ရခိုင်စစ်ဘေးရှောင်များအတွက် နိပွန်ဖောင်ဒေးရှင်းကလှူဒါန်းသည့်ဆန်အိတ် ၅၀၀၀၀ကျော်မှ ၃၉ဝဝဝ အိတ်ကို လှူဒါန်းခဲ့ပြီဟုဆို

နိရဥ္စရာ၊ ဒီဇင်ဘာ ၂၄/၂၀၂၂

ရခိုင်စစ်ဘေးရှောင်စခန်းတည်ရှိရာ မြို့နယ် (၁၁)ခုအတွက် နိပွန်ဖောင်ဒေးရှင်းကလှူဒါန်းသည့်ဆန်အိတ် ၅၀,၀၀၀ ကျော်အထဲမှ ၃၉ဝဝဝအိတ်ခန့်ကို လှူဒါန်းပြီးဖြစ်ကြောင်း သိရသည်။ 

ရခိုင်စစ်ဘေးရှောင်များအတွက် နိပွန်ဖောင်ဒေးရှင်းက လှူဒါန်းထားသည့် ဆန်အိတ်များကို အောက်တိုဘာ ၁၈ ရက်နေ့မှစတင်ကာ မြို့နယ်အလိုက် ဆက်တိုက်လှူဒါန်းလျက်ရှိပြီး  ဆန်အိတ်ပေါင်း ၅၅၀၀၀ ကျော်ထဲမှ ယနေ့ ဒီဇင်ဘာ ၂၄ ရက်နေ့အထိ ဆန်အိတ်ပေါင်း ၃၉၀၀၀ ခန့်ကို လှူဒါန်းပြီးဖြစ်ကြောင်း ဆန်လှူဒါန်းနိုင်ရေး ညှိနှိုင်းဆောင်ရွက်ပေးနေသည့် ဦးဝင်းအောင်က နိရဥ္စရာကိုပြောသည်။

"လှူတာက ဆက်တိုက်လှူနေတာပါ။ မြောက်ဦးမှာလှူတယ်။ ကျောက်တော်မှာ လှူတယ်။ မင်းပြား၊ပေါက်တော၊ မြေပုံကတော့ ပြီးသွားပြီး။ ဒီနေ့တော့ ဘူးသီးတောင်၊ မောင်တော လှူဖြစ်တယ်။ ရသေ့တောင်နဲ့ ပုဏ္ဏားကျွန်းပဲ ကျန်တယ်"ဟု ပြောသည်။

 အများအားဖြင့် စစ်ဘေးရှောင်တစ်ဦးလျှင် ပျဉ်းမျှဆန်တစ်အိတ်နှုန်းနှင့် လှူဒါန်းပေးနေခြင်းဖြစ်ပြီး လူဦးရေများသည့် တချို့ စခန်းများတွင် အခြေအနေအရ ခွဲဝေလှူဒါန်းပေးနေကြောင်း သိရသည်။ 

 ဆန်များကို ဒီဇင်ဘာ လမကုန်ခင်းအပြီးလှူဒါန်းနိုင်ရန် မျှော်မှန်းထားပြီး ဆောင်းရာသီကို ရောက်ရှိလာပြီဖြစ်၍ ရခိုင်မှစစ်ဘေးရှောင်များအတွက် နိပွန်ဖောင်ဒေးရှင်းအနေနှင့် အနွေးထည်များ ထပ်မံလှူဒါန်းရန် စီစဉ်နေကြောင်း ဦးဝင်းအောင်က ဆက်ပြောသည်။ 

 "ဒီဇင်ဘာထဲမှာ အပြီးလှူသွားဖို့အတွက် ပြင်ဆင်နေပါတယ်။ အခုဆောင်းလည်းဝင်ပြီဆိုတော့ နောက်ပိုင်း ရခိုင်မှာရှိတဲ့ ကလေး၊ လူငယ်၊လူရွယ်၊ သက်ကြီးရွယ်အိုတွေအတွက် အနွေးထည် လှူဒါန်းပေးဖို့ စီစဉ်နေတာတော့ရှိတယ်"ဟု ပြောသည်။ 

 ရခိုင်ပြည်နယ်အတွင်း စစ်တွေ၊ ပုဏ္ဏားကျွန်း၊ ကျောက်တော်၊ မြောက်ဦး၊ မင်းပြား၊ အမ်း၊ ရသေ့တောင်၊ ဘူးသီးတောင်၊ မောင်တောစသည့် မြို့နယ် (၉)မြို့နယ်ရှိ စစ်ဘေးရှောင်စခန်းများမှ ဒုက္ခသည်များအတွက် ဂျပန်နိုင်ငံ နိပွန်ဖောင်ဒေးရှင်းက ဆန်အိတ်ပေါင်း ၅ သောင်းကျော်ကို ပြီးခဲ့သည့် မေလမှစတင်ပေးပို့ခဲ့သော်လည်း  စစ်ကောင်စီဘက်က ရခိုင်တွင် တိုက်ပွဲများဖြစ်နေ၍ဟု အကြောင်းပြကာ ထိုဆန်များကိုလှူဒါန်းခွင့်အား တားမြစ်ထားခဲ့သည်။

 အောက်တိုဘာလ ၉ ရက်ခန့်ကမှ စစ်ကောင်စီ အနောက်ပိုင်းတိုင်းစစ်ဌာနချုပ်မှ တိုင်းမှူးက အဆိုပါဆန်များကို လှူဒါန်းခွင့်ပြုပေးခဲ့ခြင်းဖြစ်သည်။ 

 အောက်တိုဘာ ၁၈ ရက်မှစတင်ကာ ကျောက်တော်၊ မြောက်ဦး၊ မင်းပြား၊ မြေပုံ၊ ပေါက်တောတို့ကို ဆက်တိုက်လှူဒါန်းခဲ့ပြီး ယနေ့ ဘူးသီးတောင်နှင့် မောင်တောကို ဆက်လက်လှူဒါန်းခဲ့ပြီးဖြစ်၍ နောက်ထပ် ရသေ့တောင်နှင့် ပုဏ္ဏားကျွန်းမြို့နယ်ကို လှူဒါန်းရန်သာကျန်ရှိတော့သည်ဟု သိရသည်။

 ဂျပန်နိုင်ငံ နိပွန်ဖောင်ဒေးရှင်း ဥက္ကဋ္ဌ ဆာဆာကာဝါ၏ ၂၀၂၁ ခုနှစ်၊ နိုဝင်ဘာလခရီးစဉ်အတွင်း စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နှင့်တွေဆုံစဉ် နှုတ်ဖြင့် ကတိပေး လှူဒါန်းထားခဲ့ခြင်းဖြစ်ပြီး မေလတွင် ပေးပို့ခဲ့ခြင်းလည်းဖြစ်သည်။(NN-7)

(ဓာတ်ပုံ- ဦးဝင်းအောင်ပို့စ် )