရပ်ပြန်နိုင်ဖို့ဟာ မဖြစ်နိုင်သေးဘူးလို့ ထင်တယ်”ဟု ပြောသည်။

ရန်အောင်မြေစစ်ဘေးရှောင်စခန်းတွင်ဘူးသီးတောင်မြို့နယ်အတွင်းမှ အိမ်ထောင်စု ၈၀ ကျော်နှင့် လူဦးရေ ၆၀၀ ကျော်ရှိသည်ဟုသိ၇သည်။

၇ခိုင်တွင် ၂၀၂၀နောက်ပိုင်း အပစ်ရပ်စဲပြီးနောက်တွင် မြေပုံမြို့နယ်တွင် အိမ်ထောင်စု(၇၉)စု၊ လူဦးရေ(၂၉၃)ဦး၊ အမ်းမြို့နယ်တွင် လူဦးရေ (၅၃၂၀) ဦးနှင့် ကျောက်တော်မြို့နယ်တွင်လည်းလူဦးရေ ၅၈၉ ဦးတို့ကို အိမ်ထောင်စုတစ်စုလျှင် ငွေကျပ် ၅သိန်းစီဖြင့် စုစုပေါင်း ငွေကျပ် ၆၃၈ ဒသမ ၇၈၄ သန်းထောက်ပံ့ကာနေရပ်ပြန်ပို့နိုင်ခဲ့ပြီဟုပြည်နယ်စစ်ကောင်စီစာရင်းအရ သိ၇သည်။

ယင်းသို့ပြန်ပို့ရာတွင် နေရပ်ပြန်ပို့ခံရသည့်အမ်းမြို့နယ်မှ ဒါးလက်ချောင်းကျေးရွာအုပ်စုမှ စစ်ဘေးရှောင်အိမ်ထောင်စု၃၀၀ ကျော်သည် သူတို့၏နေရပ်တွင် ကုန်းလမ်းရေလမ်းတို့ကို စစ်တပ်က မကြာခဏဖြတ်တောက်ပိတ်ဆို့မှုနှင့် တောတောင်များတွင်မိုင်းအန္တရာယ်ကိုစိုးရိမ်နေ၇သည့်အတွက် နေရပ်တွင်မနေရဲဘဲအမ်းမြို့ပေါ်နှင့် မြို့အပြင်တို့တွင် မိမိအစီအစဉ်များဖြင့်နေအိမ်များငှားရမ်းကာ အခက်အခဲများဖြင့် နေနေကြ၇ဆဲဖြစ်သည်ဟုအမ်းမြို့မှ စစ်ဘေးရှောင်အရေး ဆောင်ရွက်ပေးခဲ့သူတစ်ဦးက ပြောသည်။

ဆက်စပ် အကြောင်းအရာများ

နောက်ဆုံးရသတင်းများ